नवीन शैक्षणिक वर्षाच्या पूर्वतयारीसाठी नाशिक मनपा शिक्षण विभागाची आढावा बैठक; मुख्याध्यापक व शिक्षकांना मार्गदर्शन

नाशिक (ब्युरो) : नवीन शैक्षणिक वर्षाच्या सुरुवातीच्या पार्श्वभूमीवर शाळा पूर्वतयारी आणि विविध शैक्षणिक उपक्रमांच्या प्रभावी अंमलबजावणीसाठी नाशिक महानगरपालिका शिक्षण विभागाच्या वतीने महाकवी कालिदास कलामंदिर येथे सर्व मुख्याध्यापक आणि शिक्षकांची विस्तृत आढावा बैठक आयोजित करण्यात आली. आगामी शैक्षणिक वर्षात शैक्षणिक दर्जा उंचावणे आणि विविध शासकीय उपक्रम यशस्वीपणे राबविणे हा बैठकीचा मुख्य उद्देश होता.

बैठकीत शिक्षण विभागाच्या प्रशासन अधिकारी डॉ. मिता चौधरी यांनी प्रमुख मार्गदर्शन केले. त्यांनी मागील शैक्षणिक वर्षात राबविण्यात आलेल्या विविध उपक्रमांचा आढावा घेत शिक्षकांच्या कार्याचे कौतुक केले. तसेच नवीन शैक्षणिक वर्षात राबविण्यात येणाऱ्या शैक्षणिक व कल्याणकारी योजनांविषयी सविस्तर माहिती दिली.

विद्यार्थ्यांसाठी शैक्षणिक वर्षाचा पहिला दिवस संस्मरणीय ठरावा यासाठी ‘शाळा प्रवेशोत्सव’ उत्साहात आणि आकर्षक पद्धतीने साजरा करण्याच्या सूचना देण्यात आल्या. यासोबतच सर्व पात्र विद्यार्थ्यांना मोफत गणवेश आणि पाठ्यपुस्तकांचे वेळेत वितरण करून शैक्षणिक कामकाज सुरळीत सुरू करण्यावर भर देण्यात आला.

विद्यार्थ्यांच्या बौद्धिक विकासासाठी ‘स्पेलिंग बी’ स्पर्धा, विविध स्पर्धा परीक्षा, शैक्षणिक सहली तसेच ‘नवभारत साक्षरता अभियान’ अंतर्गत निश्चित उद्दिष्टे वेळेत पूर्ण करण्याबाबत मार्गदर्शन करण्यात आले. शालेय परिसर, वर्गखोल्या आणि स्वच्छतागृहांची नियमित स्वच्छता राखून विद्यार्थ्यांसाठी आरोग्यदायी वातावरण निर्माण करण्याच्या सूचनाही देण्यात आल्या.

बैठकीच्या दुसऱ्या सत्रात डिजिटल शिक्षणाला चालना देण्यासाठी श्री. चव्हाण आणि श्री. महाजन यांनी ‘विनोबा ॲप’ची उपयुक्तता, वापर आणि शिक्षकांसाठी असलेले महत्त्व याविषयी माहिती दिली. या ॲपच्या माध्यमातून शिक्षण प्रक्रिया अधिक प्रभावी आणि तंत्रज्ञानाधारित करण्यावर भर देण्यात आला.

विद्यार्थ्यांच्या सुरक्षा आणि हक्कांच्या संरक्षणासाठी जिल्हा महिला व बाल कल्याण विभागाच्या प्रतिनिधी श्रीमती तपकिरे यांनी ‘चाइल्ड हेल्पलाइन’च्या कार्यपद्धतीविषयी माहिती देत विद्यार्थ्यांना संकटसमयी मदत कशी मिळू शकते याबाबत जनजागृती केली.

यावेळी श्री. सीताराम अहिरे यांनी शाळांमध्ये उपलब्ध करून देण्यात आलेल्या भाषा, गणित आणि विज्ञान विषयांच्या साहित्य पेटीचा प्रभावी वापर करून अध्यापन अधिक रंजक आणि सोपे कसे करता येईल याबाबत शिक्षकांना मार्गदर्शन केले.

या बैठकीचे सूत्रसंचालन श्री. पाठक यांनी केले. बैठकीच्या यशस्वी आयोजनासाठी जयंत शिंदे, प्रल्हाद हंकारे यांच्यासह शिक्षण विभागातील अधिकारी आणि कर्मचाऱ्यांनी विशेष परिश्रम घेतले. बैठकीस नाशिक महानगरपालिकेच्या सर्व प्राथमिक व माध्यमिक शाळांचे मुख्याध्यापक, शिक्षक आणि शिक्षण विभागाचे प्रतिनिधी मोठ्या संख्येने उपस्थित होते.

या बैठकीमुळे आगामी शैक्षणिक वर्षाची सुरुवात सकारात्मक, नियोजनबद्ध आणि विद्यार्थीकेंद्रित वातावरणात होण्याचा विश्वास व्यक्त करण्यात आला.