जिल्हा परिषद शाळांमध्ये प्रवेशासाठी आता लागतात रांगा; गुणवत्तेमुळे पालकांचा वाढता विश्वास

कोल्हापूर जिल्हा प्रतिनिधी : एक काळ असा होता की जिल्हा परिषद शाळा म्हणजे ग्रामीण भागातील शिक्षणाचा प्रमुख आधार मानला जात असे. मात्र, काही गैरसमज, अफवा आणि खासगी शिक्षण संस्थांच्या वाढत्या प्रभावामुळे अनेक शाळा विद्यार्थ्यांविना ओस पडू लागल्या होत्या. आज मात्र चित्र पूर्णपणे बदलले आहे. राज्यातील अनेक जिल्हा परिषद शाळांनी आपल्या गुणवत्तेच्या बळावर नव्याने ओळख निर्माण केली असून अनेक ठिकाणी प्रवेशासाठी पालकांच्या रांगा लागल्याचे चित्र दिसत आहे.

सातारा, कोल्हापूर, पुणे, सिंधुदुर्ग, नाशिक, नागपूर, जळगाव यांसह राज्यातील अनेक जिल्ह्यांतील जिल्हा परिषद शाळांनी शैक्षणिक गुणवत्ता, डिजिटल शिक्षण, स्पर्धा परीक्षा मार्गदर्शन, संस्कारक्षम वातावरण आणि उत्कृष्ट निकालांच्या जोरावर पालकांचा विश्वास संपादन केला आहे. शिक्षकांच्या कल्पकता, समर्पण आणि गुणवत्तापूर्ण अध्यापनामुळे या शाळा पुन्हा केंद्रस्थानी येत आहेत.

नवीन शैक्षणिक धोरणामुळे बदलले शाळांचे चित्र

नवीन शैक्षणिक धोरण आणि विविध शासकीय उपक्रमांमुळे जिल्हा परिषद शाळांमध्ये मोठे बदल घडून आले आहेत. काही ठिकाणी पायाभूत सुविधांची कमतरता असली तरी शिक्षणाच्या गुणवत्तेत लक्षणीय सुधारणा झाली आहे.

राज्य शासनाच्या विविध योजनांमुळे विद्यार्थ्यांना मोफत पाठ्यपुस्तके, शालेय गणवेश, पोषण आहार, केळी व अंडी वाटप, मुलींसाठी विशेष सुविधा, स्वतंत्र स्वच्छतागृहे, सॅनिटरी नॅपकिनची उपलब्धता आणि विविध शैक्षणिक उपक्रमांचा लाभ मिळत आहे.

तिसरीपासून प्रज्ञाशोध परीक्षा, चौथी व सातवी शिष्यवृत्ती परीक्षा, टॅलेंट सर्च परीक्षा तसेच विविध स्पर्धात्मक उपक्रमांमुळे विद्यार्थ्यांचा सर्वांगीण विकास साधला जात आहे. याशिवाय पहिलीपासून इंग्रजी विषय अनिवार्य करण्यात आल्याने ग्रामीण विद्यार्थ्यांनाही इंग्रजी शिक्षणाची संधी मिळत आहे.

डिजिटल शिक्षणामुळे वाढली गुणवत्ता

अनेक जिल्हा परिषद शाळांनी डिजिटल वर्ग, स्मार्ट टीव्ही, ई-लर्निंग ॲप्स आणि आधुनिक तंत्रज्ञानाचा वापर सुरू केला आहे. ‘निपुण शाळा’ मोहिमेद्वारे शिक्षणाच्या गुणवत्तेवर सातत्याने लक्ष ठेवले जात असून विद्यार्थ्यांच्या प्रगतीचे नियमित मूल्यमापन केले जाते.

पालकांच्या विविध समित्यांमार्फत शाळांवर नियंत्रण ठेवले जात असल्याने पारदर्शकता आणि उत्तरदायित्वही वाढले आहे.

गावांचा शाळांसाठी पुढाकार

अनेक गावांनी आपल्या जिल्हा परिषद शाळा सक्षम करण्यासाठी पुढाकार घेतला आहे. काही ग्रामपंचायतींनी जिल्हा परिषद शाळेत प्रवेश घेणाऱ्या विद्यार्थ्यांच्या पालकांना घरपट्टीत सवलत देण्याचा निर्णय घेतला आहे.

तसेच शिक्षकांनी मुख्यालयी राहावे यासाठीही अनेक गावांनी प्रयत्न केले आहेत. यामुळे शिक्षक, विद्यार्थी आणि गाव यांच्यातील नाते अधिक दृढ होत असून विद्यार्थ्यांच्या जडणघडणीत सकारात्मक परिणाम होत आहे.

मराठी शाळा म्हणजे संस्कृतीचा वारसा

शाळा ही केवळ शिक्षण देणारी संस्था नसून समाजाची संस्कृती, मूल्ये आणि परंपरा जपणारे केंद्र असते. मराठी शाळांमधून शिक्षण घेताना विद्यार्थ्यांमध्ये सामाजिक समता, सांस्कृतिक जाणीव आणि मातृभाषेप्रती अभिमान निर्माण होतो.

गरीब आणि श्रीमंत विद्यार्थ्यांना एकत्र शिक्षण मिळाल्याने सामाजिक सलोखा आणि संवेदनशीलता वाढते. त्यामुळे मराठी शाळा टिकल्या तर मराठी भाषा आणि महाराष्ट्राची सांस्कृतिक ओळख अधिक भक्कम राहील, असे मत शिक्षण क्षेत्रातील जाणकार व्यक्त करत आहेत.

सकारात्मक निर्णयाची गरज

पालकांनी आपल्या परिसरातील जिल्हा परिषद शाळांना भेट देऊन तेथील सुविधा, शैक्षणिक गुणवत्ता आणि विद्यार्थ्यांची प्रगती प्रत्यक्ष पाहावी. बाह्य चकाकीपेक्षा गुणवत्तापूर्ण शिक्षण, प्रशिक्षित शिक्षक आणि संस्कारक्षम वातावरणाला प्राधान्य देऊन आपल्या पाल्याच्या भविष्यासाठी योग्य निर्णय घ्यावा, असे आवाहन करण्यात आले आहे.

आज आपल्या मुलाला मराठी शाळेत प्रवेश देणे म्हणजे केवळ शाळेची निवड नव्हे, तर मराठी भाषा, संस्कृती आणि गुणवत्तापूर्ण शिक्षण व्यवस्थेवरील विश्वास व्यक्त करणे आहे.