दिल्लीतील जंतर-मंतरवरील विद्यार्थ्यांच्या आंदोलनाला ओबीसी जनमोर्चाचा जाहीर पाठिंबा; न्याय्य हक्कांसाठी लढ्याला बळ

मुंबई ब्यूरो अनिल सावरे 

नवी दिल्ली, दि. २५ : दिल्लीतील जंतर-मंतर येथे विविध मागण्यांसाठी सुरू असलेल्या विद्यार्थ्यांच्या आंदोलनाला ओबीसी जनमोर्चाने जाहीर पाठिंबा दिला आहे. विद्यार्थ्यांच्या न्याय्य हक्कांसाठी सुरू असलेल्या या आंदोलनामागे ठामपणे उभे असल्याची भूमिका ओबीसी जनमोर्चाच्या पदाधिकाऱ्यांनी स्पष्ट केली.

यावेळी ओबीसी जनमोर्चाचे अध्यक्ष तथा माजी आमदार प्रकाश अण्णा शेंडगे, कुणबी समाजाचे नेते चंद्रकांत बावकर आणि आगरी समाजाचे नेते जे. डी. तांडेल यांनी आंदोलनस्थळी भेट देऊन विद्यार्थ्यांना पाठिंबा जाहीर केला. विद्यार्थ्यांच्या मागण्या न्याय्य असून त्या शासनाने गांभीर्याने विचारात घ्याव्यात, अशी अपेक्षाही त्यांनी व्यक्त केली.

या पाठिंब्याचे अधिकृत पत्र CJP पक्षाचे प्रवक्ते आशुतोष रांका यांनी स्वीकारले. विद्यार्थ्यांच्या प्रश्नांवर शासनाने तातडीने सकारात्मक निर्णय घ्यावा आणि त्यांच्या मागण्यांवर योग्य तो तोडगा काढावा, अशी मागणी यावेळी करण्यात आली.

ओबीसी जनमोर्चाच्या नेत्यांनी सांगितले की, शिक्षण, रोजगार आणि सामाजिक न्यायाशी संबंधित विद्यार्थ्यांच्या हक्कांसाठी सुरू असलेल्या प्रत्येक लोकशाही आंदोलनाला संघटना नेहमीच पाठिंबा देत आली आहे. विद्यार्थ्यांच्या न्याय्य हक्कांसाठी सुरू असलेल्या या लढ्यात ओबीसी जनमोर्चा त्यांच्या पाठीशी ठामपणे उभा राहील, असा विश्वासही त्यांनी व्यक्त केला.

विद्यार्थ्यांच्या प्रश्नांबाबत शासनाने संवेदनशील भूमिका घेऊन संवादाच्या माध्यमातून सकारात्मक मार्ग काढावा, अशी अपेक्षा यावेळी आंदोलनकर्त्यांनी आणि पाठिंबा देणाऱ्या नेत्यांनी व्यक्त केली.