हिंगोलीत बोगस कीटकनाशकांचा सुळसुळाट? कृषिमंत्री दत्तामामा भरणे यांच्या प्रतिमेला पैशांचा हार घालून शेतकऱ्यांचे अनोखे आंदोलन

हिंगोली | प्रतिनिधी भगवानराव मस्के

हिंगोली जिल्ह्यात मोठ्या प्रमाणावर बोगस पेस्टिसाइड व कीटकनाशकांची विक्री होत असल्याचा गंभीर आरोप करत क्रांतिकारी शेतकरी संघटनेच्या वतीने रविवारी गोरेगाव येथील अप्पर तहसील कार्यालयासमोर अनोखे आंदोलन करण्यात आले. यावेळी कृषिमंत्री दत्तामामा भरणे यांच्या प्रतिमेला पैशांचा हार घालून शासन आणि कृषी विभागाच्या कारभाराचा निषेध करण्यात आला.

संघटनेच्या पदाधिकाऱ्यांनी आरोप केला की, जिल्ह्यातील अनेक कंपन्या कृषी विभागातील काही अधिकारी व जिल्हा कृषी प्रशासनाच्या आशीर्वादाने निकृष्ट आणि बोगस कीटकनाशकांची खुलेआम विक्री करत आहेत. त्यामुळे शेतकऱ्यांच्या पिकांचे मोठ्या प्रमाणावर नुकसान होत असून त्यांना आर्थिक फटका बसत आहे.

संघटनेच्या मते, जिल्ह्यात विक्री होणाऱ्या सुमारे ९० टक्के कीटकनाशकांच्या गुणवत्तेबाबत संशय असून, निकृष्ट औषधांमुळे पिकांचे उत्पादन घटत आहे. याबाबत वारंवार तक्रारी करूनही कृषी विभागाकडून दोषी कंपन्यांवर प्रभावी कारवाई केली जात नसल्याने शेतकऱ्यांमध्ये तीव्र नाराजी आहे.

प्रमुख मागण्या

क्रांतिकारी शेतकरी संघटनेने शासनाकडे पुढील मागण्या केल्या आहेत:

हिंगोली जिल्ह्यात विक्री होणाऱ्या सर्व संशयित कीटकनाशकांची तात्काळ तपासणी करण्यात यावी.

बोगस औषधे विकणाऱ्या कंपन्यांचे परवाने रद्द करून त्यांच्यावर फौजदारी गुन्हे दाखल करण्यात यावेत.

संबंधित कृषी अधिकाऱ्यांच्या भूमिकेची चौकशी करून दोषींवर कठोर कारवाई करण्यात यावी.

बोगस औषधांमुळे नुकसान झालेल्या शेतकऱ्यांना तातडीने नुकसानभरपाई देण्यात यावी.

संघटनेच्या पदाधिकाऱ्यांनी इशारा दिला की, शासनाने या मागण्यांकडे तातडीने लक्ष न दिल्यास जिल्हाभर तीव्र जनआंदोलन छेडण्यात येईल. त्याची संपूर्ण जबाबदारी शासन आणि कृषी प्रशासनाची राहील, असा इशाराही त्यांनी दिला.

या आंदोलनात गजानन कावरखे, नामदेव पतंगे, जगदीश बनसोडे, प्रवीण मते, अमोल गीरे, अशोक कावरखे, राहुल कावरखे, अमोल एकशिंगे यांच्यासह क्रांतिकारी शेतकरी संघटनेचे पदाधिकारी, कार्यकर्ते आणि मोठ्या संख्येने शेतकरी सहभागी झाले होते.