पूंछ सीमावर्ती भागातील विद्यार्थ्यांची राज्यपाल जिष्णु देव वर्मा यांना सदिच्छा भेट

मुंबई प्रतिनिधी देवानंद शिंदे 

मुंबई, दि. 23 : जम्मू-काश्मीरमधील पूंछ या सीमावर्ती भागातील युवक-युवतींच्या शिष्टमंडळाने महाराष्ट्राचे राज्यपाल Jishnu Dev Varma यांची महाराष्ट्र लोकभवन येथे सदिच्छा भेट घेतली. भारतीय सैन्यदलाच्या ‘सद्भावना’ मोहिमेंतर्गत या भेटीचे आयोजन करण्यात आले होते.

या प्रसंगी राज्यपालांनी विद्यार्थ्यांशी मनमोकळा संवाद साधत त्यांच्या शिक्षण, क्रीडा आणि भविष्यातील उद्दिष्टांविषयी माहिती घेतली. तसेच सीमावर्ती भागातील युवक-युवतींनी विविध क्षेत्रांत प्रगती करून देशाच्या विकासात योगदान द्यावे, अशा शुभेच्छाही त्यांनी दिल्या.

शिष्टमंडळातील पाच विद्यार्थिनींपैकी तीन युवती राष्ट्रीय स्तरावरील हॉकी खेळाडू असल्याची माहिती यावेळी देण्यात आली. तसेच एका विद्यार्थिनीने भविष्यात भारतीय प्रशासकीय सेवेत (IAS) जाण्याची इच्छा व्यक्त केली. राज्यपालांनी तिच्या या ध्येयाचे कौतुक करत परिश्रम आणि सातत्याच्या जोरावर यश संपादन करण्याचा सल्ला दिला.

या भेटीवेळी मौलवी फरीद मलिक, शबनम परवीन, नवाझ मेहमूद, उमर अब्दुल्ला खान, मुबशीर अहमद, शाहिस्ता मजीद, आदिल मजीद, शबीना परवीन आणि नसीम फातिमा यांची उपस्थिती होती.

भारतीय सैन्यदलाच्या सद्भावना मोहिमेच्या माध्यमातून सीमावर्ती भागातील युवक-युवतींना देशातील विविध राज्यांतील सामाजिक, सांस्कृतिक आणि शैक्षणिक वातावरणाचा परिचय करून देण्याचा प्रयत्न केला जातो. या उपक्रमामुळे राष्ट्रीय एकात्मता बळकट होण्यास आणि विद्यार्थ्यांच्या व्यक्तिमत्त्व विकासाला चालना मिळण्यास मदत होत असल्याचे मानले जाते.