विस्थापित शेतकऱ्याचा मुलगा बनला महाराष्ट्र पोलीस; जिद्द आणि मेहनतीने साकारले स्वप्न

हिंगोली प्रतिनिधी : भगवानराव मस्के

हिंगोली आणि यवतमाळ जिल्ह्यांच्या सीमेवर १९८० साली इसापूर धरणाची निर्मिती झाली. या धरणाच्या निर्मितीमुळे परिसरातील अनेक गावे विस्थापित झाली. त्यामध्ये खरवड गावाचाही समावेश होता. गावातील अनेक शेतकऱ्यांची वडिलोपार्जित शेती धरणाच्या पाणलोट क्षेत्रात गेली. मात्र, शासनाकडून अपेक्षित मोबदला न मिळाल्याने अनेक विस्थापित कुटुंबांना आर्थिक संकटाचा सामना करावा लागला.

अशाच एका विस्थापित आणि अल्पभूधारक शेतकरी कुटुंबातील मारोती सुभाषराव मस्के यांनी प्रतिकूल परिस्थितीवर मात करत महाराष्ट्र पोलीस दलात स्थान मिळवले आहे. कठोर परिश्रम, चिकाटी आणि सातत्यपूर्ण प्रयत्नांच्या बळावर २०२६ मध्ये त्यांची नाशिक ग्रामीण पोलीस दलात निवड झाली असून, त्यांच्या यशामुळे खरवड गावासह परिसरात आनंदाचे वातावरण आहे.

लहानपणापासूनच मारोती यांनी आपल्या वडिलांचा शेतीतील संघर्ष जवळून अनुभवला. शेतीतून पुरेसे उत्पन्न मिळत नसल्याने कुटुंबाचा उदरनिर्वाह शेतीसोबतच शेळीपालनावरही अवलंबून होता. आर्थिक परिस्थिती हलाखीची असतानाही त्यांनी शिक्षणाची वाट सोडली नाही. शिक्षण घेत असतानाच ते वडिलांना शेतीच्या कामात मदत करत होते.

अत्यंत प्रतिकूल परिस्थितीतही मारोती यांनी पोलीस होण्याचे स्वप्न कायम जिवंत ठेवले. पोलीस भरतीच्या पहिल्या दोन प्रयत्नांत त्यांना अपयश आले. मात्र, या अपयशाने खचून न जाता त्यांनी अधिक मेहनत घेण्याचा निर्धार केला. सातत्याने अभ्यास करणे, गावात नियमित मैदानी सराव करणे, प्रश्नपत्रिकांचा सराव करणे आणि स्वतःच्या तयारीतील उणिवांवर काम करणे, असा त्यांचा संघर्ष सुरू राहिला.

या प्रवासात कळमनुरी येथील प्रा. भगवानराव मस्के यांचे स्पर्धा परीक्षेसंदर्भातील मार्गदर्शन त्यांना लाभले. योग्य मार्गदर्शन, नियमित सराव आणि ध्येयाप्रती असलेल्या दृढ निश्चयामुळे मारोती यांनी आपल्या स्वप्नाकडे यशस्वी वाटचाल केली.

अखेर जिद्द, मेहनत आणि चिकाटीच्या बळावर मारोती मस्के यांनी महाराष्ट्र पोलीस दलात स्थान मिळवले. विस्थापित शेतकरी कुटुंबातील युवकाने प्रतिकूल परिस्थितीवर मात करून मिळवलेले हे यश अनेक तरुणांसाठी प्रेरणादायी ठरत आहे.

मारोती मस्के यांच्या यशाबद्दल खरवड गावातील ग्रामस्थांनी त्यांचा तसेच त्यांच्या आई-वडिलांचा सत्कार करून अभिनंदन केले. यावेळी प्रा. भगवानराव मस्के आणि प्रा. अक्षय चंदेल यांनीही त्यांचा सन्मान करत पुढील वाटचालीस शुभेच्छा दिल्या.

परिस्थिती कितीही कठीण असली तरी सातत्यपूर्ण प्रयत्न, योग्य मार्गदर्शन आणि ध्येयाप्रती असलेली निष्ठा यामुळे यश मिळवता येते, हे मारोती मस्के यांच्या यशोगाथेतून पुन्हा एकदा अधोरेखित झाले आहे.