मोबाईल सिमकार्ड व विविध बँक खात्यांचा वापर करून ऑनलाइन सायबर फसवणूक; गोव्यातून ७ आरोपी मुंबई गुन्हे शाखेच्या जाळ्यात

मुंबई ब्यूरो| अनिल सावरे 

मोबाईल सिमकार्ड तसेच विविध बँक खात्यांचा वापर करून ऑनलाइन सायबर फसवणूक करणाऱ्या ७ आरोपींना मुंबई गुन्हे शाखेच्या कक्ष-५च्या पथकाने गोवा येथून अटक केली आहे. या कारवाईत आरोपींकडून मोठ्या प्रमाणात मोबाइल फोन, सिमकार्ड, एटीएम कार्ड, पासबुक आणि लॅपटॉप जप्त करण्यात आले आहेत. 

मुंबई गुन्हे शाखेच्या कक्ष-५ला ११ सप्टेंबर २०२६ रोजी मिळालेल्या गोपनीय माहितीनुसार ऑनलाइन सायबर फसवणुकीप्रकरणी तपास सुरू करण्यात आला होता. या प्रकरणात गुन्हा क्रमांक १२१/२०२६ अन्वये भारतीय न्याय संहितेतील संबंधित कलमांसह माहिती तंत्रज्ञान अधिनियम २००० मधील कलम ६६(ड) अंतर्गत गुन्हा दाखल करण्यात आला आहे. 

बँक खाती उघडून सायबर फसवणुकीसाठी वापर

तपासात आरोपी स्वतः तसेच त्यांच्या साथीदारांच्या नावाने विविध बँकांमध्ये बँक खाती उघडत असल्याचे समोर आले. या बँक खात्यांशी लिंक करण्यासाठी स्वतःच्या तसेच इतरांच्या नावावर विविध सिमकार्ड खरेदी करण्यात येत होती.

बँक खाती उघडल्यानंतर त्यांची पासबुक, एटीएम कार्ड, चेकबुक, सिमकार्ड तसेच संबंधित बँक खात्यांशी निगडित इतर साधने आरोपी स्वतःच्या ताब्यात ठेवत असल्याचे तपासात निष्पन्न झाले. त्यानंतर या साधनांचा वापर ऑनलाइन सायबर फसवणुकीसाठी केला जात असल्याचे पोलिसांच्या तपासातून समोर आले आहे. 

या तपासादरम्यान पोलिसांनी विविध बँकांची ८८ पासबुक, १४३ चेकबुक, १०० एटीएम कार्ड, २४ मोबाइल फोन, १६७ सिमकार्ड आणि २ लॅपटॉप जप्त केले आहेत. 

तांत्रिक विश्लेषणातून आरोपींचा गोव्यात ठावठिकाणा

गुन्ह्याच्या पुढील तपासादरम्यान तांत्रिक विश्लेषण तसेच मानवी कौशल्याच्या आधारे आरोपींचा शोध घेण्यात आला. तपासातून आरोपी गोवा राज्यातील वारका येथे एका रिसॉर्टमधील व्हिलामध्ये असल्याची माहिती पोलिसांना मिळाली.

त्यानुसार १३ सप्टेंबर २०२६ रोजी मुंबई गुन्हे शाखेच्या पथकाने संबंधित ठिकाणी कारवाई करून सायबर फसवणूक ऑपरेट करणाऱ्या ७ आरोपींना अटक केली. 

मोबाइल, सिमकार्ड, एटीएम आणि लॅपटॉप जप्त

अटक करण्यात आलेल्या आरोपींकडून विविध कंपन्यांचे ५९ मोबाइल फोन, वेगवेगळ्या कंपन्यांचे एकूण १९ सिमकार्ड, ९ लॅपटॉप, ५१ एटीएम कार्ड, १२ पासबुक आणि इतर साहित्य हस्तगत करण्यात आले आहे. 

तपासात आरोपींनी आर्थिक फसवणुकीची रक्कम हस्तांतरित करण्यासाठी स्वतःचे अॅप्लिकेशन तयार करून त्याचा वापर केल्याचे निष्पन्न झाले आहे. या अॅप्लिकेशनच्या माध्यमातून आर्थिक फसवणुकीची रक्कम हाताळली जात असल्याचा पोलिसांचा तपास आहे. 

२८ सप्टेंबरपर्यंत पोलीस कोठडी

अटक करण्यात आलेल्या आरोपींना न्यायालयासमोर हजर करण्यात आले. न्यायालयाने आरोपींना २८ सप्टेंबर २०२६ रोजीपर्यंत पोलीस कोठडी रिमांड मंजूर केला आहे. प्रकरणाचा पुढील तपास मुंबई गुन्हे शाखेकडून सुरू आहे. 

वरिष्ठ अधिकाऱ्यांच्या मार्गदर्शनाखाली कारवाई

ही कारवाई मुंबईचे पोलीस आयुक्त देवेन भारती, पोलीस सहआयुक्त (गुन्हे) अनिल कुंभारे, अपर पोलीस आयुक्त (गुन्हे) कृष्णकांत उपाध्याय, पोलीस उपायुक्त (प्रकटीकरण) राज तिलक रौशन आणि सहायक पोलीस आयुक्त (मध्य) सदानंद राणे यांच्या मार्गदर्शनाखाली करण्यात आली.

कक्ष-५च्या वपोनि. रोहिणी पोतदार, पोनि. धराडे, पोनि. निलतांबडे, सपोनि. धनराज चौधरी, सपोनि. सचिन बाराते, पो.उ.नि. इंगळे, पो.उ.नि. नितीन पालांडे, पो.उ.नि. अजय पोवार, पो.उ.नि. महेश अंजगावकर, पो.उ.नि. अंकुश न्यायविंगुर्ज, सपो. धाडगे, निरभवणे, पो.ह. तानाजी पाटील, मुलाणी, काळे, लोखंडे, बजरगोडे आणि पोशि. भाऊसाहेब पवार यांनी ही कारवाई केली. 

सायबर फसवणुकीसाठी बँक खाते, एटीएम कार्ड, सिमकार्ड किंवा इतर बँकिंग साधनांचा गैरवापर होत असल्याचे या कारवाईतून समोर आले आहे. त्यामुळे नागरिकांनी आपल्या बँक खात्याची माहिती, एटीएम/डेबिट कार्ड, सिमकार्ड आणि डिजिटल व्यवहाराशी संबंधित माहिती अनोळखी व्यक्तींना देताना विशेष काळजी घेणे आवश्यक आहे.