कोल्हापूरच्या गणेशोत्सवाला मिळणार जागतिक ओळख; नागरिकांनी Bappa.org वर नोंदणी करावी

प्रतिनिधी: उमेश जाधव 

कोल्हापूरच्या गणेशोत्सवाला मिळणार जागतिक ओळख; नागरिकांनी Bappa.org वर नोंदणी करावी

कोल्हापूर, दि. २१ : कोल्हापूरच्या समृद्ध आणि ऐतिहासिक गणेशोत्सव परंपरेला जागतिक स्तरावर पोहोचविण्यासाठी विशेष उपक्रम सुरू करण्यात आला आहे. गणेशोत्सवाच्या या गौरवशाली परंपरेला युनेस्कोचा (UNESCO) वारसा दर्जा तसेच आंतरराष्ट्रीय मानांकने मिळवून देण्याच्या उद्देशाने राज्य शासनाच्या सांस्कृतिक कार्य विभागामार्फत उपक्रम राबविण्यात येत आहे.

कोल्हापूर जिल्ह्यातील गणेशोत्सवाची संस्कृती, कला, घरगुती परंपरा आणि विविध सांस्कृतिक वैशिष्ट्यांचे डिजिटल दस्तऐवजीकरण करून ती जागतिक पातळीवर पोहोचविण्यासाठी नागरिकांचा सहभाग महत्त्वाचा आहे. त्यामुळे सर्व कोल्हापूरकर, गृहनिर्माण संस्था आणि गणेश मंडळांनी Bappa.org वर नोंदणी करून या लोकचळवळीत योगदान द्यावे, असे आवाहन जिल्हाधिकारी डॉ. विजय राठोड यांनी केले आहे.

‘घरोघरी बाप्पा’ उपक्रमातून घरगुती परंपरांचे दस्तऐवजीकरण

कोल्हापूर जिल्ह्यातील वैशिष्ट्यपूर्ण, पारंपरिक आणि ऐतिहासिक वारसा असलेल्या घरगुती गणेशोत्सवाची माहिती डिजिटल स्वरूपात संकलित करण्यात येणार आहे.

नागरिकांनी आपल्या घरातील गणेशोत्सवाची कौटुंबिक परंपरा, धार्मिक विधी, सजावट, खाद्यपरंपरा आणि इतर वैशिष्ट्यपूर्ण माहिती Bappa.org या पोर्टलवर नोंदवावी. तसेच संबंधित माहिती ९१३६१७२६८१ या WhatsApp क्रमांकावरही पाठविता येणार असल्याचे जिल्हा प्रशासनाने कळविले आहे.

नोंदणी करणाऱ्यांना ‘Digital Cultural Preserver Certificate’

या उपक्रमात सहभागी होऊन पोर्टलवर नोंदणी करणाऱ्या नागरिकांना राज्य शासनाच्या वतीने ‘Digital Cultural Preserver Certificate’ देऊन सन्मानित करण्यात येणार असल्याची माहिती देण्यात आली आहे.

या माध्यमातून पारंपरिक गणेशोत्सवाचे जतन आणि त्याचे डिजिटल दस्तऐवजीकरण करण्यासाठी नागरिकांना प्रोत्साहन दिले जाणार आहे.

मूर्तिकार, कारागीर आणि लोककलावंतांनीही नोंदणी करावी

कोल्हापूर जिल्ह्यात गणेशोत्सवाशी संबंधित विविध कला आणि कलापरंपरा जपणाऱ्या व्यक्तींची माहितीही या डिजिटल मंचावर संकलित केली जाणार आहे.

जिल्ह्यातील मूर्तिकार, कारागीर, लोककलावंत तसेच विविध ६४ कलांशी संबंधित व्यक्तींनी आपल्या कला, कौशल्य आणि परंपरेची माहिती Bappa.org या डिजिटल मंचावर नोंदवावी, असे आवाहन जिल्हा प्रशासनाने केले आहे.

सांस्कृतिक वारसा जतन करण्यासाठी नागरिकांचा सहभाग महत्त्वाचा

कोल्हापूरच्या गणेशोत्सवाशी जोडलेल्या घरगुती परंपरा, कला, कौशल्ये आणि सांस्कृतिक वैशिष्ट्यांचे दस्तऐवजीकरण झाल्यास या परंपरांची माहिती पुढील पिढ्यांपर्यंत पोहोचविण्यास मदत होणार आहे.

गणेशोत्सवाच्या माध्यमातून कोल्हापूरची सांस्कृतिक ओळख व्यापक पातळीवर पोहोचविण्याच्या या उपक्रमात नागरिक, गणेश मंडळे, गृहनिर्माण संस्था, कलाकार, कारागीर आणि विविध कलांशी संबंधित व्यक्तींनी सहभागी व्हावे, असे आवाहन जिल्हा प्रशासनाने केले आहे.