लोकसंवाद-२०२६’मधून रक्तदानाबाबत नागरिकांच्या शंकांचे निरसन; गडचिरोलीत रक्तदान शिबिराला उत्स्फूर्त प्रतिसाद

प्रतिनिधी : राजेंद्र किलनाके 

गडचिरोली, दि. २२ सप्टेंबर : गणेशोत्सवानिमित्त माहिती व जनसंपर्क विभागाच्या वतीने राबविण्यात येत असलेल्या ‘लोकसंवाद-२०२६’ उपक्रमांतर्गत गडचिरोली जिल्हाधिकारी कार्यालयात रक्तदान आणि रक्तसुरक्षिततेविषयी विशेष जनजागृती कार्यक्रम आयोजित करण्यात आला. याचवेळी ‘सेवा संकल्प अभियान’ अंतर्गत आयोजित रक्तदान शिबिरालाही अधिकारी, कर्मचारी आणि नागरिकांनी उत्स्फूर्त प्रतिसाद दिला.

रक्तदानाबाबत नागरिकांच्या शंकांचे निरसन

जिल्हा सामान्य रुग्णालयाचे रक्त संक्रमण अधिकारी डॉ. नागेश शाहू यांनी यावेळी रक्तदानाचे महत्त्व, रक्तदानासाठी आवश्यक पात्रता, रक्तसंकलनाची प्रक्रिया, रक्ताची सुरक्षितता आणि साठवणूक याबाबत मार्गदर्शन केले.

रक्तदान केल्यानंतर अशक्तपणा येतो का, कोण रक्तदान करू शकते, कोणत्या परिस्थितीत रक्तदान टाळावे, तसेच रक्ताची सुरक्षितता कशा प्रकारे राखली जाते, यासह नागरिकांच्या विविध प्रश्नांचे त्यांनी शास्त्रीय माहितीच्या आधारे निरसन केले.

अनेक रुग्णांसाठी स्वेच्छा रक्तदान महत्त्वाचे

रक्त कृत्रिमरीत्या तयार करता येत नसल्याने गरजू रुग्णांसाठी स्वेच्छा रक्तदानाचे विशेष महत्त्व असल्याचे यावेळी सांगण्यात आले.

अपघातग्रस्त रुग्ण, प्रसूतीदरम्यान रक्ताची गरज असलेल्या माता, थॅलेसेमियाग्रस्त बालके तसेच शस्त्रक्रिया होणारे रुग्ण यांच्यासाठी वेळेवर रक्त उपलब्ध होणे अत्यंत महत्त्वाचे असते. त्यामुळे पात्र नागरिकांनी नियमितपणे स्वेच्छा रक्तदानासाठी पुढाकार घ्यावा, असे आवाहन करण्यात आले.

‘सेवा संकल्प अभियान’अंतर्गत रक्तदान

‘सेवा संकल्प अभियान’अंतर्गत आयोजित रक्तदान शिबिरात जिल्हाधिकारी कार्यालयातील अधिकारी-कर्मचारी तसेच नागरिकांनी स्वेच्छेने रक्तदान केले.

‘लोकसंवाद-२०२६’च्या माध्यमातून केवळ जनजागृती न करता त्याला प्रत्यक्ष सामाजिक कृतीची जोड देण्यात आली. रक्तदानाबाबत समाजातील गैरसमज दूर करून अधिकाधिक पात्र नागरिकांनी स्वेच्छा रक्तदानासाठी पुढे यावे, असे आवाहन यावेळी करण्यात आले.

जनजागृतीसोबतच प्रत्यक्ष रक्तदानाचा उपक्रम राबविल्यामुळे ‘लोकसंवाद-२०२६’चा सामाजिक सहभागाचा संदेश अधिक प्रभावीपणे नागरिकांपर्यंत पोहोचला.