मराठवाड्यात विधान परिषद निवडणुकीची रणधुमाळी; चार मतदारसंघांत राजकीय हालचालींना वेग

मराठवाडा ब्युरो : लक्ष्मण चौरे

छत्रपती संभाजीनगर : राज्यातील स्थानिक स्वराज्य संस्था मतदारसंघातून निवडून दिल्या जाणाऱ्या विधान परिषदेच्या १७ जागांसाठी निवडणूक कार्यक्रम जाहीर झाल्यानंतर मराठवाड्यातील राजकीय हालचालींना वेग आला आहे. निवडणुकीच्या तारखा जाहीर होताच विविध पक्षांतील इच्छुक उमेदवारांनी संपर्क मोहिमा, गाठीभेटी आणि पक्षांतर्गत रणनीती आखण्यास सुरुवात केली आहे.

मराठवाड्यातील औरंगाबाद-जालना, परभणी-हिंगोली, नांदेड आणि धाराशिव-बीड-लातूर या चार स्थानिक स्वराज्य संस्था मतदारसंघांमध्ये निवडणूक होणार असून या मतदारसंघांतील राजकीय समीकरणांकडे राज्यातील प्रमुख पक्षांचे विशेष लक्ष लागले आहे.

स्थानिक स्वराज्य संस्थांमधील सदस्यसंख्या, पक्षीय ताकद आणि स्थानिक नेतृत्वाचा प्रभाव या निवडणुकीत महत्त्वाचा ठरणार असल्याने उमेदवारीसाठी इच्छुकांमध्ये चुरस वाढू लागली आहे.

निवडणूक कार्यक्रमानुसार उमेदवारी अर्ज दाखल करण्याची अंतिम मुदत १ जून आहे. त्यानंतर १८ जून रोजी मतदान प्रक्रिया पार पडणार असून २२ जून रोजी मतमोजणी होणार आहे.

निवडणूक कार्यक्रम जाहीर होताच महायुती आणि महाविकास आघाडी या दोन्ही प्रमुख राजकीय आघाड्यांनी मोर्चेबांधणी सुरू केली आहे. विविध मतदारसंघांमध्ये स्थानिक पातळीवरील राजकीय ताकद, नगरसेवक आणि स्थानिक स्वराज्य संस्थांमधील सदस्यांचे संख्याबळ याचा आढावा घेतला जात आहे.

विशेष म्हणजे काही मतदारसंघांमध्ये महायुतीमधील पक्षांमध्येच उमेदवारीवरून स्पर्धा निर्माण होण्याची शक्यता व्यक्त केली जात आहे. भाजप, शिवसेना आणि राष्ट्रवादी काँग्रेसमधील इच्छुक नेते पक्ष नेतृत्वाकडे उमेदवारीसाठी प्रयत्न करत असल्याची चर्चा राजकीय वर्तुळात सुरू आहे.

दुसरीकडे महाविकास आघाडीकडूनही स्थानिक पातळीवरील ताकद आणि मतांचे गणित तपासण्याची प्रक्रिया सुरू झाली आहे. संभाव्य उमेदवारांच्या नावांबाबत पक्षांतर्गत चर्चा सुरू असल्याची माहिती समोर येत आहे.

आगामी काही दिवसांत उमेदवारांची नावे स्पष्ट झाल्यानंतर मराठवाड्यातील राजकीय वातावरण आणखी तापण्याची शक्यता व्यक्त केली जात आहे. स्थानिक स्वराज्य संस्था मतदारसंघातील या निवडणुकांकडे राज्यातील राजकीय समीक्षकांचेही लक्ष लागले आहे.