वाकड पोलिसांची मोठी कारवाई; घरफोडी करणारा अट्टल गुन्हेगार साथीदारांसह अटकेत, ७ गुन्हे उघडकीस

पुणे प्रतिनिधी रोहन सोनाळे 

पिंपरी-चिंचवड, दि. १८ जुलै : पिंपरी-चिंचवड पोलिस आयुक्तालयाच्या वाकड पोलीस ठाण्याच्या तपास पथकाने घरफोडी करणाऱ्या अट्टल गुन्हेगाराच्या टोळीचा पर्दाफाश करत मुख्य आरोपीसह तीन साथीदारांना अटक केली आहे. या कारवाईत घरफोडीचे सात गुन्हे उघडकीस आले असून आरोपींकडून सुमारे ₹१० लाख ३८ हजार ९०० रुपयांचा मुद्देमाल जप्त करण्यात आला आहे.

पोलिसांनी दिलेल्या माहितीनुसार, वाकड परिसरातील एका बंद फ्लॅटचा दरवाज्याचे लॉक तोडून अज्ञात चोरट्यांनी घरात प्रवेश करून सुमारे ₹७.२० लाखांचे दागिने व रोकड चोरी केली होती. याप्रकरणी वाकड पोलीस ठाण्यात गुन्हा दाखल करण्यात आला होता.

या गुन्ह्याचा तपास करताना वाकड पोलिसांच्या तपास पथकाने घटनास्थळ परिसरातील शेकडो सीसीटीव्ही फुटेजचे बारकाईने विश्लेषण केले. तांत्रिक तपास आणि गुप्त माहितीच्या आधारे पोलिसांनी मुख्य आरोपीचा शोध घेत त्याला ताब्यात घेतले. चौकशीदरम्यान त्याने साथीदारांसह अनेक घरफोड्यांची कबुली दिली.

तपासात पोलिसांनी मुख्य आरोपीसह आणखी तीन साथीदारांना अटक केली. आरोपींकडून चोरीतील सोन्याचे दागिने, रोकड आणि इतर साहित्य असा एकूण ₹१०.३८ लाखांचा मुद्देमाल जप्त करण्यात आला. या कारवाईमुळे वाकड पोलीस ठाण्याच्या हद्दीतील सात घरफोडीचे गुन्हे उघडकीस आले असून आणखी काही गुन्ह्यांचा तपास सुरू आहे.

प्राथमिक तपासात मुख्य आरोपी हा सराईत गुन्हेगार असून त्याच्यावर पिंपरी-चिंचवड, पुणे शहर, पुणे ग्रामीण तसेच अहमदनगर जिल्ह्यात घरफोडी आणि चोरीचे अनेक गुन्हे दाखल असल्याचे पोलिसांनी सांगितले.

ही उल्लेखनीय कारवाई पिंपरी-चिंचवड पोलिस आयुक्तालयाच्या वरिष्ठ अधिकाऱ्यांच्या मार्गदर्शनाखाली वाकड पोलीस ठाण्याच्या तपास पथकाने केली. आरोपींकडून आणखी काही गुन्ह्यांची उकल होण्याची शक्यता असून त्यादृष्टीने पुढील तपास सुरू आहे.