गणेशोत्सवासाठी कोकणवासीयांना घेऊन पहिली ‘मोदी एक्सप्रेस’ कोकणकडे रवाना

मुंबई: ब्यूरो अनिल सावरे 

मुंबई, दि. ११ : गणेशोत्सव आपल्या कुटुंबीयांसोबत आनंदात आणि उत्साहात साजरा करता यावा, यासाठी दरवर्षीप्रमाणे यंदाही कोकणवासीयांसाठी ‘मोदी एक्सप्रेस’ या विशेष रेल्वेची व्यवस्था करण्यात आली आहे. कोकणवासीयांना घेऊन जाणारी पहिली ‘मोदी एक्सप्रेस’ आज दादर रेल्वे स्थानकातील फलाट क्रमांक १४ येथून कोकणच्या दिशेने रवाना झाली.

मत्स्यव्यवसाय व बंदरे मंत्री नितेश राणे यांनी हिरवा झेंडा दाखवून या विशेष रेल्वेला मार्गस्थ केले. गणेशोत्सवासाठी आपल्या गावी जाणाऱ्या कोकणवासीयांसाठी या उपक्रमामुळे प्रवास अधिक सोयीस्कर होणार आहे.

‘मोदी एक्सप्रेस’ उपक्रमाचे १४वे वर्ष

यंदा ‘मोदी एक्सप्रेस’ उपक्रमाचे १४वे वर्ष आहे. गणपती बाप्पाच्या आगमनाची आतुरतेने वाट पाहत कोकणाकडे निघालेल्या गणेशभक्तांचा प्रवास अधिक सुरक्षित, सुखकर आणि आनंददायी व्हावा, यासाठी हा उपक्रम राबविण्यात येत आहे.

यावेळी मंत्री नितेश राणे यांनी रेल्वेतील प्रवाशांशी संवाद साधला. कोकणवासीयांना गणेशोत्सवाच्या शुभेच्छा देत त्यांचा प्रवास सुखकर आणि आनंददायी व्हावा, अशी सदिच्छा त्यांनी व्यक्त केली.

गणेशोत्सवाच्या पार्श्वभूमीवर मुंबई आणि परिसरातून मोठ्या संख्येने नागरिक कोकणातील आपल्या मूळ गावी जात असतात. त्यामुळे प्रवाशांची गैरसोय टाळण्यासाठी विशेष रेल्वेची व्यवस्था करण्यात आली आहे.

‘गणपती बाप्पा मोरया’च्या जयघोषात पहिली ‘मोदी एक्सप्रेस’ कोकणच्या दिशेने रवाना झाल्याने कोकणवासीयांमध्ये गणेशोत्सवाचा उत्साह आणखी वाढला आहे.