सरसंघचालक मोहन भागवत शेगावात दाखल; संत गजानन महाराजांच्या समाधीचे घेतले दर्शन

बुलढाणा | प्रतिनिधी : महेंद्र मिश्रा 

राष्ट्रीय स्वयंसेवक संघाचे सरसंघचालक मोहन भागवत यांचे आज शेगाव येथे आगमन झाले. शेगाव येथील प्रसिद्ध संत गजानन महाराज मंदिरात जाऊन त्यांनी संत गजानन महाराजांच्या समाधीचे दर्शन घेतले. दोन दिवसांच्या शेगाव-खामगाव दौऱ्यासाठी मोहन भागवत बुलढाणा जिल्ह्यात दाखल झाले आहेत.

दौऱ्याच्या सुरुवातीलाच त्यांनी संत गजानन महाराजांच्या चरणी नतमस्तक होत दर्शन घेतले. मंदिरात त्यांच्या आगमनावेळी संस्थानच्या वतीने त्यांचे स्वागत करण्यात आले. यावेळी संस्थानच्या पदाधिकाऱ्यांनी त्यांची भेट घेतली.

दोन दिवस शेगाव-खामगाव दौरा

मोहन भागवत हे आजपासून दोन दिवस शेगाव आणि खामगाव परिसरात आयोजित विविध कार्यक्रमांना उपस्थित राहणार आहेत. या दौऱ्यात संघाच्या विविध कार्यक्रमांसह स्थानिक पातळीवरील नियोजित उपक्रमांमध्ये ते सहभागी होणार असल्याची माहिती आहे.

शेगाव येथील संत गजानन महाराज मंदिराला भेट देत दर्शन घेतल्यानंतर मोहन भागवत हे खामगावकडे रवाना होणार आहेत.

मोहन भागवत यांच्या शेगाव आगमनाच्या पार्श्वभूमीवर मंदिर परिसरात आवश्यक नियोजन आणि सुरक्षा व्यवस्था करण्यात आली होती. त्यांच्या दौऱ्याकडे संघ स्वयंसेवक तसेच स्थानिक नागरिकांचे लक्ष लागले आहे.