जनगणना-2027 : दुसऱ्या टप्प्यातील लोकसंख्या गणनेसाठी सज्ज व्हा

प्रतिनिधी :उमेश जाधव 

चार्ज अधिकारी व कर्मचाऱ्यांनी प्रशिक्षण गांभीर्याने घेऊन कार्यपद्धतीचे काटेकोर पालन करावे – जिल्हाधिकारी डॉ. विजय राठोड

कोल्हापूर, दि. 24 : जनगणना-2027 च्या दुसऱ्या टप्प्यातील प्रत्यक्ष लोकसंख्या गणनेच्या अनुषंगाने जिल्हास्तरीय प्रशिक्षणाचे आयोजन जिल्हाधिकारी कार्यालयातील नवीन सभागृहात करण्यात आले. चार्ज अधिकारी आणि संबंधित कर्मचाऱ्यांनी प्रशिक्षण गांभीर्याने घेऊन त्यामध्ये देण्यात येणाऱ्या सूचना व कार्यपद्धतीचे काटेकोरपणे पालन करावे, असे आवाहन जिल्हा जनगणना अधिकारी तथा जिल्हाधिकारी डॉ. विजय राठोड यांनी केले.

दुसऱ्या टप्प्यात प्रत्येक व्यक्तीची माहिती संकलित होणार

जनगणना-2027 च्या पहिल्या टप्प्यात घरांची यादी आणि घरगणना प्रक्रिया पूर्ण झाली आहे. आता दुसऱ्या टप्प्यात प्रत्येक घरातील प्रत्येक व्यक्तीची स्वतंत्र माहिती संकलित करण्यात येणार आहे. यासाठी 40 प्रश्नांच्या आधारे माहिती घेण्यात येणार असून जिल्ह्यातील प्रत्येक घर आणि प्रत्येक व्यक्ती गणनेमध्ये समाविष्ट होईल, याची विशेष दक्षता घेण्याच्या सूचना जिल्हाधिकाऱ्यांनी दिल्या.

चार्ज अधिकारी आणि पर्यवेक्षकांनी प्रगणकांच्या कामावर प्रभावी देखरेख ठेवावी. घरभेटी, माहिती संकलन, माहितीची पडताळणी तसेच अपूर्ण माहितीची पूर्तता याबाबत नियमित आढावा घ्यावा, असेही त्यांनी सांगितले.

जनगणना माहितीची गोपनीयता राखणे बंधनकारक

जनगणनेदरम्यान संकलित करण्यात येणारी माहिती अत्यंत महत्त्वाची असल्याने तिची गोपनीयता राखणे बंधनकारक आहे. जनगणनेची माहिती कोणत्याही अनधिकृत व्यक्तीस देऊ नये, अशा स्पष्ट सूचना जिल्हाधिकारी डॉ. विजय राठोड यांनी प्रशिक्षणादरम्यान दिल्या.

प्रत्येक पात्र व्यक्तीची नोंद होणे आणि कोणतीही व्यक्ती गणनेतून वगळली जाणार नाही, यासाठी अधिकारी व कर्मचाऱ्यांनी जबाबदारीने काम करावे, असेही त्यांनी स्पष्ट केले.

इन्युमरेशन ब्लॉकची अचूक पुनर्रचना करण्याच्या सूचना

सहायक संचालक तेजल कटारे यांनी दुसऱ्या टप्प्यातील कामकाजात अचूकता आणि काटेकोरपणाचे महत्त्व स्पष्ट केले. 800 पेक्षा अधिक लोकसंख्या असलेल्या इन्युमरेशन ब्लॉकची आवश्यकतेनुसार पुनर्रचना (Resetting) करून ब्लॉकची सीमा आणि त्यामधील घरांची संख्या अचूकपणे निश्चित करण्याच्या सूचना त्यांनी दिल्या.

जनगणना कामकाज अधिक प्रभावीपणे समजून घेण्यासाठी उपलब्ध PPT, परिपत्रके आणि प्रशिक्षणपर व्हिडिओंचा अधिकारी व कर्मचाऱ्यांनी उपयोग करावा, असे आवाहनही त्यांनी केले.

प्रगणक गट निर्मितीपासून घरांची निवड-वाटपापर्यंत मार्गदर्शन

सांख्यिकी अन्वेषक तुषार पाटील यांनी प्रशिक्षणादरम्यान प्रगणक तयार करण्याची तत्त्वे, प्रगणक गट तयार करणे, मांडणी दर्शक नकाशाचे पुनरावलोकन, गणना घरांची निवड व वाटप, संक्षिप्त गृहसूची तसेच इन्युमरेशन ब्लॉकची निर्मिती आणि नोंदणी याबाबत PPT च्या माध्यमातून सविस्तर मार्गदर्शन केले.

दुसऱ्या टप्प्यातील प्रत्यक्ष लोकसंख्या गणना सुरळीतपणे पार पाडण्यासाठी प्रत्येक अधिकारी व कर्मचाऱ्याने आपली जबाबदारी आणि कार्यपद्धती व्यवस्थित समजून घेणे आवश्यक असल्याचे यावेळी सांगण्यात आले.

अधिकारी व कर्मचाऱ्यांची उपस्थिती

प्रशिक्षण कार्यक्रमास अतिरिक्त जिल्हा जनगणना अधिकारी तेजस्विनी खोचरे-पाटील, सर्व चार्ज अधिकारी तथा तहसीलदार, मुख्याधिकारी आणि जनगणना कर्मचारी उपस्थित होते.

जनगणना-2027 च्या दुसऱ्या टप्प्यातील लोकसंख्या गणना अचूक, सर्वसमावेशक आणि नियोजित पद्धतीने पार पाडण्यासाठी अधिकारी व कर्मचाऱ्यांना प्रशिक्षणाच्या माध्यमातून आवश्यक मार्गदर्शन करण्यात आले.