श्री अंबाबाई मंदिर विकास आराखड्यातील भूसंपादनासाठी योग्य मोबदला दिला जाईल; कोणावरही अन्याय होणार नाही – राजेश क्षीरसागर

प्रतिनिधी :  उमेश जाधव 

कोल्हापूर, दि. १७ : साडेतीन शक्तीपीठांपैकी एक असलेल्या करवीर निवासिनी श्री अंबाबाई मंदिर परिसराच्या विकासासाठी प्रस्तावित विकास आराखड्यातील भूसंपादनामुळे बाधित होणाऱ्या नागरिकांना त्यांच्या जमिनी व मिळकतीसाठी योग्य मोबदला दिला जाईल. भूसंपादन प्रक्रियेत कोणावरही अन्याय होणार नाही, असे आश्वासन राज्य नियोजन मंडळाचे कार्यकारी अध्यक्ष तथा आमदार राजेश क्षीरसागर यांनी दिले.

श्री अंबाबाई मंदिर व परिसर विकास आराखड्याच्या अनुषंगाने प्रस्तावित भूसंपादनाशी संबंधित नागरिक, व्यापारी, नगरसेवक आणि श्रीपूजक यांच्यासोबत जिल्हाधिकारी कार्यालयातील राजर्षी शाहूजी सभागृहात बैठक आयोजित करण्यात आली होती. राजेश क्षीरसागर यांच्या अध्यक्षतेखाली आणि जिल्हाधिकारी डॉ. विजय राठोड यांच्या प्रमुख उपस्थितीत झालेल्या या बैठकीत भूसंपादन प्रक्रिया, बाधित नागरिकांचे प्रश्न आणि विकास आराखड्यातील प्रस्तावित सुविधांबाबत सविस्तर चर्चा करण्यात आली.

बाधित नागरिकांना योग्य मोबदला देण्यासाठी समितीचा विचार

राजेश क्षीरसागर म्हणाले की, श्री अंबाबाई मंदिर हे प्राचीन आणि धार्मिकदृष्ट्या अत्यंत महत्त्वाचे मंदिर आहे. मंदिराचा विकास करताना देशभरातून येणाऱ्या भाविकांसोबतच परिसरातील नागरिकांना सुविधा मिळाव्यात, ही शासनाची सकारात्मक भूमिका आहे.

विकास आराखडा राबविताना भूसंपादनामुळे कोणत्याही नागरिकावर अन्याय होणार नाही, यासाठी प्रशासनाकडून आवश्यक प्रयत्न करण्यात येतील. मंदिर परिसरातील बाधित नागरिकांना त्यांच्या जागेसाठी योग्य मोबदला मिळावा, यासाठी जिल्हास्तरावर समिती स्थापन करण्याबाबत विचार करण्यात येईल, असेही त्यांनी स्पष्ट केले.

मंदिर परिसराच्या सर्वांगीण विकासासाठी प्रस्तावित भूसंपादन प्रक्रिया महत्त्वाची असल्याने नागरिकांनी प्रशासनाला सहकार्य करावे, असे आवाहनही आमदार राजेश क्षीरसागर यांनी केले.

भूसंपादन प्रक्रिया पारदर्शक ठेवण्यावर भर

जिल्हाधिकारी डॉ. विजय राठोड यांनी बैठकीत श्री अंबाबाई मंदिर परिसर विकास आराखड्याचे सादरीकरण केले. विकास आराखडा राबविताना भूसंपादनाची प्रक्रिया पारदर्शक, अचूक आणि नियमानुसार करण्यासाठी प्रशासनाकडून प्रयत्न सुरू असल्याचे त्यांनी सांगितले.

या विकास आराखड्यासाठी एकूण ३६० मिळकतींचे भूसंपादन करणे आवश्यक असल्याचे सादरीकरणातून स्पष्ट करण्यात आले. यामध्ये ८९ मिळकती निवासी, १९५ वाणिज्यिक, तर ५३ मिळकती संयुक्त स्वरूपाच्या आहेत.

मिळकत पत्रिकेवरील जमिनीचे एकूण क्षेत्रफळ २८ हजार ५८ चौरस मीटर असून, यापैकी खाजगी मालकीच्या १९ हजार ४८९ चौरस मीटर क्षेत्राबाबत भूसंपादन प्रक्रिया राबविण्याचा विचार करण्यात आला आहे.

भाविकांसाठी विविध सुविधांचा समावेश

श्री अंबाबाई मंदिर परिसर विकास आराखड्यात भाविक आणि नागरिकांच्या सुविधांचा विचार करण्यात आला आहे. यामध्ये दर्शन रांग, दुचाकी व चारचाकी वाहनांसाठी सुसज्ज पार्किंग, वाणिज्य संकुल, दुकान गाळे, अन्नछत्र, मंदिर कार्यालय आणि ॲम्पीथिएटर यांचा समावेश आहे.

याशिवाय स्वच्छतागृह, हेरिटेज प्लाझा, लॉकर्स, चप्पल स्टॅन्ड यांसह भाविकांसाठी आवश्यक असलेल्या अन्य सुविधांचाही विकास आराखड्यात विचार करण्यात आला आहे.

मंदिर परिसराचा विकास करताना धार्मिक वारसा, भाविकांची सुविधा, स्थानिक नागरिकांच्या गरजा आणि परिसराची भविष्यातील वाढ लक्षात घेऊन नियोजन करण्यात येत असल्याचे प्रशासनाकडून स्पष्ट करण्यात आले.

बाधित नागरिकांकडून सहकार्याचे आश्वासन

मंदिर परिसरातील प्रस्तावित विकासकामांमुळे बाधित होणाऱ्या सदनिका आणि दुकान गाळे मालकांनी बैठकीत आपल्या विविध सूचना मांडल्या. विकास आराखड्याबाबत आवश्यक सूचना देतानाच आराखडा राबविण्यासाठी प्रशासनाला सहकार्य करण्याचे आश्वासनही त्यांनी दिले.

यावेळी निवासी उपजिल्हाधिकारी गजानन गुरव, जिल्हा नियोजन अधिकारी विक्रम देशमुख, करवीर उपविभागीय अधिकारी मोसमी चौगुले, पश्चिम महाराष्ट्र देवस्थान व्यवस्थापन समितीच्या सचिव वर्षा साळुंखे, देवस्थान समितीचे माजी अध्यक्ष महेश जाधव यांच्यासह संबंधित अधिकारी, मान्यवर, नागरिक, व्यापारी आणि श्रीपूजक उपस्थित होते.

श्री अंबाबाई मंदिर परिसराचा नियोजित आणि सर्वांगीण विकास करताना भूसंपादन प्रक्रिया पारदर्शक ठेवणे, बाधितांना योग्य मोबदला देणे आणि भाविकांना अत्याधुनिक सुविधा उपलब्ध करून देणे, या तीन बाबींवर प्रशासनाचा विशेष भर राहणार असल्याचे बैठकीत स्पष्ट झाले.