रत्नागिरीतील मौजे नाचणे येथे केंद्रीय विद्यालयाला मंजुरी; अडीच हेक्टर जमीन देण्यास मंत्रिमंडळाची मान्यता

मुंबई प्रतिनिधी 

 दि. २९ : रत्नागिरी जिल्ह्यातील मौजे नाचणे येथे नवीन केंद्रीय विद्यालय स्थापन करण्याचा मार्ग अखेर मोकळा झाला आहे. या विद्यालयासाठी अडीच हेक्टर जमीन उपलब्ध करून देण्यास राज्य मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते.

या निर्णयामुळे कोकणातील विद्यार्थ्यांसाठी राष्ट्रीय स्तरावरील गुणवत्तापूर्ण शिक्षणाची आणखी एक मोठी सुविधा उपलब्ध होणार आहे.

केंद्र सरकारने देशभरात ८५ नवीन केंद्रीय विद्यालये सुरू करण्याचा निर्णय घेतला असून त्यामध्ये महाराष्ट्रातील अकोला आणि रत्नागिरी या जिल्ह्यांचा समावेश आहे. त्यानुसार रत्नागिरी जिल्ह्यातील मौजे नाचणे (म्यु. आत, ता. जि. रत्नागिरी) येथे भारत सरकारच्या केंद्रीय विद्यालय संघटन मार्फत नवीन विद्यालय उभारण्याचा प्रस्ताव ठेवण्यात आला होता.

या प्रस्तावानुसार मौजे नाचणे येथील सर्व्हे क्रमांक ९३ मधील अडीच हेक्टर जमीन केंद्रीय विद्यालय संघटनास वर्ग दोन धारणाधिकाराने देण्यास मंत्रिमंडळाने मंजुरी दिली आहे.

या निर्णयामुळे रत्नागिरी जिल्ह्यातील विद्यार्थ्यांना केंद्रीय अभ्यासक्रमावर आधारित शिक्षण, आधुनिक शैक्षणिक सुविधा तसेच राष्ट्रीय आणि आंतरराष्ट्रीय दर्जाशी सुसंगत वातावरणात शिक्षण घेण्याची संधी मिळणार आहे.

कोकणातील शैक्षणिक विकासासाठी हा निर्णय महत्त्वपूर्ण मानला जात असून पालक आणि विद्यार्थ्यांकडून त्याचे स्वागत करण्यात येत आहे.