ऊसतोड कामगारांच्या प्रश्नांवर सकारात्मक निर्णयासाठी मागण्या; बीडमध्ये मुला-मुलींसाठी शासकीय वसतिगृहाचे लोकार्पण

मराठवाडा ब्युरो : लक्ष्मण चौरे

बीड : ऊसतोड कामगारांच्या मुला-मुलींना शिक्षणासाठी आवश्यक सुविधा उपलब्ध करून देण्याच्या उद्देशाने बीड शहरात उभारण्यात आलेल्या संत भगवानबाबा शासकीय वसतिगृहाचे लोकार्पण राज्याचे उपमुख्यमंत्री तथा बीड जिल्ह्याचे पालकमंत्री सुनेत्रावहिनी अजितदादा पवार यांच्या हस्ते करण्यात आले. यावेळी राज्याचे सामाजिक न्याय मंत्री ना. संजय शिरसाट प्रमुख उपस्थित होते.

हे वसतिगृह स्व. गोपीनाथराव मुंडे ऊसतोड कामगार कल्याण महामंडळांतर्गत संत भगवानबाबा शासकीय वसतिगृह योजनेतून उभारण्यात आले आहे. या वसतिगृहामुळे ऊसतोड कामगारांच्या पाल्यांना शिक्षणासाठी सुरक्षित निवास आणि आवश्यक शैक्षणिक सुविधा उपलब्ध होणार आहेत.

ऊसतोड कामगारांच्या विविध प्रश्नांवर सविस्तर आढावा

दरम्यान, ऊसतोड कामगारांच्या विविध समस्या, तसेच शासनाच्या नवीन योजना व धोरणांच्या अनुषंगाने बीड जिल्हाधिकारी कार्यालयात आढावा बैठक घेण्यात आली. या बैठकीत कामगारांच्या विविध मागण्यांवर सविस्तर चर्चा करण्यात आली.

ऊसतोड कामगारांना अपघाताच्या प्रसंगी आर्थिक संरक्षण मिळावे, यासाठी महामंडळामार्फत सुरू करण्यात आलेल्या अपघात सानुग्रह अनुदान योजनेचा लाभ महाराष्ट्राबाहेर जाऊन ऊसतोडणी करणाऱ्या कामगारांनाही मिळावा, अशी महत्त्वाची मागणी यावेळी करण्यात आली.

या मागणीला सामाजिक न्याय मंत्री ना. संजय शिरसाट यांनी सकारात्मक प्रतिसाद देत याबाबत लवकरच निर्णय घेण्याचे आश्वासन दिले.

बॅटरी ऑपरेटेड कोयता आणि सेफ्टी किट देण्याची मागणी

ऊसतोड कामगारांचे श्रम आणि शारीरिक कष्ट कमी करण्यासाठी आधुनिक साधनांचा वापर वाढविण्याची गरज बैठकीत व्यक्त करण्यात आली. त्यासाठी बॅटरी ऑपरेटेड कोयत्यासह आधुनिक साहित्य आणि सेफ्टी किट उपलब्ध करून देण्याची मागणी करण्यात आली.

तसेच आगामी ऊसतोडणी हंगाम सुरू होण्यापूर्वी जिल्ह्यातील उर्वरित ऊसतोड कामगारांची नोंदणी पूर्ण करावी, अशी मागणीही करण्यात आली.

बीडमधील उर्वरित वसतिगृहांचे काम तातडीने पूर्ण करण्याची मागणी

ऊसतोड कामगारांच्या पाल्यांच्या शिक्षणाला चालना देण्यासाठी बीड जिल्ह्यातील उर्वरित प्रस्तावित वसतिगृहांची उभारणीही लवकरात लवकर पूर्ण करावी, अशी मागणी बैठकीत करण्यात आली.

यासोबतच ऊसतोड कामगारांच्या मुला-मुलींना उच्च शिक्षणासाठी तसेच स्पर्धा परीक्षांच्या तयारीसाठी विशेष सुविधा आणि मार्गदर्शन उपलब्ध करून द्यावे, अशी मागणी करण्यात आली.

मुंबई, पुणे, नागपूरसह मोठ्या शहरांत ५०० विद्यार्थी क्षमतेची वसतिगृहे

ऊसतोड कामगारांचे अनेक पाल्य शिक्षणासाठी मोठ्या शहरांमध्ये जातात. त्यामुळे छत्रपती संभाजीनगर, पुणे, मुंबई आणि नागपूर यांसारख्या प्रमुख शहरांमध्ये ऊसतोड कामगारांच्या मुला-मुलींसाठी प्रत्येकी सुमारे ५०० विद्यार्थी क्षमतेची स्वतंत्र वसतिगृहे उभारावीत, अशी महत्त्वपूर्ण मागणीही यावेळी करण्यात आली.

या वसतिगृहांमुळे आर्थिकदृष्ट्या अडचणीत असलेल्या ऊसतोड कामगारांच्या पाल्यांना मोठ्या शहरांमध्ये उच्च शिक्षण घेणे अधिक सुलभ होईल, अशी अपेक्षा व्यक्त करण्यात आली.

शैक्षणिक व सामाजिक प्रगतीसाठी शासन सकारात्मक निर्णय घेणार

ऊसतोड कामगार आणि त्यांच्या पाल्यांच्या शैक्षणिक, सामाजिक आणि आर्थिक प्रगतीसाठी मांडण्यात आलेल्या विविध मागण्यांवर शासन सकारात्मक निर्णय घेईल, असा विश्वास यावेळी व्यक्त करण्यात आला.

बीडमध्ये संत भगवानबाबा शासकीय वसतिगृह सुरू झाल्यामुळे ऊसतोड कामगारांच्या पाल्यांच्या शिक्षणाला नवी दिशा मिळणार असून, राज्यभरातील ऊसतोड कामगारांच्या कल्याणासाठी अधिक प्रभावी उपाययोजना राबविण्याच्या अपेक्षाही या बैठकीत व्यक्त करण्यात आल्या.