भर पावसातही अखंड वीजसेवेसाठी झटणाऱ्या पेण विभागातील महावितरणच्या महिला कर्मचाऱ्यांचे कौतुक

रायगड | प्रतिनिधी : दिपक शिंदे 

मुसळधार पावसामुळे अनेक ठिकाणी वीजपुरवठ्यावर परिणाम होत असतानाही पेण विभागातील महावितरण (MSEDCL) च्या महिला कर्मचारी नागरिकांना अखंड वीजसेवा मिळावी यासाठी भर पावसात कर्तव्य बजावत आहेत.

पावसाची तमा न बाळगता विविध भागांत जाऊन वीज यंत्रणेची तपासणी, बिघाड दुरुस्ती आणि वीजपुरवठा सुरळीत ठेवण्यासाठी त्या सातत्याने कार्यरत आहेत. प्रतिकूल हवामानातही जबाबदारीने सेवा देणाऱ्या या महिला कर्मचाऱ्यांचे नागरिकांकडून कौतुक होत आहे.

वीजपुरवठा खंडित झाल्यास तो शक्य तितक्या कमी वेळेत पूर्ववत करण्यासाठी महावितरणचे अधिकारी व कर्मचारी दिवसरात्र काम करत असून, त्यामध्ये महिला कर्मचाऱ्यांचाही मोलाचा सहभाग आहे.

दरम्यान, नागरिकांनी पावसाळ्यात तुटलेल्या वीजतारा, विद्युत खांब किंवा इतर धोकादायक विद्युत उपकरणांपासून सुरक्षित अंतर राखावे आणि कोणतीही धोकादायक बाब आढळल्यास त्वरित महावितरणला माहिती द्यावी, असे आवाहन करण्यात आले आहे.