३०० दिवसांचे काम १,२५० दिवस उलटूनही अपूर्ण; शेगावच्या नवीन तहसील इमारतीवरून संताप

बुलडाणा प्रतिनिधी: महेंद्र मिश्रा, 

शेगाव (बुलढाणा) : संत गजानन महाराजांच्या पावन भूमीमुळे देशभरात ओळख असलेल्या शेगाव शहरासाठी हजारो कोटी रुपयांचा विकास आराखडा मंजूर झाला असला, तरी अनेक महत्त्वाच्या विकासकामांच्या विलंबामुळे नागरिकांमध्ये नाराजीचे वातावरण निर्माण झाले आहे. त्यापैकी नवीन तहसील कार्यालयाच्या इमारतीचे रखडलेले बांधकाम हा सध्या चर्चेचा विषय ठरत आहे.

शासनाने नवीन तहसील इमारतीचे बांधकाम पूर्ण करण्यासाठी कंत्राट देताना सुमारे ३०० दिवसांची मुदत निश्चित केली होती. मात्र, स्थानिकांच्या म्हणण्यानुसार तब्बल १,२५० दिवस उलटूनही हे बांधकाम अद्याप पूर्ण झालेले नाही.

या विलंबामुळे शासनाला जुन्या इमारतीचे भाडे द्यावे लागत असल्यास त्याचा आर्थिक भार अखेर जनतेच्या पैशावर पडत असल्याची चर्चा नागरिकांमध्ये सुरू आहे. त्यामुळे या विलंबासाठी नेमके जबाबदार कोण, कंत्राटदार की संबंधित शासकीय यंत्रणा, असा प्रश्न उपस्थित केला जात आहे.

शहरातील नागरिकांचे म्हणणे आहे की, विकासकामांसाठी निश्चित कालमर्यादा असतानाही ती पाळली जात नसल्यास संबंधित कंत्राटदारांवर आणि जबाबदार अधिकाऱ्यांवर कठोर कारवाई झाली पाहिजे. अन्यथा अशा प्रकारच्या विलंबामुळे सार्वजनिक निधीचा अपव्यय होत राहील.

दरम्यान, या प्रकरणात संबंधित कंत्राटदार तसेच प्रशासनाने विलंबामागील कारणे स्पष्ट करून काम पूर्ण करण्याचे निश्चित वेळापत्रक जाहीर करावे, अशी मागणीही नागरिकांकडून होत आहे.

शेगावसारख्या धार्मिक आणि ऐतिहासिक शहरात विकासकामे वेळेत पूर्ण होणे आवश्यक असून, रखडलेल्या तहसील इमारतीचे काम तातडीने पूर्ण करून नागरिकांना आधुनिक सुविधा उपलब्ध करून द्याव्यात, अशी अपेक्षा व्यक्त केली जात आहे.

– महेंद्र मिश्रा, बुलढाणा