प्रा. संजय पोपट शिंदे यांना सावित्रीबाई फुले पुणे विद्यापीठाची पीएच.डी. पदवी; ‘एज्युकेशन ४.०’ तंत्रज्ञानावर संशोधन

प्रतिनिधी: रोहन सोनाळे 

पुणे : माईर्स एम.आय.टी. संत ज्ञानेश्वर बी.एड. महाविद्यालय, आळंदी (देवाची) येथील शिक्षणशास्त्र विभागाचे सहायक प्राध्यापक प्रा. संजय पोपट शिंदे यांनी सावित्रीबाई फुले पुणे विद्यापीठाची विद्यावाचस्पती (पीएच.डी.) पदवी संपादन केली आहे. शिक्षण क्षेत्रातील तंत्रज्ञानाचा वाढता वापर आणि शिक्षक प्रशिक्षणार्थ्यांच्या तांत्रिक कौशल्यांच्या विकासाच्या दृष्टीने त्यांचे संशोधन महत्त्वपूर्ण मानले जात आहे.

प्रा. संजय शिंदे यांनी शिक्षणशास्त्र (आंतरविद्याशाखा) या विद्याशाखेतून आपले पीएच.डी. संशोधन पूर्ण केले. त्यांच्या संशोधनाचा विषय “Programme Based on Education 4.0 Technology for Developing Technological Skills of Teacher Trainees” असा असून, शिक्षक प्रशिक्षणार्थ्यांच्या तांत्रिक कौशल्यांच्या विकासासाठी एज्युकेशन ४.० तंत्रज्ञानावर आधारित कार्यक्रम विकसित करण्यावर त्यांनी संशोधन केले आहे.

या संशोधनासाठी त्यांना प्राचार्य डॉ. सुरेंद्र चंद्रकांत हेरकळ यांचे बहुमूल्य मार्गदर्शन लाभले. शिक्षणाच्या बदलत्या स्वरूपात तंत्रज्ञानाचा प्रभाव वाढत असताना शिक्षक प्रशिक्षणार्थ्यांमध्ये आवश्यक तांत्रिक कौशल्ये विकसित करण्याच्या दृष्टीने या संशोधनातून महत्त्वपूर्ण शैक्षणिक दृष्टिकोन मांडण्यात आला आहे.

एज्युकेशन ४.० या संकल्पनेच्या माध्यमातून आधुनिक तंत्रज्ञान आणि शिक्षण प्रक्रिया यांचा प्रभावी समन्वय साधण्यावर भर दिला जात आहे. डिजिटल युगातील बदलत्या शैक्षणिक गरजा लक्षात घेऊन शिक्षक प्रशिक्षणार्थ्यांना तंत्रज्ञानाधारित अध्यापनासाठी सक्षम करण्याच्या उद्देशाने प्रा. शिंदे यांनी आपल्या संशोधनातून अभ्यास केला आहे.

शैक्षणिक क्षेत्रातील कार्यासोबतच प्रा. संजय शिंदे हे बालपणापासून प्रजापिता ब्रह्माकुमारी ईश्वरीय विश्व विद्यालयाशी जोडलेले आहेत. ते नियमितपणे राजयोगाचा अभ्यास व साधना करतात.

त्यांना मिळालेल्या या शैक्षणिक यशाबद्दल संस्थेचे पदाधिकारी, एम.आय.टी. आर्ट्स, कॉमर्स अँड सायन्स कॉलेजचे प्राचार्य डॉ. बी. बी. वाफारे, एम.आय.टी. बी.एड. महाविद्यालयाचे प्राचार्य डॉ. समाधान निकुंभ, प्राध्यापक, शिक्षकेतर कर्मचारी, विद्यार्थी तसेच मित्रपरिवाराने त्यांचे अभिनंदन केले आहे.

प्रा. संजय पोपट शिंदे यांच्या या यशामुळे शिक्षणशास्त्र आणि तंत्रज्ञानाच्या संगमातून होणाऱ्या संशोधनाला प्रोत्साहन मिळाले असून, त्यांच्या पुढील शैक्षणिक व सामाजिक वाटचालीसाठी विविध स्तरांतून शुभेच्छा व्यक्त करण्यात येत आहेत.