विधानसभा उपाध्यक्ष अण्णा बनसोडे यांची महापालिका आयुक्त डॉ. विजय सूर्यवंशी यांच्यासोबत बैठक; विकासकामांचा घेतला सविस्तर आढावा

पुणे प्रतिनिधी रोहन सोनाळे 

पिंपरी, दि. ८ जून २०२६ : विधानसभा उपाध्यक्ष अण्णा बनसोडे यांनी सोमवारी पिंपरी चिंचवड महानगरपालिका आयुक्त डॉ. विजय सूर्यवंशी यांची भेट घेत शहरातील विविध विकासकामे, प्रशासकीय कामकाज आणि प्रलंबित प्रकल्पांच्या प्रगतीचा सविस्तर आढावा घेतला. यावेळी महापालिका मुख्यालयात आयोजित बैठकीत विविध विभागांच्या अधिकाऱ्यांशी संवाद साधून शहर विकासाशी संबंधित महत्त्वाच्या विषयांवर चर्चा करण्यात आली.

बैठकीदरम्यान महापालिका आयुक्त डॉ. विजय सूर्यवंशी यांनी अण्णा बनसोडे यांचे स्वागत केले. तसेच शहरात सुरू असलेल्या महत्त्वपूर्ण प्रकल्पांची सद्यस्थिती, विविध विकासकामांची अंमलबजावणी आणि भविष्यातील नियोजन याबाबत सविस्तर माहिती सादर केली.

या बैठकीस अतिरिक्त आयुक्त कुलदीप जंगम, विक्रांत बगाडे, नगररचना विभागाचे उपसंचालक किशोर गोखले, उप आयुक्त अण्णा बोदडे, क्षेत्रीय अधिकारी मुकेश कोळप, कार्यकारी अभियंता विजय भोजणे यांच्यासह विविध विभागांचे विभागप्रमुख, अधिकारी आणि कर्मचारी उपस्थित होते.

बैठकीत अण्णा बनसोडे यांनी पिंपरी विधानसभा मतदारसंघासह शहरातील विविध भागांमध्ये सुरू असलेल्या रस्ते विकास कामे, पाणीपुरवठा व्यवस्था, स्वच्छता सुविधा, नगररचना प्रकल्प, सार्वजनिक सुविधा आणि नागरी पायाभूत सुविधांच्या कामकाजाचा सखोल आढावा घेतला. प्रलंबित विकासकामांना गती देणे, नागरिकांच्या तक्रारींचे तातडीने निराकरण करणे तसेच कामांमध्ये पारदर्शकता आणि गुणवत्तेला प्राधान्य देण्याच्या सूचना त्यांनी संबंधित अधिकाऱ्यांना दिल्या.

याशिवाय, महानगरपालिकेच्या विविध प्रकल्पांची सद्यस्थिती, अंमलबजावणीतील अडचणी, निधी व्यवस्थापन आणि भविष्यातील विकास आराखड्याबाबतही सविस्तर चर्चा करण्यात आली. बैठकीत उपस्थित अधिकाऱ्यांनी विविध विभागांशी संबंधित माहिती सादर करत आवश्यक सुधारणा आणि उपाययोजनांबाबत आपले मत व्यक्त केले.

शहरातील विकासकामे वेळेत आणि दर्जेदार पद्धतीने पूर्ण करण्यासाठी प्रशासनाने अधिक प्रभावीपणे काम करण्याची गरज असल्याचे मत व्यक्त करत अण्णा बनसोडे यांनी नागरिकांना अधिक चांगल्या सुविधा उपलब्ध करून देण्यासाठी समन्वयाने काम करण्याचे आवाहन केले.