जिंतूर-कनेरगाव नाका येथे क्रांतिकारी शेतकरी संघटनेचा टायर जाळून भव्य रास्ता रोको आंदोलन

हिंगोली | प्रतिनिधी : भगवानराव मस्के

शेतकऱ्यांच्या विविध प्रलंबित मागण्यांसाठी क्रांतिकारी शेतकरी संघटनेच्या वतीने जिंतूर-कनेरगाव नाका महामार्गावर टायर जाळून भव्य रास्ता रोको आंदोलन करण्यात आले. या आंदोलनामुळे परिसरातील वाहतूक काही काळ विस्कळीत झाली असून प्रशासनाचे लक्ष वेधण्यात आंदोलनकर्त्यांना यश आले.

शेतकऱ्यांची सरसकट कर्जमाफी, डीएपी खताचा तात्काळ पुरवठा, विहीर व गाय गोठा अनुदानाची थकीत बिले अदा करणे तसेच घरकुल लाभार्थ्यांचे रखडलेले हप्ते तातडीने जमा करणे या प्रमुख मागण्यांसाठी हे आंदोलन छेडण्यात आले होते.

सुमारे तीन तास चाललेल्या या आंदोलनस्थळी सेनगावचे नायब तहसीलदार सरोदे साहेब, हिंगोलीचे गुण नियंत्रण अधिकारी काळे साहेब तसेच पंचायत समितीचे गट विस्तार अधिकारी देशमुख साहेब यांनी भेट देऊन आंदोलनकर्त्यांशी चर्चा केली. संबंधित मागण्यांबाबत सकारात्मक कार्यवाही करण्याचे लेखी आश्वासन अधिकाऱ्यांनी दिले.

गोरेगाव पोलीस स्टेशनचे ठाणेदार भिंगारे साहेब यांच्या मध्यस्थीने प्रशासन आणि आंदोलनकर्त्यांमध्ये समन्वय साधण्यात आला. त्यानंतर रास्ता रोको आंदोलन स्थगित करण्यात आले.

यावेळी क्रांतिकारी शेतकरी संघटनेच्या पदाधिकाऱ्यांनी प्रशासनाला इशारा देत सांगितले की, शेतकरी आणि सर्वसामान्य नागरिकांच्या प्रश्नांवर तातडीने कार्यवाही न झाल्यास मंत्रालय, मुंबई येथे तीव्र आंदोलन छेडण्यात येईल.

या आंदोलनात गजानन कावरखे, नामदेव पतंगे, प्रवीण मते, श्याम मते, विठ्ठल वायचाळ, सखाराम भाकरे, अशोक जयस्वाल, दामोदर घुमणार, बबन कांबळे, विशाल पोळ, राहुल कावरखे, मनोहर सावके, संदीप मानमोठे यांच्यासह मोठ्या संख्येने शेतकरी सहभागी झाले होते.