आषाढी पालखी सोहळ्यासाठी पिंपरी-चिंचवड महापालिकेची सज्जता; महापौर रवि लांडगे यांनी पालखी मार्गाची केली पाहणी

पुणे | प्रतिनिधी रोहन सोनाळे 

आषाढी एकादशीच्या निमित्ताने संतश्रेष्ठ श्री संत ज्ञानेश्वर महाराज आणि जगद्गुरू श्री संत तुकाराम महाराज यांच्या पालखी सोहळ्यासाठी पिंपरी-चिंचवड शहरातून लाखो वारकरी आणि भाविक मार्गस्थ होणार आहेत. या पार्श्वभूमीवर पालखी मार्गावरील सर्व नागरी सुविधा, स्वच्छता, आरोग्य सेवा, वाहतूक व्यवस्था आणि सुरक्षा यंत्रणा अद्ययावत ठेवण्याच्या दृष्टीने पिंपरी-चिंचवड महापालिकेचे महापौर रवि लांडगे यांनी पालखी मार्गाची प्रत्यक्ष पाहणी केली.

महापौर रवि लांडगे यांनी सकाळी मॅगझीन चौक आणि निगडी येथील भक्ती-शक्ती चौक परिसरातील पालखी मार्गाची पाहणी करून विविध विभागांनी केलेल्या तयारीचा आढावा घेतला. यावेळी अतिरिक्त आयुक्त कुलदीप जंगम, सहशहर अभियंता बापू गायकवाड, उपआयुक्त अण्णा बोदडे, क्षेत्रीय अधिकारी अतुल पाटील, मुख्य सुरक्षा अधिकारी उदय जरांडे, निवेदिता घार्गे, कार्यकारी अभियंता शिवाजी चौरे, दमयंती पवार, चंद्रकांत मुथाळ, जनसंपर्क अधिकारी प्रफुल्ल पुराणिक तसेच आरोग्य, स्वच्छता, पाणीपुरवठा, विद्युत, वाहतूक, आपत्ती व्यवस्थापन आणि इतर विभागांचे अधिकारी उपस्थित होते.

पाहणीदरम्यान महापौरांनी पालखी मार्गावरील स्वच्छता, रस्त्यांची स्थिती, पिण्याच्या पाण्याची व्यवस्था, चलत शौचालये, आरोग्य पथके, रुग्णवाहिका, अग्निशमन यंत्रणा, वाहतूक नियोजन, प्रकाश व्यवस्था, दिशादर्शक फलक तसेच वारकऱ्यांसाठी उपलब्ध करून देण्यात आलेल्या विविध सुविधांचा सविस्तर आढावा घेतला. संबंधित अधिकाऱ्यांकडून प्रत्येक सुविधेची माहिती घेऊन आवश्यक त्या सुधारणा तातडीने करण्याच्या सूचना त्यांनी दिल्या.

यावेळी महापौर रवि लांडगे यांनी पालखी सोहळा हा महाराष्ट्राच्या सांस्कृतिक, आध्यात्मिक आणि सामाजिक परंपरेचा अमूल्य वारसा असल्याचे सांगितले. वारकरी बांधवांना कोणत्याही प्रकारची गैरसोय होणार नाही, यासाठी सर्व विभागांनी समन्वयाने आणि जबाबदारीने काम करावे, असे निर्देश त्यांनी दिले.

विशेषतः वारकरी बांधवांच्या सुरक्षेसाठी पालखी मार्गावर आवश्यक ठिकाणी टेहळणी टॉवर (Watch Towers) उभारण्याचे निर्देश महापौरांनी दिले. तसेच पालखी मार्गावरील स्वच्छतेला सर्वोच्च प्राधान्य देत नियमित साफसफाई, कचरा व्यवस्थापन, पिण्याच्या पाण्याची उपलब्धता आणि वैद्यकीय सुविधा अखंड सुरू ठेवण्यावर भर देण्यात आला.

महापालिकेच्या सर्व विभागांनी पालखी सोहळ्यादरम्यान २४ तास समन्वयाने कार्यरत राहून वारकरी, भाविक आणि नागरिकांना सुरक्षित, स्वच्छ आणि सुविधायुक्त वातावरण उपलब्ध करून द्यावे, असे आवाहन महापौर रवि लांडगे यांनी यावेळी केले.