महाळुंगे पुलावरील वाहतूक ८ जुलैपर्यंत बंद; पर्यायी मार्गांचा वापर करण्याचे पोलिसांचे आवाहन

पुणे प्रतिनिधी: रोहन सोनाळे 

पिंपरी-चिंचवड  : सततच्या मुसळधार पावसामुळे महाळुंगे परिसरातील पुलाचे नुकसान झाल्याने नागरिकांच्या सुरक्षिततेच्या दृष्टीने पुलावरील वाहतूक तात्पुरती बंद करण्यात आली आहे. पिंपरी-चिंचवड पोलीस आयुक्तालयाने जारी केलेल्या अधिसूचनेनुसार ८ जुलै २०२६ पर्यंत या मार्गावरील वाहतूक बंद राहणार असून वाहनचालकांनी पर्यायी मार्गांचा वापर करावा, असे आवाहन करण्यात आले आहे.

अतिवृष्टीमुळे पुलाच्या संरचनेवर परिणाम झाल्याने खबरदारीचा उपाय म्हणून वाहतूक बंद करण्याचा निर्णय घेण्यात आला आहे. संबंधित यंत्रणांकडून पुलाची पाहणी, दुरुस्ती आणि आवश्यक तांत्रिक कामे युद्धपातळीवर सुरू करण्यात येणार आहेत.

वाहतूक पोलिसांनी या काळात नागरिकांनी प्रशासनाने निश्चित केलेल्या पर्यायी मार्गांचा वापर करावा, वाहतूक कर्मचाऱ्यांच्या सूचनांचे पालन करावे आणि अनावश्यक गर्दी टाळावी, असे आवाहन केले आहे. तसेच सार्वजनिक बांधकाम विभाग आणि संबंधित यंत्रणांना आवश्यक सूचना देण्यात आल्या असून वाहतूक सुरळीत करण्यासाठी समन्वयाने उपाययोजना केल्या जात आहेत.

दरम्यान, मुसळधार पावसामुळे शहरातील विविध भागांमध्ये पाणी साचणे, रस्त्यांवर अडथळे निर्माण होणे आणि वाहतूक विस्कळीत होण्याच्या घटना घडत आहेत. त्यामुळे नागरिकांनी अत्यावश्यक कामाशिवाय प्रवास टाळावा आणि अधिकृत सूचनांवरच विश्वास ठेवावा, असे आवाहन प्रशासनाने केले आहे.

पुलाची दुरुस्ती पूर्ण झाल्यानंतर वाहतूक पुन्हा सुरू करण्याबाबत स्वतंत्र सूचना जारी करण्यात येणार असल्याचे पोलिस प्रशासनाने स्पष्ट केले आहे.