अतिवृष्टीच्या पार्श्वभूमीवर नागरिकांनी अनावश्यक प्रवास टाळावा; संपूर्ण शासकीय यंत्रणा अलर्ट मोडवर – मुख्यमंत्री देवेंद्र फडणवीस

मुंबई प्रतिनिधी देवानंद शिंदे 

मुंबई | ६ जुलै २०२६ : राज्यातील अतिवृष्टी, बदलते हवामान आणि नैसर्गिक आपत्तींच्या पार्श्वभूमीवर राज्य शासनाची संपूर्ण यंत्रणा पूर्णपणे सज्ज असून नागरिकांनी सतर्क राहून अनावश्यक प्रवास टाळावा, असे आवाहन मुख्यमंत्री देवेंद्र फडणवीस यांनी विधानसभेत केले. राज्य आपत्ती व्यवस्थापन कक्ष सातत्याने परिस्थितीवर लक्ष ठेवून असून सर्व जिल्हा प्रशासनांना अलर्टवर ठेवण्यात आल्याची माहिती त्यांनी दिली.

विधानसभेत राज्यातील अतिवृष्टीमुळे निर्माण झालेल्या परिस्थितीबाबत निवेदन करताना मुख्यमंत्री म्हणाले की, हवामानातील बदलामुळे अतिवृष्टी, दरडी कोसळणे, जोरदार वारे आणि इतर नैसर्गिक घटना वाढत असून या बदललेल्या निसर्गचक्राचा भाग आहेत. शासनाने पूर्वतयारी केली असली तरी काही वेळा अपेक्षेपेक्षा वेगळ्या घटना घडतात. मात्र अशा प्रत्येक परिस्थितीत महानगरपालिका, राज्य आपत्ती व्यवस्थापन प्राधिकरण आणि संबंधित सर्व विभाग तत्काळ घटनास्थळी पोहोचून मदतकार्य करत आहेत.

नागरिकांच्या सुरक्षिततेला सर्वोच्च प्राधान्य

मुख्यमंत्री फडणवीस यांनी स्पष्ट केले की, नागरिकांच्या सुरक्षिततेला सर्वोच्च प्राधान्य देण्यात आले आहे. धोकादायक ठिकाणी वाहतूक तातडीने वळविणे, आवश्यकतेनुसार रस्ते बंद करून पर्यायी मार्ग उपलब्ध करून देणे, अडकलेल्या नागरिकांची सुरक्षित सुटका करणे तसेच पाण्यात अडकलेल्या वाहनांना बाहेर काढण्यासाठी बचावकार्य सुरू आहे.

संभाव्य धोका लक्षात घेऊन गेल्या दोन दिवसांत धोकादायक भागांतील अनेक नागरिकांना सुरक्षित स्थळी स्थलांतरित करण्यात आले असून त्यांच्या निवास आणि आवश्यक सुविधांचीही व्यवस्था करण्यात आल्याचे त्यांनी सांगितले.

दुपारनंतर मुसळधार पाऊस आणि वादळी वाऱ्यांचा इशारा

मुख्यमंत्री म्हणाले की, आजचा दिवस अत्यंत महत्त्वाचा असून दुपारनंतर राज्यातील काही भागांत मुसळधार पाऊस आणि जोरदार वाऱ्यांचा इशारा हवामान विभागाने दिला आहे. त्यामुळे नागरिकांनी शक्यतो घराबाहेर पडणे टाळावे आणि अत्यावश्यक कामाशिवाय प्रवास करू नये.

विशेषतः तरुणांना आवाहन करताना त्यांनी सांगितले की, पावसाळी पर्यटन, धबधबे, घाट परिसर, नदीकाठ किंवा इतर धोकादायक ठिकाणी फिरण्यासाठी जाणे पूर्णपणे टाळावे. सध्याच्या परिस्थितीत सुरक्षिततेला सर्वोच्च प्राधान्य देणे हीच काळाची गरज असल्याचे त्यांनी नमूद केले.

आपत्ती व्यवस्थापन कक्ष अलर्ट मोडवर

मुख्यमंत्री फडणवीस यांनी सांगितले की, राज्य शासनाचा आपत्ती व्यवस्थापन कक्ष २४ तास परिस्थितीवर लक्ष ठेवून आहे. नियमित आढावा घेतला जात असून सर्व जिल्हा प्रशासनांना सतर्कतेच्या सूचना देण्यात आल्या आहेत. कोणत्याही ठिकाणी यंत्रणेत कमतरता राहणार नाही आणि आवश्यक त्या सर्व उपाययोजना तातडीने करण्यात येतील, असा विश्वास त्यांनी व्यक्त केला.

तसेच, गेल्या दोन-तीन दिवसांतील अतिवृष्टीमुळे घडलेल्या घटनांचा आढावा, करण्यात आलेले मदतकार्य आणि भविष्यात अशा घटना टाळण्यासाठी राबविण्यात येणाऱ्या उपाययोजनांबाबत सविस्तर निवेदन उद्या विधानसभेत सादर करण्यात येईल, असेही मुख्यमंत्री देवेंद्र फडणवीस यांनी स्पष्ट केले.