नागपूर लोकभवनात ९० किलोवॅट सौर ऊर्जा प्रकल्पाचे उद्घाटन; हरित ऊर्जेला चालना

नागपूर, दि. १७ : जिष्णु देव वर्मा यांच्या पुढाकाराने नागपूर येथील लोकभवन येथे अत्याधुनिक सौर ऊर्जा प्रकल्पाचे उद्घाटन करण्यात आले. या प्रकल्पाची क्षमता ९० किलोवॅट असून दरवर्षी सुमारे १,१५,२०० युनिट्स स्वच्छ वीज निर्मिती होण्याची अपेक्षा आहे.

यावेळी राज्यपालांनी सौर ऊर्जेचे महत्त्व अधोरेखित करताना हरित ऊर्जा हीच भविष्यातील गरज असल्याचे नमूद केले. अशा प्रकल्पांमुळे पर्यावरण संरक्षणाबरोबरच ऊर्जा क्षेत्रात आत्मनिर्भरतेकडे वाटचाल शक्य असल्याचे त्यांनी सांगितले.

नागपूरसारख्या महत्त्वाच्या शहरात अशा प्रकल्पांमुळे इतर संस्था आणि नागरिकांनाही नवीकरणीय ऊर्जेकडे वळण्यासाठी प्रेरणा मिळेल, असा विश्वास त्यांनी व्यक्त केला.

या सौर प्रकल्पामुळे पारंपरिक ऊर्जा स्रोतांवरील अवलंबित्व कमी होऊन कार्बन उत्सर्जनात लक्षणीय घट होणार आहे. तसेच वीज बिलात बचत होऊन दीर्घकालीन आर्थिक लाभ मिळणार आहे.

या प्रकल्पाची अंमलबजावणी राज्यपालांचे अतिरिक्त परिवार प्रबंधक रमेश येवले यांच्या मार्गदर्शनाखाली मेडाच्या अधिकाऱ्यांनी आणि सार्वजनिक बांधकाम (विद्युत) विभागाच्या अभियंत्यांनी केली.

कार्यक्रमाला राज्यपालांचे सचिव डॉ. प्रशांत नारनवरे, परिवार प्रबंधक डॉ. निशिकांत देशपांडे, खासगी सचिव पवन सिंह, अतिरिक्त परिवार प्रबंधक रमेश येवले, विभागीय महाव्यवस्थापक (महाऊर्जा) सारंग महाजन तसेच अभियंते, अधिकारी व कर्मचारी उपस्थित होते.

⚙️ प्रकल्पाची वैशिष्ट्ये (Features)

अत्याधुनिक ‘सोलार एज’ (DC Power Optimizer) तंत्रज्ञानाचा वापर

प्रत्येक सोलर पॅनेलचे स्वतंत्र निरीक्षण शक्य

सावली, धूळ किंवा बिघाड असूनही संपूर्ण प्रणालीवर परिणाम नाही

रिअल-टाइम वीज निर्मिती मॉनिटरिंग सुविधा