भारतातील एकमेव पुरुषोत्तमपुरी मंदिरात अधिक मासानिमित्त भक्तांची मोठी गर्दी; गोदावरी तीरावर भक्तिमय वातावरण

बीड | प्रतिनिधी : लक्ष्मण चौरे

बीड जिल्ह्यातील माजलगाव तालुक्यात गोदावरी नदीच्या पवित्र तीरावर वसलेले पुरुषोत्तमपुरी देवस्थान हे भारतातील एकमेव पुरुषोत्तम भगवान मंदिर म्हणून ओळखले जाते. अधिक मासाच्या पार्श्वभूमीवर या मंदिरात राज्यासह देशाच्या विविध भागांतून भाविक मोठ्या संख्येने दर्शनासाठी येत असून संपूर्ण परिसर भक्तिमय वातावरणाने भारावून गेला आहे.

हिंदू धर्मात अधिक मासाला विशेष धार्मिक महत्त्व आहे. या महिन्याला पुरुषोत्तम मास, मलमास किंवा धोंड्याचा महिना असेही संबोधले जाते. हिंदू पंचांगानुसार चांद्र वर्ष आणि सौर वर्ष यांतील दिवसांचा फरक भरून काढण्यासाठी दर सुमारे ३२ महिन्यांनी एक अतिरिक्त महिना जोडला जातो. यालाच अधिक मास म्हटले जाते.

पौराणिक मान्यतेनुसार, या अतिरिक्त महिन्याचा कोणत्याही देवतेने स्वीकार केला नव्हता. त्यामुळे हा महिना भगवान भगवान विष्णू यांच्या शरण गेला. त्याच्या भक्तीने प्रसन्न होऊन भगवान विष्णूंनी या महिन्याला स्वतःचे 'पुरुषोत्तम' हे नाव दिले. तेव्हापासून अधिक मासाला पुरुषोत्तम मास म्हणून ओळखले जाते आणि या काळात विष्णू पूजेला विशेष महत्त्व प्राप्त झाले आहे.

गोदावरी नदीच्या शांत आणि पवित्र तीरावर वसलेले पुरुषोत्तमपुरी देवस्थान अनेक शतकांपासून भाविकांच्या श्रद्धेचे केंद्र राहिले आहे. अधिक मासात येथे भगवान विष्णूंची विशेष पूजा, अभिषेक, विष्णुसहस्रनाम पठण, हरिनाम सप्ताह, भजन-कीर्तन, प्रवचन आणि महाप्रसादाचे आयोजन करण्यात येत आहे. त्यामुळे मंदिर परिसरात दिवसभर भाविकांची मोठी वर्दळ पाहायला मिळत आहे.

स्थानिकांच्या मते, अधिक मासात पुरुषोत्तम भगवानांचे दर्शन, जप-तप, दानधर्म आणि गोदावरी नदी स्नान केल्यास विशेष पुण्यप्राप्ती होते. यामुळे दररोज हजारो भाविक मंदिरात दर्शनासाठी हजेरी लावत आहेत.

देवस्थान समितीच्या वतीने भाविकांसाठी पिण्याचे पाणी, स्वच्छता, दर्शनरांग व्यवस्थापन तसेच इतर आवश्यक सुविधा उपलब्ध करून देण्यात आल्या आहेत. अधिक मासाच्या निमित्ताने भारतातील एकमेव पुरुषोत्तमपुरी मंदिर पुन्हा एकदा श्रद्धा, भक्ती आणि आध्यात्मिकतेचे केंद्र बनले असून गोदावरी तीरावरील हे पवित्र देवस्थान भाविकांना आकर्षित करत आहे.