शेतकरी, युवक, महिला आणि तंत्रज्ञानाच्या बळावर महाराष्ट्र देशाला महासत्ता बनवेल – उपमुख्यमंत्री एकनाथ शिंदे

प्रतिनिधी:  नरेश शिंदे 

८० व्या स्वातंत्र्यदिनानिमित्त ठाण्यात मुख्य शासकीय ध्वजारोहण उत्साहात; ठाणे अंतर्गत मेट्रो, बोरिवली बोगदा आणि अत्याधुनिक सुविधांद्वारे जिल्ह्याचा कायापालट

ठाणे, दि. 15 : सक्षम शेतकरी, कर्तृत्ववान युवक, सशक्त महिला आणि आनंदी नागरिक हीच विकासाची खरी व्याख्या असून शेतकऱ्यांचा सन्मान, कामगारांचा घाम, महिलांचा आत्मविश्वास, युवकांची ऊर्जा आणि आधुनिक तंत्रज्ञानाची ताकद एकत्र आणून महाराष्ट्रासह भारताला जगातील सर्वोत्कृष्ट राष्ट्र बनवू, असा ठाम विश्वास राज्याचे उपमुख्यमंत्री एकनाथ शिंदे यांनी व्यक्त केला.

भारतीय स्वातंत्र्याच्या 80 व्या स्वातंत्र्यदिनानिमित्त ठाणे जिल्हाधिकारी कार्यालयाच्या आवारात आयोजित मुख्य शासकीय ध्वजारोहण सोहळ्यात ते बोलत होते. यावेळी उपमुख्यमंत्री एकनाथ शिंदे यांच्या हस्ते ध्वजारोहण करण्यात आले.

या ऐतिहासिक सोहळ्यास खासदार नरेश म्हस्के, आमदार रवींद्र फाटक, आमदार संजय केळकर, आमदार माधवी नाईक आणि महापौर शर्मिला पिंपोळकर यांच्यासह जिल्हा प्रशासनातील अधिकारी-कर्मचारी, नागरिक आणि विद्यार्थी मोठ्या संख्येने उपस्थित होते.

स्वातंत्र्यवीरांना अभिवादन

समारंभाच्या सुरुवातीला उपमुख्यमंत्री एकनाथ शिंदे यांनी महाराष्ट्राचे आराध्य दैवत छत्रपती शिवाजी महाराज, स्वराज्यरक्षक धर्मवीर छत्रपती संभाजी महाराज, राजर्षी छत्रपती शाहू महाराज, महात्मा जोतीराव फुले, क्रांतिज्योती सावित्रीबाई फुले, पुण्यश्लोक अहिल्यादेवी होळकर आणि भारतरत्न डॉ. बाबासाहेब आंबेडकर यांना विनम्र अभिवादन केले.

स्वातंत्र्यलढ्यात देशासाठी प्राणांचे बलिदान देणाऱ्या सर्व ज्ञात-अज्ञात स्वातंत्र्यवीरांच्या त्यागाचे स्मरण करून त्यांनी राज्यातील आणि देशातील जनतेला स्वातंत्र्यदिनाच्या शुभेच्छा दिल्या.

भारताची विविध क्षेत्रांत गगनभरारी

उपमुख्यमंत्री शिंदे यांनी आपल्या भाषणात पंतप्रधान नरेंद्र मोदी यांच्या नेतृत्वाखाली गेल्या 12 वर्षांत भारताने अवकाश संशोधन, डिजिटल तंत्रज्ञान, ऊर्जा स्वावलंबन आणि संरक्षण क्षेत्रात मोठी प्रगती केल्याचे सांगितले.

‘ब्रह्मोस’ क्षेपणास्त्रासारख्या तंत्रज्ञानामुळे संरक्षण क्षेत्रातील आत्मनिर्भरतेला बळ मिळाले असून, झिरो टॉलरन्स धोरणामुळे नक्षलवादाचा बीमोड करण्यास यश आले आहे. शांतता, सुरक्षा आणि विकास हीच देशाच्या प्रगतीची त्रिसूत्री असल्याचे त्यांनी नमूद केले.

या राष्ट्रीय विकासाच्या प्रवासात महाराष्ट्राने सातत्याने आघाडी घेतली असून राज्य ट्रिलियन डॉलरच्या अर्थव्यवस्थेकडे वेगाने वाटचाल करत असल्याचा विश्वासही त्यांनी व्यक्त केला.

शेतकऱ्यांच्या कल्याणाला प्राधान्य

बळीराजाच्या कल्याणाचा पुनरुच्चार करताना उपमुख्यमंत्री शिंदे म्हणाले की, राज्याच्या तिजोरीवर पहिला हक्क शेतकऱ्यांचा आहे. शासनाने ‘पुण्यश्लोक अहिल्यादेवी होळकर शेतकरी कर्जमुक्ती योजना 2026’ लागू केली असून शेतकऱ्यांना आर्थिकदृष्ट्या सक्षम करण्यासाठी शासन कटिबद्ध असल्याचे त्यांनी सांगितले.

ठाणे जिल्ह्याच्या विकासाचा नवा अध्याय

ठाणे जिल्ह्याच्या विकासासाठी सुरू असलेल्या आणि प्रस्तावित महत्त्वाच्या प्रकल्पांची माहिती देताना उपमुख्यमंत्री शिंदे यांनी ठाणे अंतर्गत मेट्रो आणि ठाणे-बोरीवली दुहेरी बोगदा हे दोन्ही प्रकल्प ठाणे जिल्ह्याच्या विकासासाठी ‘गेमचेंजर’ ठरणार असल्याचे सांगितले.

