"मुंबई-गोवा महामार्गावरील टोलवसुलीवर कोकणवासीयांचा संताप; अपूर्ण कामांमुळे लोकप्रतिनिधींनी ठोस भूमिका घ्यावी – पत्रकार दीपक शिंदे"

रायगड | प्रतिनिधी

मुंबई-गोवा महामार्ग हा कोकणच्या विकासाचा महत्त्वाचा दुवा मानला जातो. मात्र, आज हा महामार्ग विकासाचे प्रतीक न ठरता सर्वसामान्य नागरिकांसाठी त्रास, असुरक्षितता आणि आर्थिक भाराचे कारण बनल्याची तीव्र भावना कोकणवासीयांमध्ये व्यक्त होत आहे.

खारपाडा टोलप्लाझावर सुरू झालेल्या टोलवसुलीबाबत नाराजी व्यक्त करत रायगड येथील पत्रकार दीपक शिंदे यांनी कोकण विभागातील आमदार, खासदार आणि सर्व संबंधित लोकप्रतिनिधींना खुले पत्र लिहून ठोस भूमिका घेण्याची मागणी केली आहे.

त्यांनी पत्रात म्हटले आहे की, महामार्गावरील अनेक कामे अद्याप अपूर्ण आहेत. अनेक ठिकाणी खड्डे, वाहतूक कोंडी, अपुरी दिशादर्शक फलक व्यवस्था, मूलभूत सुविधांचा अभाव आणि प्रवासातील असुरक्षितता यामुळे नागरिक त्रस्त झाले आहेत. अशा परिस्थितीत टोलवसुली करणे म्हणजे कोकणवासीयांवर अन्यायकारक आर्थिक भार टाकण्यासारखे असल्याचा आरोप त्यांनी केला.

कोकणात जाणारा प्रवास हा केवळ अंतर कापण्याचा विषय नसून गाव, संस्कृती आणि नात्यांशी जोडणारा भावनिक प्रवास असल्याचेही त्यांनी नमूद केले. मात्र, सध्याच्या परिस्थितीमुळे प्रवाशांना मनस्ताप आणि अडचणींचा सामना करावा लागत असल्याची खंत व्यक्त करण्यात आली.

पत्रात लोकप्रतिनिधींना पावसाळी अधिवेशनात हा मुद्दा प्रभावीपणे मांडण्याचे आवाहन करण्यात आले आहे. महामार्ग सुरक्षित, खड्डेमुक्त, वाहतूककोंडीमुक्त आणि सर्व सुविधा उपलब्ध होईपर्यंत टोलवसुली स्थगित करण्याची मागणीही करण्यात आली आहे.

पत्रकार दीपक शिंदे यांनी पुढील मागण्या केल्या आहेत:

महामार्गावरील अपूर्ण कामे तातडीने पूर्ण करण्यात यावीत.

सर्व ठिकाणी स्पष्ट आणि पुरेसे दिशादर्शक फलक बसवण्यात यावेत.

खड्डेमुक्त आणि वाहतूककोंडीमुक्त रस्ते उपलब्ध करून द्यावेत.

प्रवाशांसाठी मूलभूत सुविधा, आपत्कालीन सेवा आणि सुरक्षितता व्यवस्था सुनिश्चित करावी.

सर्व निकष पूर्ण होईपर्यंत टोलवसुलीला स्थगिती देण्यात यावी.

"सेवा नाही, सुविधा नाही, सुरक्षितता नाही; मग टोल कशासाठी?" असा थेट सवाल उपस्थित करत त्यांनी कोकणातील सर्व लोकप्रतिनिधींनी राजकीय मतभेद बाजूला ठेवून नागरिकांच्या हितासाठी एकत्र यावे, असे आवाहन केले.

"कोकणकरांचा संयम हा दुर्बलता समजू नका. हा प्रश्न आता केवळ रस्त्याचा नाही; तर सन्मान, हक्क आणि न्यायाचा आहे," असेही त्यांनी आपल्या निवेदनात स्पष्ट केले.

– दीपक शिंदे, पत्रकार, रायगड निवासी 🙏