सुकळी साठवण तलाव प्रकल्प तात्काळ रद्द करा; येलदरी धरणातून सेनगाव तालुक्यातील शेतकऱ्यांना पाणी द्या

हिंगोली, प्रतिनिधी – भगवानराव मस्के : सेनगाव तालुक्यातील सुकळी गावाजवळ प्रस्तावित असलेला सुमारे १,४३४.३६ कोटी रुपयांचा सुकळी साठवण तलाव प्रकल्प तात्काळ रद्द करून येलदरी धरणातून कालवा काढावा आणि सेनगाव तालुक्यातील दुष्काळग्रस्त शेतकऱ्यांना सिंचनासाठी पाणी उपलब्ध करून द्यावे, अशी मागणी क्रांतिकारी शेतकरी संघटनेने केली आहे.

या मागणीचे निवेदन महाराष्ट्राचे मुख्यमंत्री देवेंद्र फडणवीस यांना सेनगाव तहसीलदार यांच्या माध्यमातून देण्यात आले आहे.

सेनगाव तालुक्यातील सुकळी खुर्द, सुकळी बु., दाताडा खुर्द आणि दाताडा बु. परिसरातील शेतकऱ्यांचा प्रस्तावित सुकळी साठवण तलाव प्रकल्पाला तीव्र विरोध असल्याचे संघटनेने म्हटले आहे. या प्रकल्पामुळे परिसरातील मोठ्या प्रमाणावर सुपीक आणि बागायती जमीन पाण्याखाली जाण्याची शक्यता असून, त्यामुळे शेतकऱ्यांच्या उपजीविकेवर गंभीर परिणाम होण्याची भीती व्यक्त करण्यात आली आहे.

येलदरी धरणातून पाणी देण्याची मागणी

सुकळी साठवण तलाव उभारण्याऐवजी येलदरी धरणातून कालवा काढून सेनगाव तालुक्यातील दुष्काळग्रस्त आणि पाण्याची गरज असलेल्या भागाला सिंचनाचे पाणी उपलब्ध करून देणे, हा अधिक शाश्वत आणि शेतकरीहिताचा पर्याय असल्याचे क्रांतिकारी शेतकरी संघटनेने म्हटले आहे.

येलदरी धरणातील पाण्याचा योग्य नियोजनबद्ध वापर करून सेनगाव तालुक्यातील शेतकऱ्यांना सिंचनाची सुविधा उपलब्ध झाल्यास शेती उत्पादन वाढण्यासोबतच परिसरातील शेतकऱ्यांना मोठा आर्थिक आधार मिळू शकतो, अशी भूमिका संघटनेने मांडली आहे.

शेतकऱ्यांची संमती घेतल्याशिवाय जमीन संपादन न करण्याची मागणी

क्रांतिकारी शेतकरी संघटनेने शासनासमोर विविध मागण्या मांडल्या आहेत. त्यामध्ये प्रस्तावित सुकळी साठवण तलाव प्रकल्प तात्काळ रद्द करणे, येलदरी धरणातून कालवा काढून सेनगाव तालुक्यातील शेतकऱ्यांना सिंचनासाठी पाणी उपलब्ध करून देणे तसेच शेतकऱ्यांची संमती घेतल्याशिवाय कोणत्याही प्रकारे जमीन संपादन न करणे या प्रमुख मागण्यांचा समावेश आहे.

तसेच प्रस्तावित प्रकल्पामुळे बाधित होणाऱ्या शेतकऱ्यांची प्रत्यक्ष पाहणी करून त्यांच्या हरकती आणि म्हणणे अधिकृतरीत्या नोंदवावे, अशी मागणीही करण्यात आली आहे.

प्रकल्पाचा संपूर्ण अहवाल शेतकऱ्यांसमोर ठेवण्याची मागणी

सुकळी साठवण तलाव प्रकल्पाचा संपूर्ण अहवाल, जमीन संपादनाचा प्रस्ताव, लाभक्षेत्र, प्रकल्पाचा खर्च तसेच पर्यायी पाणीपुरवठ्याच्या योजनांची सविस्तर माहिती शेतकऱ्यांना उपलब्ध करून द्यावी, अशी मागणी संघटनेने केली आहे.

शेतकऱ्यांचा विरोध असताना त्यांच्या हरकतींकडे दुर्लक्ष करून प्रकल्पाची कार्यवाही पुढे नेऊ नये, असेही संघटनेने स्पष्ट केले आहे.

मागण्या मान्य न झाल्यास तीव्र आंदोलनाचा इशारा

प्रशासन आणि शासनाने या मागण्यांवर तातडीने सकारात्मक निर्णय घ्यावा. अन्यथा क्रांतिकारी शेतकरी संघटनेच्या वतीने शेतकऱ्यांना सोबत घेऊन सेनगाव तहसील कार्यालयासमोर तसेच मुंबईतील मंत्रालयासमोर तीव्र आंदोलन करण्यात येईल, असा इशारा संघटनेने दिला आहे.

यावेळी क्रांतिकारी शेतकरी संघटनेचे मराठवाडा अध्यक्ष गजानन कावरखे, हिंगोली जिल्हाध्यक्ष नामदेव पतंगे तसेच संघटनेचे पदाधिकारी आणि परिसरातील शेतकरी उपस्थित होते.