ठाण्यात अवैध ‘मिक्स हायड्रोकार्बन ऑईल’ साठ्यावर धाड; १.२० कोटींचा मुद्देमाल जप्त

ठाणे, दि. १४ जून : अंबरनाथ तालुक्यातील उसाटणे परिसरात अवैधरित्या साठवून ठेवलेल्या ‘मिक्स हायड्रोकार्बन ऑईल’च्या मोठ्या साठ्यावर राज्य दक्षता पथकाने रविवारी धडक कारवाई करत सुमारे १ कोटी २० लाख रुपयांचा मुद्देमाल जप्त केला. या प्रकरणी संबंधित आरोपींविरुद्ध तळोजा पोलीस ठाण्यात गुन्हा दाखल करण्याची प्रक्रिया सुरू असून अवैध इंधन साठवणूक आणि काळाबाजाराविरोधातील ही महत्त्वपूर्ण कारवाई मानली जात आहे.

नियंत्रक शिधावाटप चंद्रकांत डांगे (भा.प्र.से.) यांना मिळालेल्या खात्रीशीर गुप्त माहितीच्या आधारे राज्य दक्षता पथकाने अंबरनाथमधील उसाटणे येथील न्यूओ लॉजिस्टिक पार्क परिसरात, राज्यस्तरीय प्लॉट क्रमांक २० समोर छापा टाकला. कारवाईदरम्यान टँकरचे सील तोडून ‘मिक्स हायड्रोकार्बन ऑईल’ची बेकायदेशीर साठवणूक आणि देवाणघेवाण सुरू असल्याचे उघडकीस आले.

दोन टँकर आणि टेम्पोमधून इंधन साठा जप्त

पथकाने घटनास्थळी तपासणी केली असता GJ-12 BY-7560 क्रमांकाचा टँकर पूर्ण भरलेला आढळून आला. या टँकरमध्ये सुमारे २९ हजार ७०० किलो मिक्स हायड्रोकार्बन ऑईल असल्याचे निदर्शनास आले.

तसेच MH-43 E-190 क्रमांकाचा आणखी एक टँकर घटनास्थळी उभा होता. त्यामध्ये इलेक्ट्रिक मोटारीच्या सहाय्याने इंधन साठवण्याचे काम सुरू असल्याचे तपासात समोर आले.

याशिवाय MH-46 C-1282 क्रमांकाच्या टेम्पोमध्ये २०० लिटर क्षमतेच्या प्लास्टिक बॅरलमध्ये तेलाची बेकायदेशीर साठवणूक सुरू असल्याचे आढळले. या वाहनात २२० लिटर क्षमतेचे २० रिकामे प्लास्टिक बॅरल्स देखील जप्त करण्यात आले.

मोठ्या प्रमाणात साहित्य जप्त

कारवाईदरम्यान घटनास्थळी जमिनीवर ठेवलेले ८० रिकामे प्लास्टिक बॅरल्स, एक इलेक्ट्रिक मोटार आणि एक एअर ऑपरेटेड डायाफ्राम (AOD) पंप देखील जप्त करण्यात आला. इंधन, वाहने आणि इतर साहित्य मिळून एकूण सुमारे १.२० कोटी रुपयांचा मुद्देमाल जप्त करण्यात आला आहे.

आवश्यक परवाने नसल्याचे प्राथमिक तपासात स्पष्ट

प्राथमिक चौकशीत संबंधितांकडे इंधन साठवणूक आणि हाताळणीसाठी आवश्यक परवाने अथवा वैध कागदपत्रे नसल्याचे समोर आले आहे. त्यामुळे संपूर्ण प्रकरणाचा सखोल तपास सुरू करण्यात आला असून इंधन साठवणूक, वाहतूक आणि संभाव्य काळाबाजाराच्या दृष्टीनेही तपासाची व्याप्ती वाढविण्यात आली आहे.

तळोजा पोलीस ठाण्यात गुन्हा दाखल होणार

या प्रकरणी संबंधित आरोपींविरुद्ध तळोजा पोलीस ठाण्यात गुन्हा नोंदविण्याची कायदेशीर प्रक्रिया सुरू करण्यात आली आहे. तपासानंतर संबंधितांवर आवश्यक कायदेशीर कारवाई केली जाणार असल्याचे अधिकृत सूत्रांनी सांगितले.

संयुक्त पथकाची यशस्वी कारवाई

ही कारवाई नियंत्रक शिधावाटप चंद्रकांत डांगे यांच्या मार्गदर्शनाखाली राज्य दक्षता पथकाचे सहायक नियंत्रक शिधावाटप प्रदीप काळे, सहायक जिल्हा पुरवठा अधिकारी योगेश जंगले, मुख्य निरीक्षण अधिकारी नागनाथ हंगरगे तसेच शिधावाटप निरीक्षक रामराजे भोसले, चंद्रकांत कांबळे, विकास नागदिवे, रवींद्र राठोड, राजेश सोरते, देवानंद थोरवे, पवन कुंभले, राहुल इंगळे आणि अरुण काते यांच्या संयुक्त पथकाने पार पाडली.

अवैध इंधन साठवणुकीविरोधात मोहीम अधिक तीव्र होणार

प्रशासनाने दिलेल्या माहितीनुसार, इंधनाच्या अवैध साठवणुकीमुळे शासनाचा महसूल बुडण्याबरोबरच सार्वजनिक सुरक्षेलाही गंभीर धोका निर्माण होतो. त्यामुळे अशा प्रकारच्या बेकायदेशीर साठवणूक, वाहतूक आणि काळाबाजाराविरोधातील कारवाया आगामी काळात अधिक तीव्र करण्यात येणार असल्याचा इशारा प्रशासनाने दिला आहे.