गोरेवाडा आंतरराष्ट्रीय प्राणी उद्यानातील कामांना नव्या ‘टाइमलाईन’ने गती द्या – मुख्यमंत्री देवेंद्र फडणवीस

प्रतिनिधी : नरेश शिंदे 

विदर्भातील महत्त्वाचे पर्यटन केंद्र म्हणून गोरेवाड्याचा विकास करण्याचे निर्देश; आफ्रिकन सफारीच्या कामाचाही घेतला आढावा

नागपूर, दि. 30 ऑगस्ट 2026 : बाळासाहेब ठाकरे गोरेवाडा आंतरराष्ट्रीय प्राणी उद्यानाचा नियोजनबद्ध आणि सर्वांगीण विकास करण्याच्या दृष्टीने मुख्यमंत्री देवेंद्र फडणवीस यांनी गोरेवाडा प्रकल्पाची प्रत्यक्ष पाहणी करून विविध विकासकामांचा सविस्तर आढावा घेतला. प्रकल्पातील सर्व कामांसाठी नव्याने स्पष्ट कालमर्यादा निश्चित करून (‘टाइमलाईन’) त्यानुसार कामांना गती देण्याचे निर्देश मुख्यमंत्र्यांनी संबंधित अधिकाऱ्यांना दिले.

गोरेवाडा येथील वन्यजीव संशोधन व प्रशिक्षण केंद्रातील वसंतराव नाईक प्रशासकीय इमारतीत आयोजित आढावा बैठकीत मुख्यमंत्री फडणवीस यांनी प्रकल्पातील विविध कामांची माहिती घेतली. विशेषतः आफ्रिकन सफारी सुरू करण्यासाठी सुरू असलेल्या कामांची सद्यस्थिती, आवश्यक पायाभूत सुविधा आणि प्रकल्प पूर्णत्वाचे अपेक्षित वेळापत्रक याबाबत त्यांनी अधिकाऱ्यांकडून माहिती जाणून घेतली.

आफ्रिकन सफारीच्या कामाला गती देण्याचे निर्देश

गोरेवाडा प्रकल्पाच्या दुसऱ्या टप्प्यात आफ्रिकन सफारीसह विविध महत्त्वपूर्ण सुविधांचा समावेश आहे. आफ्रिकन सफारी सुरू करण्यासाठी आवश्यक असलेली कामे निश्चित करून ती कालबद्ध पद्धतीने पूर्ण करण्यावर भर द्यावा, अशा सूचना मुख्यमंत्री फडणवीस यांनी दिल्या.

आफ्रिकन सफारी कधी सुरू करता येईल, त्यासाठी कोणती कामे प्रलंबित आहेत आणि त्यांची सद्यस्थिती काय आहे, याची माहितीही त्यांनी घेतली. संबंधित सर्व विभागांमध्ये समन्वय ठेवून कामांना गती देण्याच्या सूचनाही यावेळी करण्यात आल्या.

गोरेवाडा प्रकल्पाचा पहिला टप्पा 2021 मध्ये पूर्ण

वनविभागाचे अपर मुख्य सचिव मिलिंद म्हैसकर यांनी सादरीकरणाद्वारे गोरेवाडा प्रकल्पाची आतापर्यंतची वाटचाल, सद्यस्थिती आणि सुरू असलेल्या विविध कामांची माहिती दिली.

सादरीकरणानुसार, गोरेवाडा प्रकल्पाचा पहिला टप्पा 2021 मध्ये पूर्ण करण्यात आला आहे. या टप्प्यात वाइल्डलाइफ रेस्क्यू सेंटर, इंडियन सफारी आणि एंट्रन्स प्लाझा यांचा समावेश आहे.

पहिल्या टप्प्यातील कामे पूर्ण झाल्यानंतर प्रकल्पाच्या पुढील विकासासाठी दुसऱ्या आणि तिसऱ्या टप्प्यातील विविध सुविधांचे नियोजन करण्यात आले आहे.

दुसऱ्या टप्प्यात आफ्रिकन सफारीसह विविध सुविधा

प्रकल्पाच्या दुसऱ्या टप्प्यात वॉकिंग ट्रेल, आफ्रिकन सफारी, सफारी प्लाझा, अॅनिमल हॉस्पिटल आणि क्वारंटाईन ब्लॉक यांचा समावेश आहे.

या सुविधांमुळे गोरेवाडा प्राणी उद्यानातील वन्यजीव पर्यटनाला मोठी चालना मिळण्याची अपेक्षा आहे. आफ्रिकन सफारीच्या कामाच्या प्रगतीवर मुख्यमंत्री फडणवीस यांनी विशेष लक्ष केंद्रित करत संबंधित अधिकाऱ्यांकडून सविस्तर माहिती घेतली.

