महालक्ष्मी मंदिर परिसर विकास आराखड्यात बाधितांच्या प्रश्नांवर समन्वयाने मार्ग काढणार; जिल्हाधिकारी डॉ. विजय राठोड यांची ग्वाही

प्रतिनिधी : उमेश जाधव 

कोल्हापूर : श्री महालक्ष्मी अंबाबाई मंदिर परिसर विकास आराखड्याच्या अनुषंगाने बाधित होणाऱ्या स्थानिक मालमत्ता आणि व्यवसायधारकांच्या प्रश्नांवर जिल्हा प्रशासनाकडून समन्वयाने योग्य तो मार्ग काढण्यात येईल, अशी ग्वाही जिल्हाधिकारी डॉ. विजय राठोड यांनी दिली.

जिल्हाधिकारी कार्यालयातील शाहूजी सभागृहात श्री महालक्ष्मी अंबाबाई मंदिर विकास आराखडा आणि भूसंपादनासंदर्भात आढावा बैठक आयोजित करण्यात आली होती. या बैठकीत मंदिर परिसरातील बाधित मालमत्ता व व्यावसायिकांच्या प्रश्नांवर चर्चा करण्यात आली.

भूसंपादनाला प्रथम प्राधान्य

यावेळी जिल्हाधिकारी डॉ. विजय राठोड म्हणाले की, विकास आराखड्यामध्ये भूसंपादन करण्याला प्रथम प्राधान्य देण्यात येत आहे. विकासकामांमुळे जे व्यावसायिक बाधित झाले आहेत, त्यांना व्यवसायासाठी जागा उपलब्ध करून देण्याच्या दृष्टीने प्रशासनाचे प्राधान्य राहील.

तसेच शासनाच्या निकषांनुसार संबंधित बाधितांना भूसंपादनाचा योग्य मोबदला देण्यात येईल. बाधितांच्या मागण्या तपासून त्यावर सकारात्मक मार्ग काढण्याचा प्रशासनाचा प्रयत्न राहील, असेही त्यांनी स्पष्ट केले.

‘कोणावरही अन्याय होणार नाही’

विकास आराखड्याची अंमलबजावणी करताना संबंधित नागरिकांच्या हिताचा विचार केला जाईल. “कोणावरही अन्याय होणार नाही,” याची दक्षता प्रशासनाकडून घेतली जाईल, असे जिल्हाधिकारी डॉ. राठोड यांनी सांगितले.

स्थानिक मालमत्ता आणि व्यवसायधारकांच्या प्रश्नांकडे समन्वयाच्या भूमिकेतून पाहून योग्य तो तोडगा काढण्याचे आश्वासनही त्यांनी शिष्टमंडळाला दिले.

महाद्वार रोडवरील मालमत्ता अबाधित ठेवण्याची मागणी

दरम्यान, महाद्वार रोडवरील व्यावसायिकांच्या मालमत्ता अबाधित ठेवून श्री महालक्ष्मी मंदिर परिसराचा विकास करण्यात यावा, अशी मागणी बाधितांच्या शिष्टमंडळाने केली.

मंदिर परिसर विकास आराखड्यामुळे स्थानिक व्यवसाय आणि मालमत्तांवर होणाऱ्या परिणामांच्या पार्श्वभूमीवर संबंधितांनी आपल्या मागण्या प्रशासनासमोर मांडल्या.

अधिकारी आणि बाधित व्यावसायिकांची उपस्थिती

या बैठकीस करवीर प्रांताधिकारी मोसमी चौगुले, जिल्हा नियोजन अधिकारी विक्रम देशमुख, जेडीआरचे तेजस इंगळे, नगर रचनाकार संदेश कुळवमोडे, रविराज पवार, पियुष जाधव यांच्यासह अंबाबाई मंदिर परिसरातील बाधित व्यावसायिक आणि रहिवासी उपस्थित होते.

मंदिर परिसराचा विकास आणि स्थानिक नागरिकांचे हित यांचा समन्वय साधत पुढील कार्यवाही करण्याबाबत बैठकीत चर्चा झाली.