परभणी जिल्हा विकासकामांचा आढावा; प्रलंबित प्रश्नांवर जिल्हा नियोजन समिती बैठकीत सविस्तर चर्चा

परभणी | लक्ष्मण चौरे (मराठवाडा ब्युरो)

परभणी जिल्ह्याच्या सर्वांगीण आणि संतुलित विकासाला गती देण्यासाठी राबविण्यात येणाऱ्या विविध योजनांचा आढावा घेण्यासाठी पालकमंत्री तथा जिल्हा नियोजन समितीच्या अध्यक्षा मेघना साकोरे-बोर्डीकर यांच्या अध्यक्षतेखाली जिल्हा वार्षिक योजनेची आढावा बैठक जिल्हा नियोजन सभागृहात पार पडली. या बैठकीत विकासकामांची सद्यस्थिती, नागरिकांच्या विविध समस्या तसेच प्रलंबित प्रश्नांवर सविस्तर चर्चा करण्यात आली.

बैठकीत विविध विभागांच्या अधिकाऱ्यांनी जिल्ह्यात सुरू असलेल्या विकासकामांची प्रगती, निधीचा वापर आणि विविध योजनांच्या अंमलबजावणीबाबत माहिती सादर केली. तसेच उपस्थित लोकप्रतिनिधींनी आपल्या मतदारसंघातील नागरिकांना भेडसावणाऱ्या समस्या, अपूर्ण विकासकामे आणि प्रलंबित प्रश्न पालकमंत्र्यांच्या निदर्शनास आणून दिले.

या सर्व विषयांवर सखोल चर्चा करत संबंधित विभागांनी प्रलंबित प्रश्नांवर तातडीने आणि प्रभावी कार्यवाही करून नागरिकांना दिलासा द्यावा, असे निर्देश पालकमंत्री मेघना साकोरे-बोर्डीकर यांनी दिल्याची माहिती प्रशासनाकडून देण्यात आली.

बैठकीत जिल्ह्याच्या विकासाला अधिक गती देण्यासाठी सर्व विभागांनी परस्पर समन्वयाने काम करावे, तसेच विकासकामांमध्ये कोणताही विलंब होणार नाही याची दक्षता घ्यावी, यावर विशेष भर देण्यात आला. नागरिकांच्या समस्या वेळेत सोडवून शासनाच्या योजनांचा लाभ तळागाळातील प्रत्येक व्यक्तीपर्यंत पोहोचविण्यासाठी प्रशासनाने अधिक प्रभावीपणे काम करण्याच्या सूचनाही यावेळी देण्यात आल्या.

या बैठकीस खासदार संजय जाधव हे दूरदृश्य प्रणालीद्वारे सहभागी झाले होते. तसेच जिल्हा परिषद अध्यक्षा लता वाकळे, पालक सचिव चंद्रकांत पुलकुंडवार, जिल्हाधिकारी संजय सिंह चव्हाण, मुख्य कार्यकारी अधिकारी नतिशा माथुर, पोलिस अधीक्षक पंकज कुमावत, महानगरपालिका आयुक्त नितीन नार्वेकर, जिल्हा नियोजन अधिकारी उमेश वाघमारे, प्रकल्प संचालक रश्मी खांडेकर यांच्यासह विविध विभागांचे वरिष्ठ अधिकारी आणि लोकप्रतिनिधी उपस्थित होते.

बैठकीत जिल्हा वार्षिक योजनेअंतर्गत सुरू असलेल्या विविध विकास प्रकल्पांचा वेग वाढविणे, नागरिकांच्या प्रलंबित मागण्यांचे तातडीने निराकरण करणे आणि जिल्ह्याच्या विकासासाठी प्रशासन व लोकप्रतिनिधींनी समन्वयाने कार्य करणे आवश्यक असल्याचे मत व्यक्त करण्यात आले. जिल्ह्याच्या प्रगतीसाठी सर्व विभागांनी उत्तरदायित्वाने काम करून विकासकामे वेळेत पूर्ण करण्याचा निर्धार यावेळी व्यक्त करण्यात आला.