तिसऱ्या टप्प्यात नाईट झू, बायोपार्कसह विविध सुविधा

गोरेवाडा प्रकल्पाच्या तिसऱ्या टप्प्यात ट्रेल ऑफ सेन्सेस, बायोपार्क, नाईट झू, गोंडवाना पार्क, बायो डिस्कव्हरी प्लाझा आणि ट्रायबल ट्रेल यांचा समावेश आहे.

या विविध सुविधांच्या माध्यमातून केवळ वन्यजीव पर्यटन नव्हे, तर जैवविविधता, निसर्ग आणि स्थानिक संस्कृतीचा अनुभव पर्यटकांना मिळावा, अशी संकल्पना आहे. त्यादृष्टीने प्रकल्पाचा पुढील विकास करण्याच्या सूचना मुख्यमंत्र्यांनी दिल्या.

अनुभवी सल्लागाराची नियुक्ती करण्याचे निर्देश

गोरेवाडा प्रकल्पाच्या पुढील विकासासाठी अनुभवी आणि सक्षम सल्लागाराची नियुक्ती करण्याचे निर्देश मुख्यमंत्री फडणवीस यांनी दिले. प्रकल्पाचे नियोजन करताना दीर्घकालीन पर्यटनाच्या गरजा, पर्यटकांची संख्या आणि उपलब्ध सुविधांचा विस्तार यांचा विचार करावा, असेही त्यांनी स्पष्ट केले.

ताडोबा-पेंचसोबत गोरेवाड्याला जोडण्याचे नियोजन

विदर्भातील पर्यटनाला अधिक चालना देण्यासाठी गोरेवाड्याचा व्यापक पद्धतीने विकास करण्याची गरज मुख्यमंत्र्यांनी व्यक्त केली.

ताडोबा आणि पेंच येथे येणाऱ्या पर्यटकांनी गोरेवाड्यात एक ते दोन दिवस पर्यटनासाठी मुक्काम करावा, अशा पद्धतीने पर्यटनाचे नियोजन करण्याची सूचना त्यांनी केली. ताडोबा आणि गोरेवाडा या पर्यटनस्थळांना प्रभावीपणे जोडून पर्यटकांचा मुक्काम वाढविण्यासाठी आवश्यक सुविधा विकसित करण्यावर भर देण्याचे त्यांनी सांगितले.

वन्यजीव पर्यटनासोबत पर्यटकांना विविध अनुभव देणाऱ्या सुविधा उपलब्ध करून गोरेवाड्याची विदर्भातील महत्त्वाचे पर्यटन केंद्र म्हणून ओळख निर्माण करावी, असेही मुख्यमंत्री फडणवीस यांनी निर्देशित केले.

मुख्यमंत्र्यांकडून गोरेवाडा प्राणी उद्यानाची प्रत्यक्ष पाहणी

आढावा बैठकीनंतर मुख्यमंत्री देवेंद्र फडणवीस यांनी बाळासाहेब ठाकरे गोरेवाडा आंतरराष्ट्रीय प्राणी उद्यानाची प्रत्यक्ष पाहणी केली. यावेळी प्रकल्पातील विविध सुविधा आणि सुरू असलेल्या विकासकामांची माहिती त्यांनी वनविभागाच्या वरिष्ठ अधिकाऱ्यांकडून घेतली.

प्रकल्पाच्या पुढील विकासासाठी आवश्यक उपाययोजना, कामांची सद्यस्थिती आणि नियोजन याबाबतही मुख्यमंत्र्यांनी अधिकाऱ्यांशी चर्चा केली.

आढावा बैठकीस वनमंत्री गणेश नाईक, खासदार माया इनवाते, वनविभागाचे अपर मुख्य सचिव मिलिंद म्हैसकर, प्रधान मुख्य वन संरक्षक एम. श्रीनिवास राव, विभागीय आयुक्त विजयलक्ष्मी बिदरी, पोलीस अधीक्षक ग्रामीण हर्ष पोद्दार, वाईल्डलाइफ रेस्क्यू व ट्रेनिंग सेंटरचे संचालक शिरीष उपाध्ये, अपर जिल्हाधिकारी प्रवीण महिरे, विभागीय व्यवस्थापक तथा प्राणीसंग्रहालय संचालक पांडुरंग पाखले यांच्यासह वनविभागातील वरिष्ठ अधिकारी उपस्थित होते.