आष्टी विधानसभा मतदारसंघातील फिश मार्केट उभारणीची कार्यवाही गतिमान करा – मत्स्यव्यवसाय मंत्री नितेश राणे

मुंबई ब्यूरो :अनिल सावरे 

मुंबई, दि. ७ : बीड जिल्ह्यातील आष्टी विधानसभा मतदारसंघातील नगरपंचायत आणि ग्रामपंचायत स्तरावर आधुनिक फिश मार्केट उभारण्याच्या प्रस्तावांना गती देऊन आवश्यक कार्यवाही कालबद्ध पद्धतीने पूर्ण करावी, असे निर्देश मत्स्यव्यवसाय व बंदरे मंत्री नितेश राणे यांनी संबंधित अधिकाऱ्यांना दिले.

मुख्यमंत्री मत्स्यसंपदा योजनेअंतर्गत आष्टी विधानसभा मतदारसंघात नगरपंचायत व ग्रामपंचायत स्तरावर आधुनिक फिश मार्केट उभारण्यासाठी मंजुरी आणि निधी उपलब्ध करून देण्यासंदर्भात मंत्रालयात मंत्री नितेश राणे यांच्या अध्यक्षतेखाली बैठक झाली. या बैठकीस आमदार सुरेश धस यांच्यासह मत्स्यव्यवसाय विभागाचे अधिकारी उपस्थित होते. दूरदृश्य प्रणालीद्वारे बीडचे जिल्हाधिकारी तसेच जिल्ह्यातील स्थानिक स्तरावरील संबंधित अधिकारी बैठकीत सहभागी झाले.

तीन नगरपंचायत आणि सहा ग्रामपंचायतींचे प्रस्ताव

आष्टी विधानसभा मतदारसंघातील तीन नगरपंचायत आणि सहा ग्रामपंचायतींसाठी फिश मार्केट उभारणीचे प्रस्ताव शासनाकडे पाठविण्यात आल्याची माहिती आमदार सुरेश धस यांनी बैठकीत दिली.

या प्रस्तावांच्या आराखड्यांची तांत्रिक तपासणी तातडीने करण्यात यावी. आवश्यक त्या सर्व बाबींची छाननी करून फिश मार्केट उभारणीसंदर्भातील कार्यवाही कालबद्ध पद्धतीने पूर्ण करावी, असे निर्देश मंत्री नितेश राणे यांनी दिले.

आधुनिक सुविधांनी युक्त बाजारपेठ उभारण्यावर भर

फिश मार्केटची वास्तुरचना आधुनिक आणि अत्याधुनिक सुविधांनी युक्त असावी, यावर मंत्री राणे यांनी विशेष भर दिला. स्थानिक नागरिकांना स्वच्छ, सुरक्षित आणि सुसज्ज बाजारपेठ उपलब्ध करून देताना दर्जेदार आणि दीर्घकालीन सुविधा निर्माण करण्यास प्राधान्य देण्याच्या सूचना त्यांनी दिल्या.

मुख्यमंत्री मत्स्यसंपदा योजनेचा जास्तीत जास्त लाभ स्थानिक नागरिकांना मिळेल, याची दक्षता घेण्याचे निर्देशही त्यांनी दिले.

स्थानिक मत्स्य उत्पादनाला चालना

आष्टी विधानसभा मतदारसंघातील स्थानिक पातळीवर मत्स्य उत्पादन वाढविण्यासाठी आवश्यक मार्गदर्शन आणि तांत्रिक सहाय्य उपलब्ध करून द्यावे, असेही मंत्री राणे यांनी सांगितले.

आधुनिक फिश मार्केटच्या माध्यमातून मत्स्य उत्पादकांना बाजारपेठ उपलब्ध होण्याबरोबरच ग्राहकांना स्वच्छ आणि नियोजनबद्ध पद्धतीने मत्स्य उत्पादने उपलब्ध होण्यास मदत होणार आहे. त्यामुळे स्थानिक पातळीवर मत्स्य व्यवसायाला चालना देण्याच्या दृष्टीने या प्रकल्पाकडे पाहिले जात आहे.

नागरिकांना स्वच्छ व सुरक्षित बाजारपेठ मिळणार

फिश मार्केट उभारताना केवळ इमारत उभारणी न करता नागरिकांसाठी स्वच्छता, सुरक्षितता, सुसज्जता आणि दीर्घकालीन उपयोगिता या बाबींवर भर देण्यात यावा, असे निर्देश मंत्री नितेश राणे यांनी दिले.