ट्रॅफिक बडीचा प्रभावी उपयोग; मे 2026 मध्ये 1,365 वाहतूक तक्रारींचे ऑनलाइन निराकरण

पुणे प्रतिनिधी रोहन सोनाळे 

पिंपरी-चिंचवड, दि. 10 : पिंपरी-चिंचवड पोलीस आयुक्तालयाने नागरिकांच्या वाहतूकविषयक समस्यांचे जलद निवारण करण्यासाठी सुरू केलेल्या ‘ट्रॅफिक बडी’ व्हॉट्सअॅप चॅटबॉट उपक्रमाला नागरिकांचा उत्स्फूर्त प्रतिसाद मिळत असून, मे 2026 या एकाच महिन्यात 1,365 तक्रारींचे यशस्वी निराकरण करण्यात आले आहे.

शहरातील वाढती लोकसंख्या, वाहनांची वाढती संख्या आणि वाहतूक कोंडीच्या पार्श्वभूमीवर नागरिकांच्या दैनंदिन अडचणी सोडविण्यासाठी हा उपक्रम सुरू करण्यात आला आहे. पोलीस आयुक्त विनयकुमार चौबे यांच्या आदेशानुसार, पोलीस सहआयुक्त शशिकांत महावरकर आणि अपर पोलीस आयुक्त सारंग आवाड यांच्या मार्गदर्शनाखाली हा उपक्रम कार्यान्वित करण्यात आला आहे.

कोणत्या तक्रारी नोंदवता येतात?

‘ट्रॅफिक बडी’ व्हॉट्सअॅप चॅटबॉटद्वारे नागरिकांना खालील बाबींविषयी तक्रारी नोंदविता येतात:

वाहतूक नियमांचे उल्लंघन

वाहतूक कोंडी

वाहतूक व्यवस्थेतील अनियमितता

खराब रस्ते

बेकायदेशीर पार्किंग

ट्रॅफिक सिग्नल समस्या

वाहतूक सूचना

जड व अवजड वाहनांकडून होणारे नियमभंग

नागरिकांना संबंधित तक्रारी फोटोसह नोंदविण्याची सुविधा उपलब्ध आहे.

24 तासांत तक्रारींचे निवारण

तक्रार दाखल झाल्यानंतर 24 तासांच्या आत निवारणाची प्रक्रिया पूर्ण करण्याचा प्रयत्न केला जातो. तसेच तक्रारीवर झालेल्या कार्यवाहीची माहिती तक्रारदाराला संदेशाद्वारे देण्याची सुविधाही उपलब्ध करून देण्यात आली आहे.

नागरिकांच्या सहभागाला प्रोत्साहन

वाहतूक कोंडी, नियमभंग आणि शहरातील इतर वाहतूकविषयक समस्या सोडविण्यासाठी नागरिकांनी सक्रिय सहभाग नोंदवावा, यासाठी ट्रॅफिक बडी चॅटबॉट विकसित करण्यात आला आहे. यामध्ये इच्छुक स्वयंसेवकांची नोंदणी करण्याची सुविधाही देण्यात आली आहे.

नागरिकांना आवाहन

पिंपरी-चिंचवड शहरातील नागरिकांनी वाहतूक कोंडी, वाहतूक नियमभंग आणि इतर वाहतूक समस्यांबाबत तक्रारी नोंदविण्यासाठी ट्रॅफिक बडी व्हॉट्सअॅप चॅटबॉट क्रमांक 8087489895 चा अधिकाधिक वापर करावा, असे आवाहन वाहतूक पोलिसांनी केले आहे.