प्रधानमंत्री राष्ट्रीय बाल पुरस्कार 2026 साठी नामांकन प्रक्रिया सुरू; अर्जाची अंतिम मुदत 31 जुलै

नवी दिल्ली, दि. 9 जून 2026 : प्रधानमंत्री राष्ट्रीय बाल पुरस्कार (PMRBP) 2026 साठी ऑनलाइन नामांकन प्रक्रिया सुरू करण्यात आली असून अर्ज सादर करण्याची अंतिम मुदत 31 जुलै 2026 निश्चित करण्यात आली आहे. महिला आणि बाल विकास मंत्रालयाने इच्छुक उमेदवार, पालक, शैक्षणिक संस्था आणि नागरिकांना प्रतिभावान बालकांची नावे सुचविण्याचे आवाहन केले आहे.

अर्जदारांनी आपले नामांकन ऑनलाइन पद्धतीने या संकेतस्थळावर सादर करावे. भारतात वास्तव्यास असलेले भारतीय नागरिक आणि 31 जुलै 2026 रोजी 5 ते 18 वर्षे वयोगटातील बालके या पुरस्कारासाठी पात्र ठरणार आहेत. स्व-नामांकन तसेच तृतीय पक्षाकडून शिफारस अशा दोन्ही प्रकारच्या अर्जांना मान्यता दिली जाणार आहे.

अर्ज करताना उमेदवारांनी वैयक्तिक माहिती, पुरस्काराचा प्रवर्ग, अलीकडील छायाचित्र आणि आवश्यक कागदपत्रे अपलोड करणे आवश्यक आहे. तसेच आपल्या उल्लेखनीय कार्याची माहिती आणि त्या कार्याचा समाजावर झालेला प्रभाव 1,000 शब्दांपर्यंत सादर करावा लागणार आहे.

प्रधानमंत्री राष्ट्रीय बाल पुरस्कारांतर्गत खालील सहा क्षेत्रांमध्ये उल्लेखनीय कामगिरी करणाऱ्या बालकांचा गौरव करण्यात येतो:

शौर्य – स्वतःच्या जीवाची पर्वा न करता इतरांचे प्राण वाचविणारे किंवा असामान्य धैर्य दाखविणारे बालक.

क्रीडा – राष्ट्रीय किंवा आंतरराष्ट्रीय स्तरावर उल्लेखनीय यश संपादन करणारे खेळाडू.

समाजसेवा – समाजकल्याण, गरजूंना मदत, जनजागृती आणि राष्ट्रीय कार्यात योगदान देणारे बालक.

विज्ञान व तंत्रज्ञान – संशोधन, नवोपक्रम किंवा वैज्ञानिक प्रकल्प विकसित करणारे विद्यार्थी.

पर्यावरण – पर्यावरण संवर्धन, शाश्वत विकास आणि पर्यावरणपूरक उपक्रमांमध्ये योगदान देणारे बालक.

कला व संस्कृती – संगीत, नृत्य, अभिनय, लेखन, चित्रकला किंवा इतर कलाक्षेत्रांमध्ये प्रावीण्य मिळवणारे बालक.

महिला आणि बाल विकास मंत्रालयाने शाळा, महाविद्यालये, पालक, शिक्षक, मार्गदर्शक आणि सर्वसामान्य नागरिकांना देशातील प्रेरणादायी आणि कर्तृत्ववान बालकांचा शोध घेऊन त्यांच्या नावांची शिफारस करण्याचे आवाहन केले आहे. देशातील प्रत्येक गुणी बालकाला राष्ट्रीय स्तरावर आपली प्रतिभा सादर करण्याची संधी मिळावी, हा या पुरस्काराचा प्रमुख उद्देश आहे.