अशोक सराफ यांनी मराठी सिनेमाला वेगळी उंची दिली – मुख्यमंत्री देवेंद्र फडणवीस

प्रतिनिधी: नरेश शिंदे 

नागपूर, दि. २० : मराठी माणसाच्या जीवनातील संघर्ष, वास्तव, मर्यादा, दुःख आणि आनंद अशोक सराफ यांच्या कलाकृतींमधून प्रभावीपणे प्रतिबिंबित झाला आहे. सर्वसामान्यांच्या जीवनातील या भावभावनांना त्यांनी आपल्या अभिनयातून हास्य आणि आनंदाची किनार दिली. मराठी सिनेमा खऱ्या अर्थाने लोकाभिमुख करून त्याला वेगळी उंची प्राप्त करून देण्याचे महत्त्वपूर्ण कार्य ज्येष्ठ अभिनेते अशोक सराफ यांनी केले, असे गौरवोद्गार मुख्यमंत्री देवेंद्र फडणवीस यांनी काढले.

ज्येष्ठ चित्रपट अभिनेते, महाराष्ट्र भूषण आणि पद्मश्री अशोक सराफ यांच्या नागरी सत्कार सोहळ्यात मुख्यमंत्री फडणवीस बोलत होते. नागपूर येथील वसंतराव देशपांडे सभागृहात हा विशेष सोहळा आयोजित करण्यात आला होता.

नागपूरकरांच्या वतीने कृतज्ञतेचा सन्मान

नागपूर महानगरपालिका, विदर्भ गौरव प्रतिष्ठान आणि श्री सिद्धीविनायक ट्रस्ट यांच्या संयुक्त विद्यमाने अशोक सराफ यांचा नागरी सत्कार करण्यात आला.

यावेळी महापौर नीता ठाकरे, विदर्भ गौरव प्रतिष्ठानचे अध्यक्ष डॉ. गिरीश गांधी, श्री सिद्धीविनायक सेवा ट्रस्टचे अध्यक्ष व माजी आमदार संदीप जोशी, उपमहापौर लीला हाथीबेड, स्थायी समिती अध्यक्ष शिवानी दाणी-वखरे, नागपूर मनपातील सत्ता पक्षनेते नरेंद्र बोरकर, मनपा आयुक्त डॉ. विपीन इटनकर यांच्यासह विविध क्षेत्रातील मान्यवर उपस्थित होते.

मुख्यमंत्री फडणवीस म्हणाले की, अशोक सराफ यांच्यासारखे दिग्गज कलाकार लाभणे ही मराठी रंगभूमी, चित्रपटसृष्टी आणि रसिकांसाठी अभिमानाची बाब आहे. त्यांच्या प्रदीर्घ कलाप्रवासाचे आणि मराठी मनोरंजन क्षेत्रातील योगदानाचे कौतुक करण्यासाठी आयोजित करण्यात आलेला हा नागरी सत्कार नागपूरकरांच्या वतीने कृतज्ञता व्यक्त करण्याचा क्षण आहे.

अनेक पिढ्यांना दिला आनंद

अशोक सराफ यांच्या कलाकृतींनी अनेक पिढ्यांना आनंद दिला आहे. आपल्या अभिनयातून त्यांनी असंख्य रसिकांना मराठी सिनेमाची गोडी लावली. त्यांच्या भूमिका, संवादफेक आणि विनोदी शैलीने प्रेक्षकांच्या मनात कायमस्वरूपी स्थान निर्माण केले आहे.

अशोक सराफ यांनी रसिकांच्या मनात निर्माण केलेल्या आनंदाचा हा सन्मान असल्याचे मुख्यमंत्री फडणवीस यांनी नमूद केले.

‘प्रेक्षक आहेत म्हणून आम्ही आहोत’

सत्काराला उत्तर देताना अशोक सराफ यांनी भावनिक भावना व्यक्त केल्या. “आजच्या इतका भव्य सत्कार माझा आजवर झाला नाही. प्रेक्षक आहेत म्हणून आम्ही आहोत,” असे त्यांनी सांगितले.

प्रेक्षकांनी दिलेले प्रेम आणि पाठिंबा हीच आपल्या कलाप्रवासाची खरी ताकद असल्याचे त्यांच्या भावनेतून अधोरेखित झाले.

पुष्कर श्रोत्री यांनी घेतली प्रकट मुलाखत

कार्यक्रमाच्या प्रारंभी अभिनेते पुष्कर श्रोत्री यांनी अशोक सराफ यांची प्रकट मुलाखत घेतली. या संवादातून त्यांच्या प्रदीर्घ कलाप्रवासातील विविध पैलू, अभिनय क्षेत्रातील अनुभव आणि रसिकांशी असलेले नाते उलगडले.

सन्मानचिन्हासह ५ लाखांचा धनादेश

मुख्यमंत्री देवेंद्र फडणवीस यांच्या हस्ते अशोक सराफ यांना सन्मानचिन्ह आणि ५ लाख रुपयांचा धनादेश प्रदान करून गौरविण्यात आले.

याशिवाय विदर्भ गौरव प्रतिष्ठानच्या वतीने अध्यक्ष डॉ. गिरीश गांधी यांनी सन्मानचिन्ह आणि ५१ हजार रुपयांचा धनादेश देऊन त्यांचा गौरव केला. श्री सिद्धीविनायक ट्रस्टच्या वतीनेही १ लाख रुपयांचा धनादेश प्रदान करण्यात आला.

८० दिव्यांनी औक्षण

अशोक सराफ यांनी वयाची ८० वर्षे पूर्ण करून ऐंशीव्या वर्षात पदार्पण केल्याबद्दल ८० दिव्यांनी त्यांचे औक्षण करण्यात आले. या भावपूर्ण क्षणाला उपस्थित रसिकांनी उत्स्फूर्त प्रतिसाद दिला.

महापौर नीता ठाकरे यांनीही यावेळी आपले मनोगत व्यक्त करत अशोक सराफ यांच्या कला क्षेत्रातील योगदानाचा गौरव केला. त्यांच्या प्रदीर्घ कलाप्रवासाचा सन्मान नागपूरच्या सांस्कृतिक विश्वासाठी अभिमानाचा क्षण असल्याची भावना यावेळी व्यक्त करण्यात आली.