मुख्यमंत्र्यांच्या वाढदिवसानिमित्त दृष्टीदोष असलेल्या विद्यार्थ्यांना 'स्मार्ट व्हिजन' उपकरणांचे वाटप

प्रतिनिधी: नरेश शिंदे 

गडचिरोली : मुख्यमंत्री देवेंद्र फडणवीस यांच्या वाढदिवसानिमित्त दृष्टीदोष असलेल्या विद्यार्थ्यांना आधुनिक तंत्रज्ञानाच्या साहाय्याने अधिक सक्षम आणि स्वावलंबी बनविण्याच्या उद्देशाने गडचिरोली जिल्हा परिषद आणि महाराष्ट्र स्टेट इनोव्हेशन सोसायटी यांच्या संयुक्त विद्यमाने कृत्रिम बुद्धिमत्तेवर (AI) आधारित 'स्मार्ट व्हिजन' उपकरणांचे वितरण करण्यात आले.

जिल्हाधिकारी अविश्यांत पंडा आणि जिल्हा परिषदेचे मुख्य कार्यकारी अधिकारी सुहास गाडे यांच्या हस्ते दृष्टीदोष असलेल्या ३४ विद्यार्थ्यांना ही आधुनिक उपकरणे प्रदान करण्यात आली.

AI आधारित 'स्मार्ट व्हिजन' तंत्रज्ञान विद्यार्थ्यांसाठी वरदान

महाराष्ट्र स्टेट इनोव्हेशन सोसायटीतर्फे आयोजित 'महाराष्ट्र स्टार्टअप वीक' स्पर्धेत विजेते ठरलेल्या डीप व्हिजन टेक या स्टार्टअप कंपनीने विकसित केलेले हे 'स्मार्ट व्हिजन' उपकरण दृष्टीदोष असलेल्या व्यक्तींसाठी अत्यंत उपयुक्त ठरत आहे.

या उपक्रमांतर्गत गडचिरोली जिल्हा परिषदेला एकूण ५० उपकरणे उपलब्ध झाली असून, पहिल्या टप्प्यात ३४ विद्यार्थ्यांना त्यांचे वितरण करण्यात आले.

विद्यार्थ्यांना देण्यात आले प्रत्यक्ष प्रशिक्षण

उपकरणांचे वाटप करताना विद्यार्थ्यांना त्याच्या वापराबाबत सविस्तर मार्गदर्शन करण्यात आले. उपकरणातील विविध सुविधा, प्रत्यक्ष हाताळणी आणि वापराचे प्रात्यक्षिकही दाखविण्यात आले. त्यामुळे विद्यार्थ्यांना हे उपकरण अधिक प्रभावीपणे वापरून शिक्षण आणि दैनंदिन जीवन अधिक आत्मविश्वासाने जगणे शक्य होणार आहे.

'स्मार्ट व्हिजन' उपकरणाच्या अत्याधुनिक सुविधा

कृत्रिम बुद्धिमत्तेवर आधारित हे उपकरण दृष्टीदोष असलेल्या विद्यार्थ्यांसाठी अनेक आधुनिक सुविधा उपलब्ध करून देते.

या उपकरणाद्वारे—

समोरील वस्तू, अडथळे आणि परिसराची ध्वनीद्वारे माहिती मिळते.

पुस्तके, वर्तमानपत्रे आणि इतर मुद्रित मजकूर वाचून दाखवता येतो.

चलनी नोटा सहज ओळखता येतात.

परिचित व्यक्तींची ओळख पटते.

जीपीएसच्या सहाय्याने सुरक्षित मार्गदर्शन मिळते.

या सुविधांमुळे शिक्षण, प्रवास आणि दैनंदिन व्यवहार अधिक सुरक्षित, सुलभ आणि स्वावलंबीपणे करता येणार आहेत.

जिल्हा परिषदेवर कोणताही आर्थिक भार नाही

या उपक्रमाचे आणखी एक महत्त्वाचे वैशिष्ट्य म्हणजे 'महाराष्ट्र स्टार्टअप वीक' स्पर्धेतील विजेत्या स्टार्टअपकडून ही उपकरणे उपलब्ध झाल्याने गडचिरोली जिल्हा परिषदेला कोणताही आर्थिक भार सहन करावा लागलेला नाही. उपकरणांच्या खरेदीचा संपूर्ण खर्च महाराष्ट्र स्टेट इनोव्हेशन सोसायटीमार्फत करण्यात येत आहे.

दिव्यांग विद्यार्थ्यांच्या सक्षमीकरणासाठी महत्त्वाचा उपक्रम

आधुनिक कृत्रिम बुद्धिमत्ता तंत्रज्ञानाच्या माध्यमातून दृष्टीदोष असलेल्या विद्यार्थ्यांचे शिक्षण, स्वावलंबन आणि सामाजिक सहभाग अधिक सक्षम करण्याच्या दृष्टीने हा उपक्रम महत्त्वपूर्ण ठरणार आहे. या उपक्रमाला विद्यार्थी आणि पालकांकडून सकारात्मक प्रतिसाद मिळत असल्याची माहिती जिल्हा दिव्यांग सक्षमीकरण अधिकारी चेतन हिवंज यांनी दिली.

'स्मार्ट व्हिजन'सारख्या अत्याधुनिक तंत्रज्ञानाच्या सहाय्याने दृष्टीदोष असलेल्या विद्यार्थ्यांसाठी शिक्षण आणि दैनंदिन जीवन अधिक सुलभ करण्याच्या दिशेने गडचिरोली जिल्हा प्रशासनाने उचललेले हे पाऊल सामाजिक समावेशकतेचे आणि दिव्यांग सक्षमीकरणाचे प्रभावी उदाहरण ठरत आहे.