हिंदू खाटीक समाजासाठी स्वयंरोजगार, उद्योग व शिक्षणासाठी कर्ज-अनुदान योजना; मुंबईतील पात्र लाभार्थ्यांना अर्जाचे आवाहन

मुंबई | प्रतिनिधी 

अनुसूचित जाती प्रवर्गातील हिंदू खाटीक समाजातील लाभार्थ्यांना स्वयंरोजगार, उद्योग व्यवसाय तसेच उच्च शिक्षणासाठी आर्थिक बळ देण्याच्या उद्देशाने हिंदू खाटीक समाज आर्थिक विकास महामंडळ विविध कर्ज व अनुदान योजना राबवत आहे. या योजनांचा लाभ घेण्यासाठी मुंबई शहर व मुंबई उपनगर जिल्ह्यातील इच्छुक व पात्र लाभार्थ्यांनी महामंडळाच्या महादिशा पोर्टलवर ऑनलाइन अर्ज करण्याचे आवाहन जिल्हा व्यवस्थापकांनी केले आहे.

महामंडळाच्या ५० टक्के अनुदान योजनेअंतर्गत ५० हजार रुपयांपर्यंतच्या प्रकल्पासाठी २५ हजार रुपये अनुदान आणि २५ हजार रुपये बँक कर्ज उपलब्ध करून दिले जाते. या योजनेच्या माध्यमातून लघुउद्योग, सूक्ष्म व्यवसाय आणि उपजीविकेस पूरक उद्योगांना प्रोत्साहन दिले जाते.

बीज भांडवल योजनेत ५० हजार ते ५ लाख रुपयांपर्यंतच्या प्रकल्पांसाठी महामंडळाचा २० टक्के सहभाग असून त्यात जास्तीत जास्त ५० हजार रुपये अनुदान आणि ५० हजार रुपये बीज भांडवल दिले जाते. उर्वरित ७५ टक्के रक्कम बँकेमार्फत कर्ज स्वरूपात उपलब्ध करून दिली जाते. लाभार्थ्याचा केवळ ५ टक्के आर्थिक सहभाग असून कर्जफेडीसाठी ३ ते ५ वर्षांचा कालावधी दिला जातो.

थेट कर्ज योजनेअंतर्गत लाभार्थ्यांना १ लाख रुपयांपर्यंत कर्ज केवळ ४ टक्के वार्षिक व्याजदराने उपलब्ध करून दिले जाते. या योजनेत महामंडळाकडून जास्तीत जास्त ५० हजार रुपये अनुदान, ४५ हजार रुपये थेट कर्ज आणि लाभार्थ्याचा ५ हजार रुपयांचा सहभाग आहे. जलद व सुलभ प्रक्रियेमुळे अल्पावधीत व्यवसाय सुरू करण्यासाठी ही योजना उपयुक्त ठरत आहे.

याशिवाय राष्ट्रीय अनुसूचित जाती वित्त व विकास महामंडळ (NSFDC) मार्फतही विविध कर्ज योजना उपलब्ध आहेत. या योजनांमध्ये १.४० लाख ते ५ लाख रुपयांपर्यंत कर्ज उपलब्ध असून एकूण प्रकल्पाच्या ९० टक्के निधीची तरतूद एनएसएफडीसीकडून केली जाते. तसेच जास्तीत जास्त ५० हजार रुपयांचे अनुदान दिले जाते. या योजनेत अर्जदाराला स्वतःचा आर्थिक सहभाग करावा लागत नाही.

एनएसएफडीसी शैक्षणिक कर्ज योजनेत देशांतर्गत व परदेशातील उच्च शिक्षणासाठी १० लाख ते ४० लाख रुपयांपर्यंत कर्ज उपलब्ध आहे. तसेच मुदत कर्ज योजना आणि सूक्ष्म पुरवठा कर्ज योजनेअंतर्गत १.४० लाख ते ३ लाख रुपयांपर्यंत कर्ज महामंडळाच्या नियमांनुसार दिले जाते.

अर्जदारासाठी आवश्यक पात्रता

अर्जदार अनुसूचित जाती किंवा नवबौद्ध प्रवर्गातील असावा.

वय १८ ते ५० वर्षे असावे.

ग्रामीण व शहरी भागासाठी वार्षिक उत्पन्न मर्यादा ३ लाख रुपये आहे.

अर्जदार हा महामंडळ किंवा इतर वित्तीय संस्थेचा थकबाकीदार नसावा.

आवश्यक कागदपत्रे

जातीचा व उत्पन्नाचा दाखला

पासपोर्ट आकाराचे छायाचित्र

आधार कार्ड, पॅन कार्ड, रेशनकार्ड, मतदान ओळखपत्र किंवा रहिवासी दाखला

व्यवसायासाठी आवश्यक जागेचा पुरावा व कोटेशन

आवश्यकतेनुसार प्रकल्प अहवाल

बँक पासबुकची प्रत

महामंडळाच्या सर्व योजनांची सविस्तर माहिती, पात्रतेच्या अटी, आवश्यक कागदपत्रांची यादी आणि अर्ज प्रक्रिया महादिशा पोर्टलवर उपलब्ध असून, पात्र लाभार्थ्यांनी माहिती काळजीपूर्वक वाचून लवकरात लवकर ऑनलाइन अर्ज करून या योजनांचा लाभ घ्यावा, असे आवाहन करण्यात आले आहे.