यवतमाळ पालिकेत अधिकाऱ्यांची मुजोरी? माहिती न दिल्याने गटनेते डॉ. नीरज वाघमारे यांचे ठिय्या आंदोलन

यवतमाळ प्रतिनिधी: रवी वाघमारे 

यवतमाळ, दि. 23 जून : यवतमाळ नगर परिषदेतील विविध विभागांकडून जनहिताशी संबंधित माहिती देण्यात होत असलेल्या कथित टाळाटाळीविरोधात गटनेते तथा नगरसेवक डॉ. नीरज वाघमारे यांनी आक्रमक भूमिका घेत अधिकाऱ्यांच्या दालनाबाहेर ठिय्या आंदोलन केले. या घटनेमुळे पालिका प्रशासनाच्या कार्यपद्धतीवर प्रश्नचिन्ह उपस्थित होत आहे.

मिळालेल्या माहितीनुसार, डॉ. नीरज वाघमारे यांनी नगर परिषदेच्या बांधकाम, नियोजन, आरोग्य, विद्युत आणि पाणीपुरवठा विभागांकडे विविध विकासकामे आणि जनहिताच्या विषयांबाबत अधिकृत माहिती मागवली होती. मात्र, संबंधित विभागांकडून माहिती देण्यास विलंब होत असल्याचा आरोप त्यांनी केला.

लोकप्रतिनिधी म्हणून प्रशासनाकडून माहिती मिळवणे हा आपला कायदेशीर आणि घटनात्मक अधिकार असल्याचे सांगत डॉ. वाघमारे यांनी अनेकदा लेखी तसेच तोंडी पाठपुरावा केल्याचा दावा केला. तरीही संबंधित विभागांकडून अपेक्षित प्रतिसाद मिळाला नसल्याने त्यांनी 23 जून रोजी सकाळी 11 वाजता संबंधित अधिकाऱ्यांच्या दालनाबाहेर ठिय्या आंदोलन सुरू केले.

या आंदोलनात नगरसेविका मीराताई वीर यांनीही सहभाग घेत प्रशासनाच्या कार्यपद्धतीवर नाराजी व्यक्त केली. लोकप्रतिनिधींना आवश्यक माहिती वेळेत उपलब्ध करून देणे हे प्रशासनाचे कर्तव्य असून पारदर्शक कारभाराला प्राधान्य दिले पाहिजे, अशी मागणी त्यांनी केली.

माध्यमांशी बोलताना डॉ. नीरज वाघमारे म्हणाले, "नगरसेवक हा नागरिकांचा प्रतिनिधी असतो. जनहिताच्या कामांवर देखरेख ठेवणे, प्रशासनाकडून माहिती घेणे आणि नागरिकांच्या प्रश्नांचा पाठपुरावा करणे ही आमची जबाबदारी आहे. जर लोकप्रतिनिधींनाच माहिती मिळत नसेल, तर सामान्य नागरिकांचे काय? प्रशासनाची ही भूमिका स्वीकारली जाणार नाही."

पालिकेतील विविध विभागांकडून माहिती दडपली जात असल्याचा आरोप करत त्यांनी पारदर्शक प्रशासन आणि नागरिकांच्या हक्कांसाठी संघर्ष सुरूच राहणार असल्याचे स्पष्ट केले.

दरम्यान, या आंदोलनामुळे यवतमाळ नगर परिषदेतील प्रशासन आणि लोकप्रतिनिधी यांच्यातील समन्वयाचा मुद्दा पुन्हा चर्चेत आला असून संबंधित विभागांकडून याबाबतची अधिकृत भूमिका अद्याप समोर आलेली नाही.