बुलढाण्यात दुर्मिळ घटना; महिलेने एकाच वेळी चार बाळांना दिला जन्म

महेंद्र मिश्रा

प्रतिनिधी, बुलढाणा

बुलढाणा, दि. ६ : बुलढाणा जिल्ह्यातील जळगाव जामोद तालुक्यातील आदिवासीबहुल चारबन गावात अत्यंत दुर्मिळ अशी घटना घडली आहे. गावातील रियानी पंशिराम सस्त्या (वय २७) यांनी एकाच प्रसूतीत तीन मुलगे आणि एका मुलीला जन्म दिला. या अनोख्या घटनेची जिल्हाभर चर्चा सुरू असून आई आणि चारही नवजात बालकांवर तज्ज्ञ डॉक्टरांच्या देखरेखीखाली उपचार सुरू आहेत.

मिळालेल्या माहितीनुसार, रियानी सस्त्या यांची प्रसूती कोणत्याही अत्याधुनिक वैद्यकीय सुविधेविना घरीच झाली. प्रसूतीनंतर माता आणि चारही नवजात बालकांना तातडीने जळगाव जामोद येथील ग्रामीण रुग्णालयात दाखल करण्यात आले.

डॉक्टरांनी केलेल्या प्राथमिक तपासणीत आई आणि चारही बाळांची प्रकृती स्थिर असल्याचे आढळले. मात्र, चारही नवजात बालकांचे वजन ९०० ग्रॅम ते १ किलो दरम्यान असल्याने पुढील विशेष उपचारासाठी त्यांना तातडीने खामगाव येथील सामान्य रुग्णालयात हलविण्यात आले.

वैद्यकीय तज्ज्ञांच्या मते, एकाच वेळी चार बाळांचा जन्म होणे ही अत्यंत दुर्मिळ घटना असून अशा घटना लाखो किंवा कोट्यवधी प्रसूतींपैकी एखाद्याच वेळी घडतात. अशा प्रसंगी मुदतीपूर्व प्रसूतीमुळे नवजात बालकांचे वजन कमी असणे ही वैद्यकीयदृष्ट्या सामान्य बाब असल्याचे डॉक्टरांनी सांगितले.

सध्या खामगाव सामान्य रुग्णालयात तज्ज्ञ डॉक्टरांच्या देखरेखीखाली माता व चारही नवजात बालकांवर उपचार सुरू असून त्यांच्या प्रकृतीवर बारकाईने लक्ष ठेवण्यात येत आहे.

या दुर्मिळ घटनेमुळे चारबन गावासह संपूर्ण बुलढाणा जिल्ह्यात आश्चर्य व्यक्त केले जात असून, आई आणि चारही बाळांच्या उत्तम प्रकृतीसाठी नागरिकांकडून प्रार्थना करण्यात येत आहे.