भांडूपमध्ये प्रतिबंधित गुटखा व सुगंधित सुपारीचा साठा जप्त; १ कोटी १८ लाखांचा मुद्देमाल हस्तगत

मुंबई ब्यूरो: अनिल सावरे 

नाहूर परिसरात पोलिसांची मोठी कारवाई; ५ वाहनांसह ९ जण ताब्यात

मुंबई : प्रतिनिधी — शासनाने प्रतिबंधित केलेला गुटखा आणि सुगंधित सुपारीची वाहतूक व विक्री करण्याच्या तयारीत असलेल्या टोळीविरोधात भांडूप पोलिसांनी मोठी कारवाई केली आहे. पोलिसांनी नाहूर परिसरात सापळा रचून कारवाई करत ५ वाहनांसह सुमारे १ कोटी १८ लाख २१ हजार ९०० रुपयांचा मुद्देमाल जप्त केला आहे.

गोपनीय माहितीच्या आधारे पोलिसांची कारवाई

वरिष्ठ पोलीस निरीक्षक, भांडूप पोलीस ठाणे यांना प्राप्त झालेल्या गोपनीय माहितीच्या आधारे प्रतिबंधित गुटखा व सुगंधित सुपारीची वाहतूक व विक्रीबाबत खातरजमा करून कारवाई करण्यासाठी सहायक पोलीस निरीक्षक विनोद लाड व त्यांच्या पथकाला रवाना करण्यात आले.

मिळालेल्या गोपनीय माहितीच्या आधारे पोलिसांच्या पथकाने दि. १२ सप्टेंबर २०२६ रोजी पहाटे सुमारे ४.२५ वाजता भांडूप पोलीस ठाण्याच्या हद्दीतील महानगरपालिका पार्किंग, व्हिलेज रोड, नाहूर येथे सापळा रचला.

त्यावेळी संशयास्पदरीत्या धाड टाकली असता घटनास्थळी १ कंटेनर, २ टेम्पो, १ बोलेरो आणि १ पिकअप, अशी एकूण ५ वाहने आढळून आली. या वाहनांमध्ये एकूण ९ इसम ताब्यात घेण्यात आले.

गुटखा आणि सुगंधित सुपारीचा मोठा साठा

पोलिसांनी ताब्यात घेतलेल्या वाहनांची तपासणी केली असता त्यामध्ये प्रतिबंधित सुगंधित सुपारी तसेच सुगंधित तंबाखू मोठ्या प्रमाणावर आढळून आली.

जप्त करण्यात आलेल्या प्रतिबंधित सुगंधित सुपारी व इतर पदार्थांची किंमत सुमारे २० लाख २१ हजार ९०० रुपये असल्याचे पोलिसांनी नमूद केले आहे.

याशिवाय विविध कंपन्यांची ५ मोटार वाहने, ज्यांची अंदाजे किंमत १८ लाख रुपये आहे, ती देखील पोलिसांनी जप्त केली आहेत.

१ कोटी १८ लाख २१ हजार ९०० रुपयांचा मुद्देमाल जप्त

गुटखा व सुगंधित सुपारी तसेच तंबाखूजन्य पदार्थ आणि वाहनांसह पोलिसांनी एकूण १ कोटी १८ लाख २१ हजार ९०० रुपये किमतीचा मुद्देमाल ताब्यात घेतला आहे.

या प्रकरणातील ताब्यात घेण्यात आलेल्या ९ इसमांविरोधात तसेच जप्त करण्यात आलेल्या मुद्देमालाबाबत भांडूप पोलीस ठाण्यात गुन्हा दाखल करण्याची कार्यवाही सुरू आहे.

वरिष्ठ अधिकाऱ्यांच्या मार्गदर्शनाखाली कारवाई

ही यशस्वी कारवाई पोलीस आयुक्त देवेन भारती, पोलीस सहआयुक्त मनोजकुमार शर्मा, अपर पोलीस आयुक्त धनंजय कुलकर्णी, पोलीस उपआयुक्त अभयासिंह देशमुख आणि सहायक पोलीस आयुक्त अजय जोशी यांच्या मार्गदर्शनाखाली करण्यात आली.

तसेच वरिष्ठ पोलीस निरीक्षक श्रीमती सपना खिरसागर यांच्या मार्गदर्शनाखाली सहायक पोलीस निरीक्षक विनोद लाड, पोलीस हवालदार हिरालाल वराडे, मुकेश तिरमारे, गणेश सोनवणे, पोलीस शिपाई विकास शिंदे आणि विजयकुमार पवार यांनी या कारवाईत सहभाग घेतला.

प्रतिबंधित गुटखा आणि तंबाखूजन्य पदार्थांच्या अवैध वाहतूक व विक्रीविरोधात भांडूप पोलिसांनी केलेल्या या कारवाईमुळे अवैध गुटखा व्यवसाय करणाऱ्यांमध्ये खळबळ उडाली आहे.