नॅचरल शुगरच्या ११व्या गळीत हंगामाचा शुभारंभ; ७.५० लाख टन ऊस गाळपाचे उद्दिष्ट

रवि लक्ष्मण वाघमारे | जिल्हा प्रतिनिधी, यवतमाळ :

नॅचरल शुगर अँड अलाईड इंडस्ट्रीज लि.च्या युनिट क्रमांक २, गुंज-सवना येथे ११व्या गळीत हंगामाच्या बॉयलर अग्निप्रदीपन समारंभाचा उत्साहात शुभारंभ करण्यात आला. ऊस तोडणी आणि वाहतुकीमध्ये उल्लेखनीय कामगिरी करणारे शेतकरी-कंत्राटदार सुदर्शन धोंडबाराव शिंदे व त्यांच्या पत्नी सौ. रूपाली शिंदे यांच्या हस्ते बॉयलर अग्निप्रदीपन विधी पार पडला.

कार्यक्रमाच्या अध्यक्षस्थानी कृषीरत्न बी. बी. ठोंबरे होते. यावेळी संचालक पांडुरंगजी आवाड, प्रवर्तक श्रीपाद ठोंबरे, एनएसआय मल्टी स्टेटचे संचालक बाळासाहेब टेळे यांच्यासह परिसरातील शेतकरी, मान्यवर, अधिकारी आणि कर्मचारी मोठ्या संख्येने उपस्थित होते.

मागील हंगामात ५.५५ लाख मेट्रिक टन गाळप

कार्यक्रमात बी. बी. ठोंबरे यांनी कारखान्याच्या मागील वाटचालीचा आढावा घेतला. मागील गळीत हंगामात ५ लाख ५५ हजार मेट्रिक टन ऊस गाळपाचा उच्चांक नोंदविण्यात आल्याचे त्यांनी सांगितले.

शेतकऱ्यांना एफआरपीनुसार ऊस दर थेट अदा करण्यात आल्याचेही त्यांनी स्पष्ट केले.

यंदा ७.५० लाख मेट्रिक टन गाळपाचे उद्दिष्ट

यंदाच्या गळीत हंगामासाठी कारखान्याने ७ लाख ५० हजार मेट्रिक टन ऊस गाळपाचे उद्दिष्ट निश्चित केले आहे. त्यासाठी ९,९९४ हेक्टर क्षेत्रावरील उसाची नोंदणी झाल्याची माहिती कार्यक्रमात देण्यात आली.

दररोज किमान ५,५०० मेट्रिक टन ऊस गाळप करण्याचे नियोजन करण्यात आले असून, ऊस तोडणी आणि वाहतुकीची यंत्रणाही सज्ज करण्यात आली आहे.

ऑक्टोबरच्या पहिल्या आठवड्यात गळीत हंगाम सुरू होणार

युनिट क्रमांक २चा गळीत हंगाम ऑक्टोबर २०२६च्या पहिल्या आठवड्यात सुरू होणार असल्याची माहिती यावेळी देण्यात आली. कारखान्याची गाळप क्षमता वाढल्याने शेतकऱ्यांनी मोठ्या प्रमाणात ऊस लागवड करावी, असे आवाहन बी. बी. ठोंबरे यांनी केले.

शेतकऱ्यांना ऊस लागवडीसाठी प्रोत्साहन देताना कारखान्याकडून सुधारित जातींची प्रमाणित रोपे तसेच ‘नॅचरल ऑरगॅनिक फर्टिलायझर’ सेंद्रिय खत सवलतीच्या दरात उपलब्ध करून दिले जात असल्याचेही त्यांनी सांगितले.

नूतन बायो-सीएनजी प्रकल्पाचा शुभारंभ

या कार्यक्रमादरम्यान युनिट क्रमांक २ मधील नूतन बायो-सीएनजी प्रकल्पाचा शुभारंभ मान्यवरांच्या हस्ते करण्यात आला. साखर उद्योगाशी संबंधित उपक्रमांसोबतच पर्यायी ऊर्जा निर्मितीच्या दिशेने हा प्रकल्प महत्त्वाचा असल्याचे कार्यक्रमात नमूद करण्यात आले.

शेतकरी, अधिकारी आणि कर्मचाऱ्यांची उपस्थिती

कार्यक्रमास माजी संचालक सिताराम ठाकरे, गोविंदराव शिंदे (वेणी), टिकाराम कदम (कलगाव), देविदास पाटील (सारहिकन्ही), तानाजी जाधव, नानाराव पुंडे, सुनील भवानकर यांच्यासह परिसरातील शेतकरी, अधिकारी आणि कर्मचारी मोठ्या संख्येने उपस्थित होते.

नवीन गळीत हंगामासाठी ऊस तोडणी, वाहतूक आणि गाळप यंत्रणा सज्ज करण्यात आली असून, यंदाचे ७.५० लाख मेट्रिक टन गाळपाचे उद्दिष्ट साध्य करण्यासाठी कारखाना व्यवस्थापनाकडून नियोजन करण्यात आले आहे.