ठाण्याच्या बाजूने दुसऱ्या बोगद्याचे कामही वेगाने सुरू झाले आहे. ठाणे शहरासाठी 302 कोटी रुपये, तर अंबरनाथसाठी 150 कोटी रुपयांचा मलनिःसारण प्रकल्प मंजूर करण्यात आला आहे.

गोरगरीब आणि मध्यमवर्गीय नागरिकांना परवडणारी पक्की घरे उपलब्ध करून देत संपूर्ण महाराष्ट्र झोपडपट्टीमुक्त करण्याचा शासनाचा संकल्प असल्याचेही त्यांनी सांगितले.

900 खाटांचे अत्याधुनिक सिव्हिल हॉस्पिटल

ठाणे शहरातील आरोग्य सुविधांना मोठी चालना देण्यासाठी 900 खाटांचे अत्याधुनिक सिव्हिल हॉस्पिटल उभारण्यात येत असून हे राज्यातील मोठ्या अत्याधुनिक रुग्णालयांपैकी एक ठरणार आहे. हे रुग्णालय याच वर्षात सेवेत दाखल करण्याचे निर्देश देण्यात आले असल्याचे उपमुख्यमंत्र्यांनी सांगितले.

AI कॅमेऱ्यांमुळे ठाणे पोलिसांची सुरक्षा यंत्रणा अधिक सक्षम

नागरिकांच्या सुरक्षेसाठी ठाणे पोलीस आयुक्तालय क्षेत्रात 6 हजार 59 कृत्रिम बुद्धिमत्ता (AI) सक्षम कॅमेरे बसविण्यात येत आहेत. ज्येष्ठ नागरिकांसाठी ‘आधारवड’ ॲप, तर पोलीस आणि नागरिकांमधील संवाद वाढविण्यासाठी ‘पोलीस मित्र’ ॲप कार्यान्वित करण्यात आले आहे.

नशामुक्त भारत अभियानांतर्गत ठाणे पोलिसांनी 40 कोटी रुपयांचे अमली पदार्थ नष्ट करून गुन्हेगारांविरोधात कठोर कारवाई केली असल्याची माहितीही त्यांनी दिली.

युवकांनी स्टार्टअप आणि AI क्षेत्रात योगदान द्यावे

आजची ‘जेन झी’ पिढी स्मार्ट, टेक्नो-सॅव्ही आणि इनोव्हेशन करणारी असून हीच देशाची खरी सुपरपॉवर असल्याचे उपमुख्यमंत्री शिंदे यांनी सांगितले. युवकांनी स्टार्टअप्स, ग्रीन टेक्नॉलॉजी आणि AI सोल्यूशन्सच्या माध्यमातून देशाच्या विकासात योगदान द्यावे, असे आवाहन त्यांनी केले.

‘महा वॉकेथॉन – वॉक फॉर वॉटर’च्या लोगोचे अनावरण

स्वातंत्र्यदिन सोहळ्यात मृद व जलसंधारण विभागाच्या वतीने आयोजित करण्यात येणाऱ्या ‘महा वॉकेथॉन – वॉक फॉर वॉटर’ आणि ‘मृद व जलसंधारण रील्स स्पर्धे’च्या अधिकृत लोगोचे अनावरण उपमुख्यमंत्री एकनाथ शिंदे यांच्या हस्ते करण्यात आले.

यावेळी उपस्थितांना माती आणि पाण्याचे संवर्धन करण्यासाठी, जलसंधारण मोहिमेत सक्रिय सहभाग घेण्यासाठी आणि ‘पाणी अडवा, पाणी जिरवा’ हा संदेश घराघरापर्यंत पोहोचविण्यासाठी सामूहिक शपथ देण्यात आली.

‘स्त्री दर्पण’ ई-बुकचे प्रकाशन

जिल्हा माहिती कार्यालय, ठाणे आणि दैनिक द ग्लोबल टाइम्स यांच्या संयुक्त विद्यमाने तयार करण्यात आलेल्या महिला सक्षमीकरण आणि महिला यशोगाथांवरील ‘स्त्री दर्पण’ या ई-बुकचे प्रकाशन उपमुख्यमंत्री तथा पालकमंत्री एकनाथ शिंदे आणि मान्यवरांच्या हस्ते करण्यात आले.

ही पुस्तिका जिल्हा माहिती कार्यालयाच्या समाजमाध्यमांवर नागरिकांसाठी विनामूल्य उपलब्ध करून देण्यात येणार आहे.

गुणवंत अधिकारी-कर्मचारी आणि विद्यार्थ्यांचा गौरव

स्वातंत्र्यदिनाच्या या सोहळ्याच्या निमित्ताने जिल्हा प्रशासनातील उत्कृष्ट कार्य करणाऱ्या अधिकारी आणि कर्मचाऱ्यांचा तसेच शैक्षणिक क्षेत्रात उल्लेखनीय कामगिरी करणाऱ्या विद्यार्थ्यांचा विशेष सत्कार उपमुख्यमंत्री एकनाथ शिंदे यांच्या हस्ते करण्यात आला.

स्वातंत्र्यदिनाच्या सोहळ्यातून शेतकरी, कामगार, महिला आणि युवकांच्या सामर्थ्याला आधुनिक तंत्रज्ञानाची जोड देऊन विकसित महाराष्ट्र घडविण्याचा संकल्प व्यक्त करण्यात आला. ठाणे जिल्ह्यातील पायाभूत सुविधा, आरोग्य, वाहतूक, सुरक्षा आणि पर्यावरण क्षेत्रातील प्रकल्पांमुळे जिल्ह्याच्या विकासाला आगामी काळात आणखी वेग मिळणार असल्याचे यावेळी अधोरेखित करण्यात आले.