गडचिरोलीतील ६२ बालकांवर मुंबईत मोफत हृदय शस्त्रक्रिया; सहपालकमंत्री ॲड. आशीष जयस्वाल यांच्या पुढाकाराला यश

गडचिरोली | दि. ८ जुलै २०२६

गडचिरोलीसारख्या दुर्गम आणि आदिवासीबहुल जिल्ह्यातील हृदयविकारग्रस्त बालकांसाठी मोठा दिलासा देणारा उपक्रम साकार झाला आहे. राज्यमंत्री तथा जिल्ह्याचे सहपालकमंत्री ॲड. आशीष जयस्वाल यांच्या सातत्यपूर्ण पाठपुराव्यामुळे गडचिरोलीतील ६२ बालकांवर मुंबई येथे मोफत हृदय शस्त्रक्रिया करण्यात येणार आहे.

मुख्यमंत्री वैद्यकीय मदत कक्ष, डॉ. श्रीकांत शिंदे फाउंडेशन, ज्युपिटर हॉस्पिटल, आरोग्यदूत फाउंडेशन आणि सार्वजनिक आरोग्य विभाग यांच्या संयुक्त विद्यमाने आयोजित करण्यात आलेल्या विशेष बाल हृदय तपासणी शिबिरात ३४६ बालकांची अत्याधुनिक 2D Echo तपासणी करण्यात आली.

या तपासणीत ५२ बालके हृदय शस्त्रक्रियेसाठी पात्र ठरली असून त्यांच्यावर लवकरच मुंबई येथे शस्त्रक्रिया केली जाणार आहे. तसेच आणखी १० बालकांची मुंबईत सविस्तर तपासणी करून आवश्यकतेनुसार त्यांच्यावरही मोफत शस्त्रक्रिया केली जाणार आहे. अशा प्रकारे एकूण ६२ बालकांना या उपक्रमाचा लाभ मिळणार आहे.

या सर्व बालकांसाठी गडचिरोली ते मुंबई प्रवास, पालकांसह निवास व भोजन व्यवस्था, रुग्णालयातील उपचार, हृदय शस्त्रक्रिया आणि आवश्यक वैद्यकीय सेवांचा संपूर्ण खर्च पूर्णपणे मोफत करण्यात आला आहे. आर्थिक अडचणींमुळे उपचारांपासून वंचित राहणाऱ्या कुटुंबांसाठी हा उपक्रम मोठा आधार ठरणार आहे.

गडचिरोलीतील गरजू बालकांना मुंबईतील अत्याधुनिक हृदयरोग उपचार उपलब्ध व्हावेत, यासाठी सहपालकमंत्री ॲड. आशीष जयस्वाल यांनी मुख्यमंत्री वैद्यकीय मदत कक्ष, डॉ. श्रीकांत शिंदे फाउंडेशन, ज्युपिटर हॉस्पिटल, आरोग्यदूत फाउंडेशन आणि संबंधित संस्थांशी सातत्याने समन्वय साधून या उपक्रमासाठी विशेष प्रयत्न केले.

याबाबत बोलताना सहपालकमंत्री ॲड. आशीष जयस्वाल म्हणाले की, "आर्थिक अडचणीमुळे कोणतेही बालक उपचारांपासून वंचित राहू नये, हा या उपक्रमामागील मुख्य उद्देश आहे. पात्र ठरलेल्या सर्व ६२ बालकांना सुरक्षितपणे मुंबईत नेणे, त्यांच्या पालकांच्या राहण्याची व्यवस्था करणे, उपचार आणि शस्त्रक्रियेचा संपूर्ण खर्च उचलणे तसेच आवश्यक सर्व सहकार्य उपलब्ध करून देण्यासाठी नियोजन करण्यात आले आहे."

गडचिरोलीत ३४६ बालकांची हृदय तपासणी करून त्यापैकी ६२ बालकांना मोफत हृदय शस्त्रक्रियेची संधी उपलब्ध करून देणारा हा उपक्रम जिल्ह्यातील बाल आरोग्य सेवेला नवे बळ देणारा ठरत असून, आर्थिकदृष्ट्या दुर्बल कुटुंबांतील हृदयविकारग्रस्त बालकांसाठी अत्याधुनिक उपचाराची नवी आशा निर्माण करणारा महत्त्वपूर्ण उपक्रम ठरत आहे.