यवतमाळात उद्या ‘एसटी स्मार्ट कार्ड’ नोंदणी शिबिर; महिला व ज्येष्ठ नागरिकांनी लाभ घेण्याचे आवाहन

यवतमाळ प्रतिनिधी रवी वाघमारे 

यवतमाळ, दि. १७ : डिजिटल इंडियाच्या दिशेने आणखी एक पाऊल टाकत यवतमाळ शहरात एसटी स्मार्ट कार्ड (नॅशनल कॉमन मोबिलिटी कार्ड) नोंदणी शिबिराचे आयोजन करण्यात आले आहे. वंचित बहुजन आघाडीचे जिल्हाध्यक्ष, गटनेते तथा नगरसेवक डॉ. निरज वाघमारे यांच्या पुढाकाराने हे विशेष शिबिर शनिवार, दि. १८ जुलै २०२६ रोजी आयोजित करण्यात आले असून, महिला व ज्येष्ठ नागरिकांनी मोठ्या संख्येने सहभागी होण्याचे आवाहन करण्यात आले आहे.

या शिबिरामुळे १३ वर्षांवरील महिला तसेच ६५ वर्षांवरील ज्येष्ठ पुरुषांना एसटीच्या विविध प्रवास सवलतींसह डिजिटल स्मार्ट कार्डची सुविधा उपलब्ध होणार आहे. त्यामुळे शासकीय कार्यालयांमध्ये वारंवार जाऊन नोंदणी करण्याची गरज भासणार नाही आणि नागरिकांचा वेळ तसेच श्रमांची बचत होणार आहे.

सध्या देशभरात डिजिटल व्यवहारांना प्रोत्साहन दिले जात असून, सार्वजनिक वाहतुकीतही रोख व्यवहारांऐवजी डिजिटल पेमेंट प्रणाली अधिक प्रभावीपणे वापरली जात आहे. अनेकदा एसटी प्रवासादरम्यान सुट्ट्या पैशांवरून प्रवासी आणि वाहक यांच्यात वाद निर्माण होतात. या समस्येवर कायमस्वरूपी उपाय म्हणून नॅशनल कॉमन मोबिलिटी कार्ड (NCMC) उपयुक्त ठरणार असल्याचे आयोजकांनी सांगितले.

डॉ. निरज वाघमारे यांनी आपल्या जनसंपर्क कार्यालयात हे शिबिर आयोजित करून यवतमाळकरांसाठी एक महत्त्वाची सुविधा उपलब्ध करून दिली आहे. या माध्यमातून नागरिकांना डिजिटल प्रवास व्यवस्थेचा लाभ घेणे अधिक सोपे होणार आहे.

यवतमाळ शहर व परिसरातील महिला भगिनी, ज्येष्ठ नागरिक आणि पात्र प्रवाशांनी या विशेष शिबिराचा लाभ घेऊन आपले एसटी स्मार्ट कार्ड तयार करून घ्यावे, असे आवाहन डॉ. निरज वाघमारे आणि त्यांच्या सहकाऱ्यांनी केले आहे. हे शिबिर नागरिकांसाठी मोफत असून, अधिकाधिक लाभार्थ्यांनी या संधीचा फायदा घ्यावा, असेही आयोजकांनी नमूद केले आहे.