नापिकीच्या संकटात युवा शेतकऱ्याचा मृत्यू; हिवरा संगम परिसरात हळहळ

हिवरा संगम येथील ३० वर्षीय शेतकरी विष्णू सुरोशे यांचा विहिरीत मृतदेह आढळला; पोलीस तपास सुरू

यवतमाळ, दि. २४ सप्टेंबर (जिल्हा प्रतिनिधी रवि वाघमारे) : महागाव तालुक्यातील हिवरा संगम येथील ३० वर्षीय युवा शेतकरी विष्णू रामराव सुरोशे यांचा शेतातील विहिरीत मृतदेह आढळून आला. नापिकी आणि आर्थिक अडचणींमुळे ते तणावात असल्याची माहिती कुटुंबीयांनी दिली असून, या घटनेने हिवरा संगम परिसरात हळहळ व्यक्त होत आहे.

विष्णू सुरोशे यांच्याकडे सुमारे दोन एकर कोरडवाहू शेती होती. यंदा पावसाच्या अनियमिततेमुळे त्यांच्या शेतातील कापसाच्या पिकाचे नुकसान झाले. उत्पादन खर्च आणि कुटुंबाचा उदरनिर्वाह याबाबत ते चिंतेत असल्याची माहिती कुटुंबीयांनी दिली.

२२ सप्टेंबरपासून होते बेपत्ता

मिळालेल्या माहितीनुसार, २२ सप्टेंबर रोजी विष्णू सुरोशे हे ‘शेतात चक्कर मारून येतो’ असे सांगून घरातून निघाले होते. मात्र ते रात्री घरी परतले नाहीत. त्यानंतर कुटुंबीय आणि ग्रामस्थांनी परिसर तसेच नातेवाईकांकडे त्यांचा शोध घेतला.

दरम्यान, २४ सप्टेंबर रोजी सकाळी कलगाव येथील उपसरपंच श्रीधर भवानकर यांच्या शेतातील विहिरीत विष्णू सुरोशे यांचा मृतदेह आढळून आला.

पोलीस व महसूल प्रशासन घटनास्थळी

घटनेची माहिती मिळताच महागाव पोलीस आणि महसूल प्रशासनाने घटनास्थळी धाव घेतली. मृतदेह विहिरीतून बाहेर काढून सवना ग्रामीण रुग्णालयात शवविच्छेदनासाठी पाठविण्यात आला. त्यानंतर हिवरा येथे अंत्यसंस्कार करण्यात आले.

विष्णू सुरोशे यांच्या पश्चात आई, वडील, भाऊ, भावजय आणि बहीण असा परिवार आहे.

नापिकी आणि शेतकरी संकटाचा प्रश्न ऐरणीवर

यंदाच्या पावसातील अनिश्चिततेमुळे महागाव व परिसरातील शेतकऱ्यांना पीक नुकसानीचा सामना करावा लागत असल्याचे स्थानिकांकडून सांगण्यात आले. वाढता उत्पादन खर्च, पिकांचे नुकसान आणि आर्थिक अडचणी यामुळे शेतकऱ्यांसमोर विविध आव्हाने निर्माण झाली आहेत.

विष्णू सुरोशे यांच्या मृत्यूच्या पार्श्वभूमीवर संकटग्रस्त शेतकऱ्यांना वेळेवर मदत आणि आवश्यक आधार मिळण्याचा मुद्दाही स्थानिक पातळीवर चर्चेत आला आहे.

या प्रकरणाचा पुढील तपास पोलीस निरीक्षक सेवानंद वानखेडे, सहाय्यक पोलीस निरीक्षक प्रसेनजित जाधव, बिट जमादार केशव चव्हाण, तहसीलदार अभय मस्के, मंडळ अधिकारी एम. एकुलवार आणि तलाठी मनोज वाघमारे यांच्या मार्गदर्शनाखाली सुरू आहे