CEO/BOSS Fraud प्रकरणात सायबर पोलिसांची मोठी कारवाई; झारखंड-बिहारमधून दोघांना अटक, १६१ सिमकार्ड जप्त

मुंबई ब्युरो : अनिल सावरे 

ठाणे : CEO/BOSS Fraud या सायबर गुन्ह्याचा तपास करताना दक्षिण सायबर पोलीस ठाणे, गुन्हे शाखा, ठाणे शहर पोलिसांना मोठे यश मिळाले आहे. कंपनीचा डायरेक्टर असल्याचे भासवून नागरिकांची आर्थिक फसवणूक करण्यासाठी वापरण्यात आलेल्या सिमकार्डचा तपास करत पोलिसांनी बिहार आणि झारखंड येथून दोन आरोपींना अटक केली आहे. या कारवाईत १६१ सिमकार्ड, मोबाईल फोन आणि इतर साहित्य जप्त करण्यात आले आहे.

प्रेस नोटनुसार, २६ फेब्रुवारी २०२६ रोजी ४३ वर्षीय फिर्यादी यांच्या मोबाईलवर एका अज्ञात इसमाने व्हॉट्सअॅप क्रमांकावरून संपर्क साधला. संबंधित व्यक्तीने आपण कंपनीचा डायरेक्टर असल्याचे भासवून फिर्यादींचा विश्वास संपादन केला. त्यानंतर कंपनीच्या कामासाठी मोठी रक्कम पाठविण्याचा बहाणा करून फिर्यादींकडून तब्बल ४८ लाख ६० हजार ९९९ रुपये पाठवून घेतले.

या प्रकरणी फिर्यादी यांच्या तक्रारीवरून गुन्हे शाखा १५/२०२६ अंतर्गत भारतीय न्याय संहिता कलम ३१८(२), ३१९(२) तसेच माहिती तंत्रज्ञान कायद्यातील ६६(क), ६६(ड) अन्वये गुन्हा दाखल करण्यात आला. फसवणुकीतील ४८ लाख ६० हजार ९९९ रुपयांची रक्कम होल्ड करण्यात पोलिसांना यश आले.

तपासादरम्यान पोलिसांनी फसवणुकीसाठी वापरण्यात आलेल्या सिमकार्डचा माग काढला. कंपनीच्या कार्यालयाच्या क्रमांकावर तसेच फिर्यादीशी संपर्क करण्यासाठी वापरण्यात आलेले सिमकार्ड हे बिहारमधील महाराजगंज परिसरातील रहिवासी आणि इतर नागरिकांच्या कागदपत्रांचा तसेच E-KYC चा गैरवापर करून बेकायदेशीररीत्या सुरू करण्यात आल्याचे तपासात समोर आले.

ही सिमकार्ड प्रक्रिया सिवान, बिहार येथील एअरटेल सिम विक्रेता (POS) आमीर चांद मोहम्मद खान याने केल्याचे पोलिस तपासात निष्पन्न झाले. आरोपी ग्राहकांचा जुना क्रमांक पोर्ट आऊट करून देतो असे सांगून सिमकार्ड अॅक्टिव्हेट करत असल्याचे तपासात आढळले. त्यानंतर ही सिमकार्ड इतर आरोपींना विकली जात असल्याची माहिती पोलिसांना मिळाली.

तपासाच्या तांत्रिक विश्लेषणातून आणखी महत्त्वाची माहिती समोर आली. २४ ऑगस्ट २०२६ रोजी आमीर चांद मोहम्मद खान याने आरोपी सूरज कुमार प्रदीप कुमार साव उर्फ विशाल याला सिमकार्ड विकल्याचे तपासात निष्पन्न झाले. त्यानंतर आरोपीने सदर सिमकार्डचा वापर करून फसवणुकीचे गुन्हे केल्याचे पोलिसांच्या निदर्शनास आले.

या प्रकरणात आमीर चांद मोहम्मद खान (वय २२, रा. रकंडीपूर, सिवान, बिहार) हा एअरटेल सिम वितरक असल्याचे नमूद करण्यात आले आहे. तर सूरज कुमार प्रदीप कुमार साव उर्फ विशाल (रा. कुमारधुबी, धनबाद, झारखंड) हा दुसरा आरोपी आहे.

पोलिसांच्या तपासात या आरोपींचा सात गुन्ह्यांशी संबंध असल्याचे निष्पन्न झाले असून, त्यापैकी दोन गुन्हे दक्षिण विभाग सायबर पोलीस ठाणे, मुंबई येथील असल्याचे समोर आले आहे. तसेच पंजाब, गुरुग्राम-हरियाणा, नवी दिल्ली, पश्चिम बंगाल आणि तामिळनाडू येथील प्रत्येकी एका गुन्ह्यात त्यांचा सहभाग असल्याचे NCRP तक्रारीवरून निष्पन्न झाल्याचे प्रेस नोटमध्ये नमूद आहे.

आरोपींकडून मुद्देमाल जप्त

पोलिसांनी आरोपींकडून खालील मुद्देमाल जप्त केला आहे:

१६१ एअरटेल सिमकार्ड

एक मेगाफोन

सिमकार्ड सुरू करण्यासाठी वापरण्यात येणारे ‘Airtel मित्र’ अॅप असलेला POCO कंपनीचा मोबाईल फोन

नागरिकांना सायबर पोलिसांचे आवाहन

सायबर फसवणुकीपासून सावध राहण्याचे आवाहन पोलिसांनी नागरिकांना केले आहे. अनोळखी क्रमांकावरून व्हॉट्सअॅपवर संपर्क साधून एखाद्या व्यक्तीचा फोटो किंवा ओळखीचा संदर्भ देत पैसे पाठविण्यास सांगितल्यास त्यावर विश्वास ठेवू नये. तसेच आपली सायबर फसवणूक झाल्यास तातडीने १९३० या हेल्पलाइन क्रमांकावर संपर्क साधावा.

आपल्या नावावर सिमकार्ड घेऊन त्याचा गैरवापर होत असल्याची शंका असल्यास Sanchar Saathi Portal वर त्याची तपासणी करावी, असेही पोलिसांनी आवाहन केले आहे.

या कारवाईत दक्षिण विभाग सायबर पोलीस ठाणे, गुन्हे शाखा, मुंबई तसेच संबंधित वरिष्ठ अधिकाऱ्यांच्या मार्गदर्शनाखाली पोलिस अधिकारी व कर्मचाऱ्यांनी तपास पूर्ण केला. वरिष्ठ पोलिस अधिकाऱ्यांच्या मार्गदर्शनाखाली करण्यात आलेल्या या कारवाईमुळे बनावट कागदपत्रे व E-KYC चा गैरवापर करून सिमकार्डच्या माध्यमातून होणाऱ्या सायबर फसवणुकीचे नेटवर्क उघडकीस आले आहे.