पूर्व परिमंडळ-२ पोलिसांचा नागरिकांना दिलासा; ४९.५८ लाखांचा चोरीचा मुद्देमाल परत

मुंबई ब्यूरो : अनिल सावरे 

मुंबई, दि. २५ ऑगस्ट २०२६ : बृहन्मुंबई पोलीस आयुक्तालयाच्या पूर्व परिमंडळ-२ अंतर्गत येणाऱ्या विविध पोलीस ठाण्यांमध्ये चोरी, घरफोडी, जबरी चोरी, चेन स्नॅचिंग तसेच हरवलेल्या मोबाईल फोनसंदर्भात तपासादरम्यान हस्तगत करण्यात आलेला ४९ लाख ५८ हजार ३४१ रुपयांचा मुद्देमाल संबंधित नागरिकांना परत करण्यात आला.

पोलीस आयुक्त, बृहन्मुंबई देवेन भारती यांच्या संकल्पनेतून तसेच पोलीस सहआयुक्त (का. व सु.) मुंबई मनोजकुमार शर्मा यांच्या मार्गदर्शनाखाली हा सामूहिक मुद्देमाल परतावा कार्यक्रम आयोजित करण्यात आला.

पूर्व परिमंडळ-२ अंतर्गत घाटकोपर, पंतनगर, टिळकनगर, नेहरूनगर, विनोबा भावे नगर, चुनाभट्टी आणि असल्फा या पोलीस ठाण्यांकडून गुन्ह्यांच्या तपासादरम्यान हस्तगत करण्यात आलेली मालमत्ता संबंधित तक्रारदारांच्या स्वाधीन करण्यात आली.

४१० मोबाईल फोनसह सोन्याचे दागिने आणि रोख रक्कम

पूर्व परिमंडळ-२ अंतर्गत पोलीस ठाण्यांकडून मोबाईल चोरी तसेच हरवलेले एकूण ४१० मोबाईल फोन शोधून काढण्यात आले. या मोबाईलची अंदाजे किंमत ४२ लाख ४८ हजार ४८६ रुपये आहे.

याशिवाय जबरी चोरी, घरफोडी आणि चेन स्नॅचिंगच्या गुन्ह्यांमधून हस्तगत करण्यात आलेले १९ ग्रॅम सोन्याचे दागिने, ज्यांची अंदाजे किंमत ६ लाख ९० हजार रुपये, तसेच १९ हजार ८५५ रुपये रोख रक्कम नागरिकांना परत करण्यात आली.

अशा प्रकारे एकूण ४९ लाख ५८ हजार ३४१ रुपयांची किंमतीची मालमत्ता पोलिसांनी तांत्रिक व मानवी कौशल्याच्या माध्यमातून तपासादरम्यान हस्तगत केली होती.

लॅव्हेंडर बो हॉटेल येथे कार्यक्रम

आज, दि. २५ ऑगस्ट २०२६ रोजी पंतनगर पोलीस ठाण्याच्या हद्दीतील लॅव्हेंडर बो हॉटेल, गारोडिया नगर, पंतनगर, घाटकोपर (पूर्व), मुंबई येथे हा मुद्देमाल परतावा कार्यक्रम आयोजित करण्यात आला.

यावेळी अपर पोलीस आयुक्त, पूर्व प्रादेशिक विभाग धनंजय कुलकर्णी आणि पोलीस उपआयुक्त, पूर्व परिमंडळ-२ गणेश शिंदे यांच्या हस्ते संबंधित फिर्यादी व तक्रारदारांना त्यांच्या मौल्यवान वस्तू परत करण्यात आल्या.

चोरीचा किंवा हरवलेला मुद्देमाल पोलिसांच्या तपासातून परत मिळाल्याने संबंधित नागरिकांनी समाधान व्यक्त केले. पोलिसांनी केलेल्या या कार्यवाहीबद्दल तक्रारदारांनी पोलिसांचे आभार मानले.

तांत्रिक तपासामुळे मोबाईल शोधण्यात यश

मोबाईल चोरीच्या गुन्ह्यांचा तपास करताना पोलिसांनी तांत्रिक विश्लेषण तसेच मानवी कौशल्याचा प्रभावी वापर केला. त्यातून मोठ्या संख्येने चोरीचे व हरवलेले मोबाईल फोन शोधून काढण्यात पोलिसांना यश आले.

या कारवाईमुळे नागरिकांचा पोलिसांवरील विश्वास अधिक दृढ झाला असून, चोरीला गेलेली अथवा हरवलेली मालमत्ता परत मिळवून देण्यासाठी पोलीस यंत्रणा सातत्याने कार्यरत असल्याचे या उपक्रमातून स्पष्ट झाले आहे.