अद्ययावत मतदार यादी म्हणजे लोकशाहीवरील विश्वास; एसआयआर प्रक्रियेत नागरिकांनी सक्रिय सहभाग नोंदवावा

कोल्हापूर प्रतिनिधी : उमेश जाधव 

कोल्हापूर : अद्ययावत मतदार यादी ही केवळ प्रशासकीय नोंद नसून प्रत्येक नागरिकाच्या मतदानाच्या अधिकाराची हमी आहे. मतदानाच्या दिवशी कोणताही अडथळा न येता आत्मविश्वासाने मतदान करता यावे, यासाठी विशेष सघन पुनरिक्षण (SIR - Special Intensive Revision) प्रक्रियेत प्रत्येक पात्र नागरिकाने सक्रिय सहभाग नोंदविणे आवश्यक असल्याचे आवाहन करण्यात आले आहे.

लोकशाही केवळ मतदानाच्या दिवशीच मजबूत होत नाही, तर मतदार यादी अचूक आणि अद्ययावत ठेवण्याच्या प्रक्रियेत नागरिकांनी जबाबदारीने सहभागी झाल्यावर ती अधिक बळकट होते. एसआयआर प्रक्रिया ही केवळ औपचारिकता नसून स्वतःच्या घटनात्मक अधिकाराचे संरक्षण करण्याचा आणि लोकशाहीतील सहभाग अधिक सक्षम करण्याचा महत्त्वपूर्ण टप्पा आहे.

उद्याच्या मतदानाचा विश्वास आजच्या सहभागातून

आज काही मिनिटे देऊन मतदार यादीतील माहितीची पडताळणी केल्यास उद्या मतदानाच्या दिवशी कोणत्याही अडचणीशिवाय मतदान करता येते. त्यामुळे एसआयआर प्रक्रिया केवळ नोंदी अद्ययावत करण्यापुरती मर्यादित राहत नाही, तर नागरिक आणि लोकशाही यांच्यातील विश्वास अधिक दृढ करणारा महत्त्वाचा दुवा ठरते.

प्रत्येक मतामागे एका नागरिकाची ओळख, त्याचा घटनात्मक अधिकार आणि लोकशाहीवरील विश्वास दडलेला असतो. त्यामुळे एसआयआर प्रक्रिया ही "कोणासाठी तरी" नसून प्रत्येक पात्र मतदारासाठी आहे. या प्रक्रियेत सहभागी होणे म्हणजे आपल्या मतदानाच्या अधिकाराला अधिक सुरक्षित, सक्षम आणि भविष्यासाठी निश्चित करण्याचा सकारात्मक निर्णय आहे.

महाराष्ट्रात ३० जून ते २९ जुलैदरम्यान घरभेटीद्वारे पडताळणी

भारत निवडणूक आयोगाच्या कार्यक्रमानुसार महाराष्ट्रात ३० जून ते २९ जुलै २०२६ या कालावधीत एसआयआर अंतर्गत घरभेटीद्वारे गणना प्रक्रिया सुरू आहे. या काळात बूथ लेव्हल अधिकारी (BLO) प्रत्येक घराला भेट देऊन गणना फॉर्म उपलब्ध करून देत आहेत. तसेच आवश्यक माहिती आणि कागदपत्रांची पडताळणी करून मतदार यादी अद्ययावत करण्यासाठी माहिती संकलित केली जात आहे.

यानंतर प्राप्त माहितीची छाननी, दावे व हरकतींची प्रक्रिया पूर्ण करून ७ ऑक्टोबर २०२६ रोजी अंतिम मतदार यादी प्रसिद्ध करण्यात येणार आहे.

या संपूर्ण प्रक्रियेचा उद्देश प्रत्येक पात्र नागरिकाचा मतदानाचा अधिकार सुरक्षित ठेवणे, मतदार यादी अचूक ठेवणे आणि प्रत्येक मतदाराला मतदानाचा हक्क निर्बंधाविना बजावता यावा, हा आहे.

– सचिन अडसूळ, जिल्हा माहिती अधिकारी, कोल्हापूर